كورد بڕیـارا خوە بدەن
پشتی ژناڤچوونا رژێما بەشاری و لاوازبوونا گرۆپێن چەكدار یێن سەر ب ئیرانێ هیلالا شیعی كو ب سالانە ئیرانێ كار بۆ دكر دربەكا مەزن یا خواری و نها ئیران ب هەموو رەنگەكێ كار بۆ ڤێ یەكێ دكەت دا نەهێلیت پێگەهێ وێ ل ئیراقێ لاواز بیت، د سەرەدانا ڤێ دووماهیێ یا سودانی بۆ ئیرانێ دا ژی دەركەفت كو ئیران بەرهەڤ نینە و نەڤێت ژی دەستان ژ پشتەڤانیا حەشدا شەعبی بەردەت، لێ د هەمان دەمی دا گرۆپێن حەشدا شەعبی پشتی گەفێن ئەمریكا و ئسرائیلێ خوە بێدەنگ كرینە و چالاكیێن خوە ل دژی ئەمریكا و هەڤپەیمانێن وێ داینە راگرتن، ئەو یەك ژی نیشا ددەت حەشدا شەعبی ئەو هێزا جاران نەمایە و نها پتر ژ هەر دەمەكێ هەست ب مەترسیەكا مەزن ل سەر پێگەهێ خوە دكەن.
د دەمەكێ وەسا دا ئێك ژ دوژمنێن سەرەكی یێن هەرێما كوردستانێ كو چەند سال بوون ب موشەك و درۆنان ئێرشی هەولێرێ دكرن لاواز بوویە، ئەو یەك ژی دەلیڤەیەكا دیرۆكی یە كو هەرێما كوردستانێ بشێت گەلەك داخوازیێن خوە ل سەر بەغدا فەرز بكەت، لێ ژ بۆ ڤێ یەكێ ژی گرنگە بەری هەر تشتەكێ هەموو هێزێن سیاسی یێن هەرێما كوردستانێ ل هەمبەر بەغدا ئێك دەنگ و ئێك هەلوەست بن، مخابن جارەكا دی هندەك كەس و هێز ل هەرێما كوردستانێ بووینە پارێزەرێن بەغدا و دژبەریا هەرێما كوردستانێ دكەن، ئەو یەك د دەمەكێ دایە كو ب هەموو رەنگەكێ بەغدا كار بۆ لاوازكرن و ژناڤبرنا هەرێما كوردستانێ دكەت، لێ هەكە كورد بشێن ڤێ دەلیڤەیا نها یا دیرۆكی باش بكار بینن دێ بەغدا یا نەچار بیت هەموو داخوازیێن كوردان قەبوول بكەت.
خالا دی یا گرنگ ل ئەمریكا سەردەمەك نوو دەستپێ دكەت و ترامپ دێ ب هەموو رەنگەكێ ل دژی ئیرانێ كار كەت، كەسێن كو ترامپی بۆ پۆستێن گرنگ یێن وەكو وەزارەتا دەرڤە و وەزارەتا بەرگریێ بەربژار كرینە بەحسێ گوهۆڕینا دەستهەلاتا نها یا ئیرانێ دكەن، بێگومان لاوازبوونا تەهرانێ ئانكۆ لاوازبوونا بەغدا و ئەو یەك ژی دێ وەسا كەت پێگەهێ كوردان ل ئاستێ ئێراقێ و هەتا رۆژهەلاتا ناڤین ژی گەلەك بهێز بیت، ڤێجا گرنگە كورد هەم ل هەرێما كوردستانێ و هەم ژی ل پارچەیێن دی خواندنەكا راست بۆ رەوشا نها بكەن و خوە بۆ هەر ئەگەرەكێ ژی بەرهەڤ بكەن.
د دووماهیێ دا من دڤێت بێژم كو پرسا مە ل گەل بەغدا تنێ مووچە و بۆدجە نینە، مە ئاریشەكا گەلەك مەزن ل گەل بەغدا هەیە كو ئەو ژی دەڤەرێن كوردستانی یێن دەرڤەیی ئیدارا هەرێما كوردستانێ نە كو ب سالانە بەغدا نەڤێت وێ ئاریشێ چارەسەر بكەت، ژ بەر ڤێ یەكێ ژی ئەوێن نها ل هەرێما كوردستانێ بووینە پارێزەرێن بەغدا دڤێت بەحسێ ڤێ راستیێ بكەن كا بۆچی هەتا نها بەغدا رازی نینە ماددەیا ١٤٠ یا دستوورێ ئێراقێ بهێتە بجهئینان، هەكە ڤێجارێ ل ئێراقێ گوهۆڕینەكا مەزن دروست بوو، دڤێت كورد رازی نەبن ئێدی بەغدا تنێ بەحسێ مووچە و بۆدجەی بكەت، دڤێت مەرجێ سەرەكی یێ كوردان بجهئینانا ماددەیێ ١٤٠ بیت، چونكی ب بجهئینانا وی ماددەیی دێ پێگەهێ كوردان ل ئێراقێ گەلەك بهێز كەڤیت، بەغدا و هێزێن شیعە ڤێ راستیێ باش دزانن و هەتا نها ژی ئەو یەك ل دژی كوردان بكار ئیناینە، لێ دەم هاتیە كورد ئێدی دەست ب قۆناغەكا نوو ل گەل بەغدا بكەن.
