میسال ئالۆسی: سەرۆك بارزانی دشێت هەموو ئالیێن سیاسی كۆمڤەكەت و چارەسەرییا كێشەیان بكەت
دامەزرێنەرێ حزبا ئوممە یا ئیراقی راگەهاند: سەرۆك بارزانی دشێت چارەسەرییا كێشەیان بكەت و هەموو ئالیێن سیاسی یێن ئیراقی كۆمڤەكەت، هەروەسا دبێژیت: میلیشیا رێگرن ئیراق پێش بكەڤیت و دەولەت ژی ل بن گەفێن میلیشیێن بەرەیێ موقاوەمێ ناهێتە ئاڤاكرن.
میسال ئالۆسی، دامەزرێنەرێ حزبا ئوممە یا ئیراقی گۆت» میلیشیا ل ئیراقێ ب سەر ئالیێن سیاسی ڤەنە و ئالیێن سیاسی ژی ئەڤ حوكمەتە یا پێكئینای، دڤێت خوە ئێكلابكەن ئەو حوكمەتن یان میلیشیا».
میسال ئالۆسی سەرنج بۆ وێ چەندێ ژی راكێشا» بەردەوام ل دووڤ بەرسڤا پرسیارەكێدا دگەریێم ئایا ئیراقێ هێزا چەكداری هەیە، هەكە هەبیت، چ پێدڤی ب میلیشیا دكەت؟ ئایا دبیت حوكمەت بێژیت بۆخوە پاراستنێ پێدڤی ب میلیشیایە؟كو نەخێر پێدڤی پێ نینە، بەلكو میلیشیا رێگرن ئیراق پێش بكەڤیت و دەولەت ل بن گەفێن میلیشیێن بەرەیێ موقاوەمە ناهێتە ئاڤاكرن، لەوما ئیراق یا بوویە ئەو دەولەتا شكەستن خواری».
دامەزرێنەرێ حزبا ئوممە یا ئیراقی سەبارەت پەیاما سەرۆك بارزانی كو ل كۆربەندێ مێپس ل دهۆكێ پێشكێشكری، دوپاتكر» پێشنیازا سەرۆك مەسعود بارزانی بۆ دانوستاندنێن ئاشتیێ و پاراستنا ئاشتییا جڤاكی و بەردەوامبوونا پڕۆسەیا سیاسی ل ئیراقێ، یا واقعی و فەلسەفی بوو و سەرۆك بارزانی دشێت چارەسەرییا كێشەیان بكەت و هەموویان كۆمڤەكەت، چونكە پەیاما وی بۆ هەموو ئالیێن سیاسی یێن ئیراقێ بوو».
