ھۆزڤان زاھد: مه پێگیری ب ڕێنمایان كریه و سكالایا هه‌ولێرێ بێ به‌لگه‌یه
رەمەزان زەکەریا:
د داخۆیانیەکێ دا سەرپەرشتێ یانەیا ئاکرێ یا وەرزشی ئاشکراکر پشتی یاریا یانەیا ئاکرێ دگەل یانەیا ھەولێرێ ل چارچوڤێ یاریێن خولا نایابا کوردستانێ کو ژ یاریەکا پاشئێخستی بوو ژ گەرا دویێ و ئه‌نجامێ یاریێ د بەرژوەندیا یانەیا ئاکرێ ب دووماھی ھات بوو ب كۆله‌كێ بێ به‌رانبه‌ر، ژ نشكه‌كێ ڤه یانەیا ھەولێرێ سکالایەک دژی یانەیا ئاکرێ تۆمارکریە ب بوهانا نه پێگیری ب ڕێنمایێن هژماره‌یا یاریزانان دناڤ یاریگه‌هێ دا كو یانه‌یا ئاكرێ ل جهێ پێنج یاریزانێن پیشه‌كار شه‌ش یاریزان پشكدار كرینه.
زێدەتر ھۆزڤان زاھد بۆ ئەڤرۆ گۆت : یانەیا ھەولێر سکالا دژی یانەیا مه تۆمار کریە ب هێچه‌تا كو مه سه‌رپێچییا رێنمایان كرییه ب زێده‌تر ژ هژماره‌یا یاریزانێن پیشه‌كاریێن رێپێدایی بۆ یاریێ، لێ چو بەلگە ل بەردەست نینە و ھەموو بەلگێن راست و پێدڤی یێ ل بەر دەستێ یانەیا ئاکرێ وەک کارتا نیشتیمانی یا یاریزانێ ناڤبری ژ دایكبوویێ باژێرێ زاخۆیە ھەموو بەلگەنامێن وی یێن کەسی یێن زاخۆنە یانەیا ھەولێرێ بۆ وێ چەندێ خوساره‌تییا خۆ ڤەدشێریت ئەڤ چەندە کریە بھانە ئەگەر وان ئاریشەک ھەیە و بڤێت خوه ڤەکێشن ل خولا نایابا کوردستانێ وان چ بەلگەنامەیێن دروست نینە چاڤەرێ دکەین بریار بھێتە دان ل بەرژەوەندیا یانەیا ئاکرێ.
ناڤبری گۆت ژی: فدراسیۆنا فوتبۆلا کوردستانێ نەشێت چو بریارەکێ بێ بەلگە بدەت ژبەر کو ھەموو بەلگێن دروست ل بەر دەستێ وان ھەنە ئەو ئاگەھدارن ل سەر ھەموو بەلگەنامێن کەسی یێن یاریزانێ ناڤبری له‌وما ژی پێشبینی دكه‌ین سكالایا وان سه‌ر ناگریت.
هۆزه‌ڤان زاهد گۆت: ئەم پشت راستین ١٠٠٪ کو دێ فیدراسیۆنا فوتبۆلا کوردستانێ بریارێ ل بەرژەوەندیا یانەیا ئاکرێ دەت ل سەر سکالایا یانەیا ھەولێرێ و مه ل دووڤ رێنما و یاسایێ كار كرییه.
