پەرلەمانتارەك: 150 خێزانێن داعشێ ژ كەمپەكا ل سووریێ بۆ كەمپا جەدعە ل نەینەوا دێ هێنە ڤەگەڕاندن
لەزگین جوقی
ئەندامەكێ جڤاتا نوونەرێن ئیراقێ دیاركر 150 خێزانێن تێرۆرستێن داعشێ دێ ژ كەمپا (هۆلێ) ل سووریێ هێنە ڤەكەراندن بۆ كەمپا (جەدعە) ل نەینەوا وئەڤ خێزانێن داعشێ مەترسینە ل سەر خەلكی .
مەحما خەلیل ، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت» ب رێكا وەزارەتا كۆچ وكۆچبەرێن ئیراقێ خێزانێن داعش ژ كەمپا (هۆلێ) ل سووریێ دێ هێنە ڤەگەراندن بۆ كەمپا (جەدعە) ل نەینەوا كو وان خێزانێن داعش دەست د تاوانێن كوشتنێ ورەڤاندنا خەلكێ ئێزدی دا هەبوو و ڤەگەراندنا وان یاریكرنە ب هەستێن خەلكێ مە و ئەو خێزانێن داعش بۆمبەنە هەردەمێ دەلیڤەیا خوە دیت دێ پەقن».
مەمحمای گۆت ژی» وەزارەتا كۆچ وكۆچبەرێن ئیراقێ د كەیسا شنگالێ دا یا هاریكار نینە و ل شوونا هاریكارییا قوربانیێن جینۆسایدا شنگالێ بهێتە كرن بۆ زڤرینا وان بۆ جهێن وان یێن رەسەن ل شنگالێ، مخابن هاریكاریا خێزانێن تێرۆرستێن داعشێ دكەت و نوكە ئەو خێزانیێن داعش ژ كەمپا (هۆلێ) ل سووریێ بۆ ئیراقێ ب تایبەتێ بۆ پارێزگەها نەینەوا دهێنە ڤەگوهاستن وئەو خێزانیێن داعش هەموو مەترسینە ل سەر شنگالێ و پارێزگەها نەینەوا».
خویاكر ژی» پێدڤییە وەزارەتا كۆچ وكۆچبەرێن ئیراقێ رۆهنكرنەكێ ل سەر بابەتێ ڤەگەراندنا خێزانێن داعش بدەت كا چاوا وب چ رێكار ئەڤ خێزانێن تێرۆرستێن داعش ژ كەمپا (هۆلێ) بۆ كەمپا (جەدعە) ل نەینەوا دێ هێنە ڤەگوهاستن وچ فشارا نێڤدەولەتی ل سەر ئیراقێ هەیە كو ڤێ كارێ ئەنجام بدەت».
