سلاڤەك ژ وارێ ڕۆژێ
نایف مەحموود
ل بەر
دەرازینكا خەمێن ئەڤی جانی
ل هنداڤی
ئەڤی سینگێ بووی ڤولكانا دەرد و ئێشا
سلاڤەك ژ وارێ ڕۆژێ
بەژنا چیا تەواف دكەت
ئەلندا وێ دبیت مزگینی
گەردەنا
مێرگ و چیمەنێن وەلاتێ من ماچی دكەت
هەمی كوخ و بلنداهی
كوچك و تەلار و ئاڤاهی
كرنوشێ ژبۆ ڕۆمەتا خاكا مە دبەن
تاری و زێمار ڕۆندكێن خوە زوها دكەن
دبن شاهی..
دیلان و دەستمال و ئالا
گوڤەندا خوە د شارینن
قیز و خورتێن كوردستانێ
سەما شادیێ دگێرن
ب ناڤێ دەولەتا كوردان
د سترینن،
هەوار دكەن
تەڤ ئازار و برینێن مە
تەنا دكەت
تەنا دكەت.
