فڕەنسا کار بۆ دەستپێکرنا قۆناغەکا نوو ل رۆژئاڤایێ کوردستانێ دکەت
نوونەرێ فرەنسا ل سووریێ دەست ب بزاڤەکا نوو کریە و دخوازیت هەر دو جڤاتێن کوردی یێن رۆژئاڤایێ کوردستانێ جارەکا دی دەست ب دانوستاندنان بکەن و پرسێن هەی د ناڤبەرا خوە دا چارەسەر بکەن و کوردێن رۆژئاڤایێ کوردستانێ ژی داخواز دکەن پرسێن هەی بهێنە چارەسەرکرن.
ژێدەرەکێ ئاگەهدار ل رۆژئاڤایێ کوردستانێ کو نەخواست ناڤێ وی بهێتە ئاشکرا کرن بۆ ئەڤرۆ دیار کر، بەری چار سالان ئەمریکا و فرەنسا دەست ب بزاڤەکا نوو کربوون دا جارەکا دی هەر دو جڤاتێن کوردی یێن رۆژئاڤایێ کوردستانێ دەست ب قۆناغەکا نوو بکەن و پرسێن هەی د ناڤبەرا خوە دا چارەسەر بکەن لێ وی دەمی ژ بەر گەلەک ئاریشان ئەو یەک نەهاتە کرن لێ نها جارەکا دی نوونەرێ فرەنسا ل سووریێ دەست ب بزاڤەکا نوو کریە و دخوازیت هەر دو جڤاتێن کوردی یێن رۆژئاڤایێ کوردستانێ جارەکا دی دەست ب دانوستاندنان بکەن و پرسێن هەی د ناڤبەرا خوە دا چارەسەر بکەن.
هەمان ژێدەری ئەو یەک ژی دیار کر، نوونەرێ فرەنسا ل گەل فەرماندارێ گشتی یێ هێزێن سووریا دیموکرات و بەرپرسێن رێڤەبەریا خوەسەر کۆمبوویە و بۆ وان دیار کریە دڤێت پرسێن هەی بهێنە چارەسەر کرن، چونکی مەترسی ل سەر پاشەرۆژا رۆژئاڤایێ کوردستانێ هەنە و هەکە کورد نها پرسێن هەی د ناڤبەرا خوە دا چارەسەر نەکەن دێ ئاریشێن گەلەک مەزن بۆ کوردان ل سووریێ دروست بن و دڤێت هەر دو جڤاتێن کوردی د زووترین دەم دا دەست ب قۆناغەکا نوو بکەن و هەموو پرسێن هەی ب رێیا دانوستاندنان د ناڤبەرا خوە دا چارەسەر بکەن.
ل ئالیێ دی فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ ژی دیار کر هەتا نها ب فەرمی چو داخوازی ژ وان نەهاتیە کرن، لێ وەکو ئەنجوومەنێ نشتیمانی یێ کوردی ل سووریێ ئەو بۆ دانوستاندنان و دەستپێکرنا قۆناغەکا نوو ل رۆژئاڤایێ کوردستانێ بەرهەڤن، چونکی رۆژهەلاتا ناڤین بەر گوهۆڕینێن بلەز ڤە دچیت و بێگومان ئەو یەک دێ کاریگەریا خوە ل سەر سووریێ و رۆژئاڤایێ کوردستانێ هەبیت، دڤێت کورد ل رۆژئاڤایێ کوردستانێ هەموو ئاریشێن هەی د ناڤبەرا خوە دا چارەسەر بکەن، هەکە ئەو یەک بهێتە کرن بێگومان دێ پێگەهێ کوردان ژی گەلەک بهێز بیت و بەرۆڤاژی ڤێ یەکێ دێ مەترسیێن گەلەک مەزن بۆ کوردان دروست بن.
چاڤدێرێن سیاسی ل رۆژئاڤایێ کوردستانێ ژی دیار دکەن، دڤێت هەر دو جڤاتێن کوردی ل رۆژئاڤایێ کوردستانێ هەموو پرسێن هەی د ناڤبەرا خوە دا چارەسەر بکەن، چونکی دبیت ب هاتنا ترامپی سەردەمەک نوو ل دەڤەرێ و سووریێ دەستپێ بکەت و بێگومان دێ مەترسی ژی ل سەر رۆژئاڤایێ کوردستانێ دروست بن، ژ بەر ڤێ یەکێ ژی گرنگە هەموو هێزێن کوردی یێن رۆژئاڤایێ کوردستانێ پێکڤە کار بکەن.
