ئدریس بارزانی كار ژ بۆ پێشڤە‌برنا پرسا كوردی دكر
زاخۆ، دلۆڤان هالۆ:
عومەر ئۆرەیی بەرپڕسێ لقێ 8 یێ پارتی دیموكراتی كوردستان د دیدارەكێ دا بۆ رۆژنامەیا (ئەڤرۆ) دیار كر كو بەری 38 سالان و ل رێككەفتی 31/1/1987، سەركردەیێ شۆڕەشگێڕ كاك «ئدریس بارزانی» مالئاڤاهی ل كورد و كوردستانێ كر، ب وەغەرا دوماهیێ یا كاك «ئدریس بارزانی» بزاڤا كوردایەتیێ ل سەر ئاستێ كوردستانا مەزن، سەركردەیەكێ خودان ئەزموون د بیاڤێ خەباتا شوڕەشگێڕی دا و سیاسەتڤانەكێ هشیار و لێزان و دووربین د بیاڤێ خەباتا سیاسی و دیپلۆماسیدا ژ دەستدا.
بەرپڕسێ لقێ 8 یێ پارتی، ئاماژە ب وێ چەندێ ژی كر كو كاك ئدریس بارزانی ل سەر دەستێ «بارزانیێ نەمر» ب بیروباوەرێن ئازادیخوازی و كوردایەتیێ هاتبوو پەروەردەكرن كو سیاسەتڤانەكێ هشیار و دووربین و خودان هزر بوو، و هەموو دەمان وەكو بیرمەندەكێ مەزن ب دیتن و دونیا دیتنەكا سەردەمیانە كار ژ بۆ پێشڤە‌برنا پرسا كوردی و خورتكرنا خەباتا نەتەوایەتی كرییە.
عومەر ئۆرەیی گۆت ژی:» كاك ئدریس بارزانی ب تێگەهشتنەكا لۆژیكی و ب فەلسەفا هزری و ب پشتەڤانییا سەرۆك «مەسعوود بارزانی» بەردەوام كار ژ بۆ وێ چەندێ دكر هێز و شیانێن كوردان د ئێك چەپەر دا ژ پێخەمەت خورتكرنا خەباتا نەتەوە‌یی كۆمڤە بكەت و دەستكەفتێن زێڕین ژی د ڤی واری دا ژ بۆ گەلێ كورد ب دەستڤەئیناینە، ژبەر ڤێ چەندێ ژی سەرۆك بارزانی د پەسنا كاك «ئیدریس بارزانی» دا دبێژیت:(كاك ئیدریس وێنەیەكێ پاك و بێگەردێ بارزانی بوو، هەموو سالۆخەتێن وی ل دەف وی كۆم ببوون)».
زێدەتر ژی گۆت:»د ڤێ هەلكەفتا خەمگین دا سەرێ ڕێز و حورمەتێ بۆ گیانێ پیرۆز یێ كاك «ئدریس بارزانی» و هەموو شەهیدێن كوردستانێ و سەر كاروانێ وان بارزانیێ نەمر دچەمینین».
