ئەو چ ڤایرۆسە جارەکا دی ل چینێ بەلاڤبووی؟
ڤایروسێ مرۆڤی یێ هەناسەدانێ یێ بەرنیاس ب (HMPV) دبیتە ئەگەرێ هەودانا سیهان و بوریێن هەناسەدانێ و نهو گەلەکێ بەربەلاڤە ل گەلەک وەلاتان ل جیهانێ ب تایبەت ل چینێ.
چێدبیتن ڤایروسێ (HMPV) ببیتە ئەگەرێ هەودانەکا دژوار لدەڤ هندەک کەسان، ژوانا زارۆک و نوی بوویێن ساڤا و ئەو کەسێن دانعەمر و ئەوێن بەرگرییا لەشێ وان یا کێم.
ئەڤ ڤایروسە هاتیە دیتن ئێکەم جار ل سالا 2001 و رێژا تووشبوونێ هەرسال زێدەدبیت د وەرزێ زڤستانێدا.
نیشانێن تووشبوونێ:
نیشانێن نەخۆشیێ دیاردبن پشتی تووشبوونێ ب 3-6 رۆژان.
ب گشتی دبیتە ئەگەر بو بەلاڤبوونا نیشانێن پەرسیڤی (سەرمابوون)، ل رەوشێن (حالەت) دژوار دا: حەرارەت و تا، لەشئێشان، کۆخک ، هەناسەدانەکا بلەز (بێهنتەنگی).
چاوانییا بەلاڤبوونێ :
ڤایروس دهێتە دناف لەشیدا ب رێکا چاڤا و دفنێ و دەڤی، ب شێوەیەکێ ساناهی دناڤ هەوای دا بەلاڤە دبیتن ب رێکا دلوپێن ئێشهەلگر (تووشبووی).
چێدبیتن بهێتە ڤەگوهاستن بۆ تە و زارۆکێ تە ب رێکا بێهنژین وکۆخینا کەسێ تووشبووی ل نێزیکی وە. هەروەسا ب شێوەیەکی راستەوخو وەک دەستگرتن (چوونا دەستان) (handshaking).
چارەسەری:
تانهو چ دەرمانێن دژە ڤایروسی نەهاتینە دروستکرن وباراپتر بەرگریا لەشی ڤایروسی پیچ دکەت.
رێکێن خوپاراستنێ:
تا نهو چ ڤاکسین دژی ڤایروسی نەهاتینە دروست کرن.
ئەڤ رەوشتێن رۆژانە یێن ژیانێ دبیت هاریکارییا نەهێلانا ڤەگوهاستنا ڤایروسی بکەن:
گەلەک شوویشتنا دەستان.
* خوپاراستن ژ تووشبوونێ ب ڤایروسی ب رێکا گرتنا دەڤ و دفنان لدەمێ بێهنژینێ یان کووخینێ.
*کێمکرنا تێکەلییا زاروکی دگەل کەسێن تووشبووی ب پەرسیڤ و تایێ.
* پاراستنا پاقژییا ژینگەها دەوروبەر.
* کلینسێن بکارهاتی دڤێتن ئێکسەر بهینە هاڤێتن.
* بەشدارینەکرنا کەرەستێن خارنێ و ڤەخارنێ دگەل کەسێ.
* دوورکەتن ژ جگارەکێشانێ.
ئەم بەردەوام شیرەت دکەین ب راوێژکارییا نۆشدارێ تایبەتمەند بو زانینا باشترین رێکێن خۆپاراستنێ بو زاروکێ تە ژ ڤایروسی و نە پشتگوهاڤێتنا نەساخیێ. دگەل داخازیێن مە بو ساخلەمییەکا بەردەوام.
