مەحمود شێخانى هونه‌رمه‌ندێ هاتیه ژبیركرن
رێیا هونه‌رى هه‌موو جارا نه یها ب ساناهى یه و نه یها سه‌ر راسته هه‌تا مرۆڤ ب گه‌هیتە ئارمانجا خوە هه‌ر دبینین ژ كه‌ڤن دا ئاسته‌نگى و ئالۆزى د بەراهیا رێیا هونه‌رى دا هه‌نه و دمشه‌نه و هنده‌ك كه‌س خوە ل به‌ر وان ئاریشا ناگرن وته‌ركا كارێ خوە دکەن و هنده‌ك كه‌س وان ئاریشا دكه‌نه پارچه‌كا هونه‌رى و سه‌ركه‌فتنێ تێدا دئینن وهنده‌ك جارا کاودان ژ هونه‌رى مه‌زنترن و ناهێلن ده‌نگێ سترانێ خوەش بیت و ئه‌و ده‌نگێ زه‌لال ل ناڤ گول وگیا ل ناڤ چۆل و چیا به‌ر رووبار و كانیا بێ ده‌نگ بمینت و ژوان هونه‌رمه‌ندا ده‌نگبیژێ گوندێ ملا چه‌په‌را مەحمود شیخانی یێ كو شانسی هارى نه‌كرى هه‌ر ژ ده‌ست پێكا وى عه‌وره‌كى ره‌ش لسه‌ر سه‌رێ وى بوویه و ژینا وى تارى كریه و نه‌گه‌هشتیه ئارمانجا خوە و هەر زوو بوو تێلا ته‌مبورا وى قه‌تیایى و بێ خودان ماى و ژه‌نینا غه‌مگینیێ هه‌تا مرنێ لێداى و ژڤێ دنیایێ باركر وخه‌ونێن وى رۆناهى نه‌دیتن
– مەحمود شیخانى كى یه ؟
ناڤێ وى یى دورست مەحمود خدیده حسێن ژ دایكبوویێ 1964گوندێ ملاچه‌په‌را سه‌ر ب ناحیا باعه‌درێ ڤه ناڤدارا ب مەحمود شێخانى
– ده‌ستپێکا وى ل گه‌ل هونه‌رى ڤه‌دگه‌ریتە ته‌مه‌نێ 12 سالى ده‌مێ دبینت چه‌ندین سترانبێژن ب ناڤ وده‌نگ سه‌ره‌دانا گوندێ وى كرین وستران گۆتین ژ وانا سترانبێژن چیایى شنگالێ (لازگین سیدو وقاسم مه‌یرۆ وفقیۆ ئوسو) وسترانبیژین دى (محمد عارف ونسرین شیروان) و هه‌روه‌سا گه‌له‌ك داخبار بوو ب دایكا خوە به‌هار وێ گه‌له‌ك سترانێن فلكلۆرى بۆ دگۆتن و هه‌روه‌سا فەقیر ئوسو ئاكنجى بوو ل گوندى وگه‌له‌ك داخباربوو ب ژه‌نینا ته‌مبورا وى و فێرى ته‌مبورێ كر و گۆتنا سترانێ و گه‌له‌ك مفا ژ وى گرت و هه‌ر وه‌سا گه‌له‌ك جاران ستران دگۆتن.
ل گه‌ل زه‌مبه‌را هاولاتیه‌كى گوندى ب ناڤێ (عه‌بدیێ زه‌مبه‌ر بێژ). ئه‌ڤان هونه‌رمه‌ندا هزرا وى گه‌شكر بۆ پێشكه‌فتنا سترانێ ل نك وى له‌وما ژ قالبێ گوندى ده‌ركه‌فت و یه‌كه‌مین ئاهه‌نگ گیرایی ل قوتابخانا باعه‌درێ و هه‌روه‌سا ل هه‌لكه‌فته‌كا تایبه‌ت ل شێخان ژى ستران گۆتن -ل سالا 1978 د چته به‌غدا و دبته قوتابى ل په‌یمانگه‌ها گەشتوگۆزارى و رێك ل وێرێ بۆ چێدبیت ب ساناهى خوە دگه‌هینته ئێزگێ كوردى ل به‌غدا و خوە بۆ وان دده‌تە ناسین و گوهداریا دكه‌ن چه‌ند سترانێن وى دكه‌ن.
