ژبەركو ئەز هەلبەستم
خولۆد ئەلمعلا*
وەرگێران: زێرەڤان ئۆسێ
ئەسمانی دەلیڤەیا سپێدەیەكێ نە دا من
دا دگەل هەتاڤێ باخڤم
دەم حەزە
ئێستگەه بانگێ تنێبوونێ هەلددێرن
لڤێرێ بێهنەكە من دنیاسیت
لوێراهەنێ چیرۆكا منە
دلەكە من بجهدهێلیت.
ب درێزییا بیاڤان ئەزا هاتیم نڤیساندن
من سیبەر نینە
ل لەشەك ب دیرۆك دگەڕم
هشكاتیا بۆ نەئامادەبوونێ دزانیت
ڤەلەرزینا ئێكێ نەهات
چاڤ وەك ئێكن
ل دۆری من دەریایەكە سەردەچوونا خۆ هەلدگریت
بەندەرن تێرا من ناكەن
سەفەرەكا وەستیاییە
چیرۆكا خۆ یا هەیی
ومن ژی چیرۆكا خۆ یا هەیی
چانتەنە من رادكێشن
و ل دەمێ دبیت زڤستان
ل سەر لیڤا هیڤییەكا نەئامادەبووی رادوەستم
وەغەرێ رادگەهینم
هەمی ترێن غەوارە دبن
د ئێستگەهێن ئەز دێ تێرا دەرباز بم
ئاماژەیێ پێدكەن
ئێستگەهێن دوماهیێ نە یێن منن
پەنجەرە باسی ئارامییەكێ دكەن ئەزا ژبیر كرم
ژ ڤارێبوونێ ئەز لكێمدانا خۆ كۆمڤەدكەم
و پەیادەیەك باسی نەئامادەبوویێ خۆ دكەت
ب ڤی رەنگی دێ بەندەمانا من ڤەكێشیت
ئەز دێ ل قورنەتەكی گەڕم من نە نیاسیت.
بۆچی گری ل دەمێ بارینا بارانێ من هەلدبژێریت
ئەز دێ دەست ب هژمارتنێ كەم
دەم نێزیكە و یێ دوور دكەڤیت
ئەز دێ خۆ ژ بیردانكا خۆ دەرئێخم
دێ دیرۆكا بۆ من ژ هزار سالان وەرە هاتی نڤیساندن شێلێنم
و ئەو نهێنیا ژ نەهامەتا من دەركەتی
چەند جاران سۆزا لێبۆرینا من دا
و من سۆزا تۆبەكرنێ بۆ دا.
دەفتەرێن خۆ ئاشكرا كەم
و دەربڕین
بۆ وییە یێ ترس وی دابقوتیت
ژبەركو من حەزكر
دێ ئەو بم یا ب رۆندك و ئەڤینیێ
و دوماهی گیرۆبوونێ هاتی راسپاردن.
فەلەك من بەرەڤ كناران ڤە دەبت
من بەرەڤ شینكاتیێ هەلدگریت
تژی ئەسمانێن من هاڤیبونەكا من دشكێنیت دكەت
گەمیێن من بەرزە دبن
چەند بیرا ڤەگەریانا من بۆ زاتێ من بهێت لبیرا من.
سوجدەیە.. باسێ من تێدایە
نڤێژە.. بلۆرێ بەرەڤ داویبوونا وێ دبەت
ئێكگرتی دبم
و جوانیا گەرماتیا خەمێ ئەگەر ئاشۆپێن مە بستەهی مە بوون.
ل سەر دەریایا ئەز دێمێ دایكا خۆ دنەقشینم
و دگەهم كنارێن قیامەتێ.
ئەزم یا ژ نهێنییێ زایی
پێیێن دەربازبوویان من نا نیاسن
و هۆربینیا دەمی دەبەنگە
دەمێ ئەز ب ژۆر گەردوونان دگەڤم نە یێن منن.
كی دێ یا ژمن مای كۆم كەت
ب دیرۆكا منڤە چیت؟
دێ رۆژكێ دگەل ئەسمانان هەڤرێ بم
دێ ب نڤێژەكا بۆ دێمەكێ ئەوێ سەرا من دای بدوای هێم.
دێ گریم،
هەتا كو گری ببیت خواندن
ودێ بمە دوماهی هەمبێزا ژێكڤەبوونێ.
• هەلبەستڤانەكا ئیماراتی یا ناڤدارە.
