ڕێژەیا80 ٪ یا پلانا پڕۆژەیێن باتیفا هاتیە بجهئینان
زاخۆ، دلۆڤان هالۆ:
پشتی باتیفا بوویە قەزا ب دەهان پڕۆژەیێن خزمەتگۆزاری بۆ خەلكێ دەڤەرێ هاتینە بجهئینان و گرنگی ب گەلەك كەرتێن جۆراوجۆر هاتیە دان و چەندین ڕێڤەبەریێن نوو هاتینە ڤەكرن و هندەك بنگەهـ ژی بووینە ڕێڤەبەری، ڕێڤەبرنا مامەلەیێن وەلاتیان ژی ب ساناهی بوویە.
هەجەر سالح، خودانێ دوكانەكێ یە ل قەزا باتیفا بۆ ڕۆژناما ئەڤرۆ دیار كر، پشتی باتیفا بوویە قەزا و ئەڤ پڕۆژەیێن خزمەتگۆزاری كەفتینە د خزمەتا خەلكێ دەڤەرا مە دا ب تایبەت هەر دوو پڕۆژەیێن دروستكرنا جووتسایدی و گەشتوگۆزارێ، كارێ مە باشتر بوویە، چونكی هاتنا خەلكێ زێدەتر بوویە و گەشتیارێن بیانی ژی پتر قەستا مە دكەن، لەوما سۆپاسیا كابینا نەهێ یا حكومەتێ دكەین بۆ پێشكێشكرنا ڤان پڕۆژەیان بۆ دەڤەرا مە، هیڤیدارین د كابینا نوو یا حكومەتێ دا پڕۆژەیێن زێدەتر و باشتر ل دەڤەرا مە بهێنە ڤەكرن».
شێروان محەمەد، ئێك ژ وەلاتیێن دەڤەرێ یە دبێژیت:» جهێ خۆشحالیا مەیە گەلەك پڕۆژەیێن خزمەتگۆزاری یێن باش ل دەڤەرا مە هاتینە ڤەكرن، ڕێڤەبرنا مامەلەیێن مە ب ساناهی بووینە، بەری باتیفا ببیتە قەزا ل دادگەهێ حەفتیێ ب تنێ ڕۆژەكێ دەوام هەبوو، لێ نوكە هەر پێنج ڕۆژان دەوام یا لێ هەی».
فەرهاد مەحموود، قائیمقاێ قەزا باتیفا گۆت:»پشتی باتیفا بوویە قەزا چەندین پڕۆژەیێن خزمەتگۆزاری وەكو پڕۆژەیێن ئاڤێ و جووتسایدی و نەخۆشخانێ و ڕێك و كارەبا گۆندان لێ هاتینە بجهئینان و تا نوكە ڕێژا 80٪ یا پلانا پڕۆژەیێن قەزا باتیفا هاتیە بجهئینان، ڕێژا مایی ژی یا د وارێ بجهئینانێ دا».
