ل بن كەڤر و تڕاشان مە پەرتووكێن شۆڕەشێن جیهانـێ دخواندن
دیدار : رەمەزان دەشتمری/ زاخۆ
1 – 2
شۆڕەشا 26ێ گولانا پێشكەفتنخواز، د وارێ ڕیكخستن و پێگەهاندنا كادر و پێشمەرگەی دا ڕولەكێ كاریگەر و پێشكەفتی هەبی ، ئێك ژ بەرنامێ كاری یێ شوڕەشێ هاندانا كەسێن خواندەڤان دكرن , كو ب خواندنا پەرتوك و رێكا ڤەكرنا خولێن پێگەهاندنێ خوە پێبگەهینن و ل سەر بنیاتەكێ موكوم و پیلایی خەباتێ ل ناف شوڕەشێ بكن . فەرماندە لیوا ( عەلی موستەفا ) یێ ناسیار ب ( ئەبو زێرو ) بۆ ڕۆژنامەیا ئەڤرو دبێژت : ئەز ل سالا 1956ێ ل باژێڕێ زاخۆ ژدایكبیمە و ل ئامادەیا كشت و كالی ل باژێڕێ زاخۆ خواندنا خوە ب دووماهیك ئیناند و ل سالا 1977ێ، دناڤ ڕێزێن نهێنی یێن پارتی دیموكراتی كوردستان دا هاتم ڕێكخستن و ل وی دەمی دا ل ئامادەیا كشت و كالی ل زاخۆ ڤەژەنەكا باش یا ڕێكخستنا نهێنی یا پارتی دیموكراتی كوردستان پەیدابی و چەندین كار و چالاكی ژلایێ ئەندامێن پارتی ڤە دهاتنە ئەنجامدان و هەستا نەتەوەیی و نیشتمانپەروەری ل دناف چینا قوتابیان دا مە بەلاڤە دكرن . هەلبەت ل ئەوی دەمی هندەك قوتابیێن دەڤەرێن دیتر ژی وەكی باژێڕێ دهوك و هەولێر و سلێمانییێ ل ئامادەیا چاندنێ ل باژێرێ زاخو دا دگەلمە دخواندن ئەڤجا كادرێ شۆڕەشا گولانێ و بەرپرسێ ڕێكخراوا پێشمەرگەیی. لیوا عەلی موستەفا یێ ناسیار ب (ئەبو زێرو) دبێژت : ل هەیڤا چوار ل سالا 1981ێ من قەستا ناڤ ڕێزێن شۆڕەشا 26ێ گولانا پێشكەفتنخواز دا كر و ژبەر زیرەكی و خزمەتا من یا نهێینی ل ناف باژێڕێ زاخۆ و ب تایبەتی ل ئامادەیا چاندنێ ل زاخۆ ل سالا 1981ێ دگەل ڕێكخراوا شەهید حەجی قادو یا پێشمەرگەیی دا وەك كادرێ پارتی دەست ب كار بیم . و ل سالا 1982ێ بۆ ڕیكخراوا شەهید محەمەد سالح بوسەلی ئەوا سەر ب بارەگایێ لیژنا ناوچا زاخۆ ڤە هاتم ڤەگوهاستن . بەلێ ل سالا 1984ێ، جارەكا دیتر وەك كادر دگەل ڕیكخراوا عەین زالا یا سەر ب لیژنا ناوچا زاخۆ ڤە هاتم ڤەگوهاستن و ل سالا 1984ێ دیسان جارە كدی وەك كادر و جێگر دگەل ڕیكخراوا شەهید محەمەد تاهر بێشینكی دەست ب كاربیم و ئەركێ مە یێ پێشمەرگایەتییێ ل سنورێ دەڤەرا دهوكی هاتە دەستنیشانكرن و كەتین دئەركی خوە دا و هەروەسا ل سالا 1985ێ، ڕێكخراوەك ب ناڤێ ڕێكخراوا بابەگوڕگوڕ ل سنورێ لیژنا ناوچا دهوك هاتە ڤەكرن و ئەز ژی وەك بەرپرسێ ئەڤێ ڕێكخراوێ هاتم دەست نیشانكرن و دەست ب كاربیم بەلێ ل دەمێ ل سالا 1987ێ حكومەتا عیراقێ هێلا سور دناڤبەرا شۆڕەشێ دەینایێ و چەندین جاران هێرشێن عەسكەری بۆ سەر دەڤەرێ ئیناندی و گەلەك گوند هاتنە سوتن و كاڤلكرن . ژ بۆ بەرسینگرتنا ئەڤان هێرشێن حكومەتا ئیراقێ بڕیار هات دان , كو چەند بارەگایێن پێشمەرگەیی ل دەڤەرێ هاتن ڤەكرن و چاڤدێریا دەڤەرێ ب باشی د هاتە كرن و هەیڤا هەشت ئەركێ ڕێكخراوا مە ل گوندێ زێوكا عەبویی بی و ل دەمێ ئەنفالا ڕەش هەتا ڕۆژا 25/8/1988ێ، ئەركێ ڕێكخراوا مە یا بابەگوڕگوڕ ل پشتا گوندێ زێوكا عەبو دا د ئەركیدا بین ژ بەر , كو ل ئەوی دەمێ حكومەتا عیراقێ هێلا سور دناڤبەرا دەڤەرێن ئازادكری ئەوێن ل ژێر دەستهەلاتا شۆڕەشێ دا دەینادبی و دەم بۆ دەمی عەسكەرێ حكومەتا عیراقێ هێرشێن چەكداری و گەفێن هێرشكرنێ بۆ سەر دەڤەرێن ئازادكری هەبین و هێزێن پێشمەرگەیی ل دەڤەرێ هاتبین دابەشكرن و ل بەرسینگا دوژمنی گرتبین بۆ هەر هێرەشا نەچاڤەڕێكری , كو وەك پێشمەرگە بەرسینگی لێ بگرین و بشكێنن و پاشدا ب زڤڕینین , بەلێ دەمێ فڕوكەیێن جەنگی یێن حكومەتا ئیراقێ ب چەكێ كێمیاوی دەڤەر كێمیابارانكری و ئەم نەچاربین دەڤەرێ ب جهـ ب هێلین و قەستا سەر سنوران بكین و ل ئەوی دەمی دا مالا مە ل بەر ئاڤا ڕوویبارێ خابیری ل پشتا گوندێ مێسكێ بی و دەمێ ئەز هاتیم بۆ مالێ من دیت مالێن مە ژی یێن هاتین چول كرن و خێزانا من ژی دگەل خەلكێ گوندێ یێن بۆ ناڤ دەڤەرا بەروارییا چووین و پشتی چەندەكێ ئەم ژی دەركەتین و ل دویڤرا من جارەك دی خێزان و زاروكێن خو ل گوندێ باز و بێلیزانێ دیتن و وەكی خەلكێ دەڤەرێ من ژی دەستێ خێزانا خوە گرت و زاڕوكێن خوە ژی ئیناندن و دگەل خەلكێ دەڤەرێ مە ڤێكرا بەرێخوەدا سەر سنوری و ل دەڤەرا بەروارییا و ل گوندێ تویلەرێ و گوندێ سەرەڕو و گوندێ ئورە دا دەربازی سنوری بین و پشتی ماوەیەكێ و بورینا چەند ڕۆژان حكومەتا توركیا یا وی سەردەمی خەلكێ مە یێن دەربەدەربین بۆ كەمپا ئامەدێ ئاكنجیكرن .هەروەسا بۆ ماوێ دوو هەیڤان ژی ئەو خەلكێ ئاوارەبی ل ناڤ چادراندا ل بەر چەمێ ئاڤا ڕویبارێ ئامەدێ ب جهكرن و پاشی حكومەتا توركیا ئەو خەلكە ژ كەمپا ب چادران هاتی دەیناندن بۆ شوڤەیان ل تەنشتا باژێرێ ئامەدێ ڤەگوهاستن و ل ناف ئەڤێ كەمپێ دا ژی لیژنەیەك بۆ ب ڕێڤەبرنا كار و ئەركێن ئەوی خەلكێ هاتە پێكئینان و ئەز ژی وەك ئەندامەكێ وێ لیژنێ بۆ كەمپا ئامەدێ دەستنیشان كرم و هەروەسا ل ئەوان سێ سالێن ئاوارەیێ دا ئەوێ خەلكێ دناڤ كەمپا تێل و سیمكری دا گەلەك ئەزیەت و نەخوشی برن و حكومەتا توركیا ژی دەم بۆ دەمی ئاستەنگ و ئاریشە بۆ خەلكێ ئاوارە بی چێكرن.
