ئەز پتر حەز ژ گۆتنا سترانێن فولکلۆری دکەم
هونەرمەندێ گەنج یێ باژێڕێ زاخۆ سەربەست زاخۆیی د دیدارەکێ دا بۆ ڕۆژناما ئەڤرۆ دیار کر کو حەزا من بۆ هونەرێ ستران گۆتنێ د تەمەنەکێ بچووك دا ل دەف من پەیدا بوو، ب تایبەت ل وی دەمێ کو ئەز ل گەل برایێ خوە یێ مۆزیکژەن دلشاد زاخۆیی بەردەوام د چوومە ئاهەنگ و شەهیانان و من گۆهداریا سترانێن هونەرمەندان دکر، لەوما ڕۆژ بۆ ڕۆژێ حەزا ستران گۆتنێ ل دەڤ من مەزنتر بوو.
ناڤهاتی ئاماژە ب وێ چەندێ ژی کر کو برایێ من ژ لایێ پەیڤان و مۆزیکێ ڤە گەلەك هاریکاریا من کریە و پشتەڤانێ من یێ بەردەوام هەر ئەوە، و دڤێت ڕۆلێ خێزانا خۆ ژی ل بەرچاڤ وەرگرم کو ئەو ژی گەلەك هاریکار و پشتەڤانێ کارێ منە.
گۆت ژی:»هونەر ناسنامە و ئامرازێ دانەنیاسین و پێشکەفتنا هەر وەلاتەکێ یە، و ب ڕێکا هونەری مرۆڤ دشێت فۆلکلورێ وەلاتێ خوە ب تایبەت سترانێن فۆلکلوری پیشانی جیهانێ بدەت، هەر چەندە ئەز حەز ژ هەمی سترانان دکەم لێ پتر حەز ژ گۆتنا سترانێن فۆلکلۆری دکەم».
زێدەتر ژی گۆت:»د نوکە دا ئەز ل وەلاتێ ئەلمانیا دژیم و ل ڤێرێ بەردەوام دچمە ئاهەنگ و شەهیانێن کوردان و ب ڤێ ڕێکێ خزمەتا هونەری دکەم، و د نوکە ژی دا ئەز مژوولی تۆمارکرنا سترانەکا هونەرمەند عەبدولواحد زاخۆیی مە، و ل دەمەکێ نێزیك دێ ل کەنالێ من یێ یۆتیوبی هێتە بەلاڤکرن».
