رێژەیا 20% پارە ژ سندۆقا ئاڤەدانیا شنگالێ دێ بۆ وێ هێتە تەرخانكرن
دهوك، لەزگین
ئەندامەكێ پەرلەمانێ ئیراقێ ڕاگەهاند، ب ڕێژا 20% پارە ژ سندوقا ئاڤەدانیا شنگالێ بۆ شنگال دهێتە تەرخانكرن و ئەڤ رێژا پارەی گەلەك یا كێمە و گۆت: پتر ژ هزار خێزانێن ئاوارە ل ساڵا بەری دا چووینە شنگالێ، ل نێزیك دێ دەست ب تۆماركرنا ناڤێن ئاوارە بۆ زڤرینا شنگالێ هێتە كرن.
مەحما خەلیل، ئەندامێ پەرلەمانێ ئیراقێ راگەهاند، ل سەر داخوازیا مە سندوقا ئاڤەدانیا شنگالێ هاتیە دانان، لێ نوكە بوویە سندوقا ئاڤەدانیا زومار و دەشتا نەینەوا و شنگالێ، مە خواست ب تنێ بۆ شنگالێ بیت، ژبەركۆ شنگال گەلەك وێران بوویە و هێشتا خەلكێ شنگالێ نەهاتیە قەرەبووكرن و پرۆژە نینن، مە دڤێت سندوقا ئاڤەدانیا شنگالێ ب تنێ بۆ شنگالێ بیت.
د. ئەحمەد نازم ، ئەندامێ جڤاتا پارێزگەها نەینەوا دیاركر، هەتا نوكە حوكمەتا ئیراقێ ب باشی كۆنترۆل ل سەر شنگالێ نینە هێشتا گرۆپێن چەكدار دناڤ شنگالێدا ماینە و ئەڤە بوویە ئەگەر پتر زیان بگەهیتە خەلكێ شنگالێ.
د. ئەحمەد دووبەردانی، ئەندامێ جڤاتا پارێزگەها نەینەوا راگەهاند، هەتا نوكە رەوشا شنگالێ یا ئارام نینە و خەلكێ شنگالێ ژی بەردەوام داخوازا پرۆژان دكەت، لێ هێشتا حكوومەتا ئیراقێ ب باشی كۆنترۆل ل سەر شنگالێ نینە و گرۆپێن چەكدار ژ دەرڤەی ئیراقێ هاتینە ناڤ شنگالێدا، ئەڤە بوویە ئەگەر پتر زیان بگەهیتە خەلكێ شنگالێ و پێدڤیە گرۆپێن دەرڤەی یاسایێ شنگالێ چوول بكەن دا كۆ ئیدارا شەرعی بۆ دەڤەرا شنگالێ بزڤریت و خزمەتا خەلكی بهێتە كرن.
پیر دەیان پیر جەعفەر ، رێڤەبەرێ كۆچ و كۆچبەر و بەرسڤدانا قەیرانا ل پارێزگەها دهۆكێ راگەهاند، پتر ژ هەزار مالباتان ڤەگەریاینە وارێن خۆ، لێ هندەك ژ ئاواران پشتی چووینە شنگال پەشیمان بووینە و هندەك هەنە دیسا ڤەدگەرن كەمپان.
