ئێكەتییا ئافرەتان هەڤپشكەكا سەرەكییە د گەشەپێدانا جڤاكەكێ مەدەنیدا
نێچیرڤان بارزانی، جێگرێ سەرۆكێ پارتی دیموكراتی كوردستان ل سالڤەگەڕا 72 یا دامەزراندنا ئێكەتییا ئافرەتێن كوردستانێ پەیامەكا پیرۆزباهیێ بەلاڤكر,
دوهی چارشەمبی 11/12/2024، نێچیرڤان بارزانی د پەیاما خوە دا راگەهاند» ل سالڤەگەڕا 72 یا دامەزراندنا وێ دا، گەرمترین پیرۆزباهییان پێشكێشی ئێكەتییا ئافرەتێن كوردستانێ دكەم، رۆلێ وێ یێ گرنگ د پێشڤەبرنا جڤاكی دا و ب هێزكرنا بهایێن ئێكسانیێ و دادپەروەریێ، بلند د هەلسەنگینم» .
ئاماژەكر ژی» ئێكەتییا ئافرەتێن كوردستانێ، هەر ژ دامەزراندنا خوە ل سالا 1952 هێمایا خەباتا نیشتمانی و كارێ بەردەوام بوو بۆ ب دەستڤەئینانا مافێن ئافرەتێ و ب هێزكرنا پێگەهێ وان ل هەموو وارێن ژیانێ دا».
گۆت ژی» د دەمێ خەباتا خوە یا دوور و درێژ دا، ئێكەتییا ئافرەتێن كوردستانێ سەلماند كو هەڤپشەكەكا سەرەكییە د گەشەپێدانا جڤاكێ مەدەنیدا، هەردەم ژێدەرا هێز و داهێنانێ بوو بۆ بەرگریكرنێ ژ مافان و مسۆگەركرنا پاشەڕۆژەكا باشتر بۆ ئافرەتێن كوردستانێ».
جێگرێ سەرۆكێ پارتی دوپاتكر ژی» ب ڤێ هەلكەفتێ ب رێزڤە رەنج و قوربانیدانا ئافرەتان و رۆلێ ئێكەتییا ئافرەتێن كوردستانێ دئینینە بیرا خوە و پشتەڤانییا خوە یا تمام بۆ كار و بزاڤێن وێ دكەین ژ پێخەمەت پاراستنا مافێن ئافرەتان و پەیداكرنا جڤاكەكێ پێشكەفتی ل سەر بنەمایێ ئێكسانیێ و دادپەروەریێ، دوپات دكەین».
ل دوماهییا پەیاما خوە، نێچیرڤان بارزانی گۆت» سلاڤ ل هەموو ئافرەت و دایك و خووشكێن كوردستانێ كو ب دلسۆزانە خزمەتا گەل و وەلاتێ خوە دكەن، بلا ئەڤ هەلكەفتە هاندەرەك بیت بۆ بەردەوامبوون د كاركرنێ دا بۆ ب هێزكرنا رۆلێ ئافرەتان و ب دەستڤەئینانا هەموو ماف و داخوازیێن وان».
