ئدریس بارزانی ئەندازیارێ بەرەیێ كوردستانی و ئاشتییا ناڤمالییا كوردان بوو
دیدار/ دلۆڤان ئاكرەیی:
ل سالڤەگەرا 38 یا وەغەركرنا ئدریس بارزانی یێ هەردەم ساخ، هەڤچەپەرێن وی ئاماژێ ب رۆلێ وی یێ دیار د شۆڕەشا كوردی دا دكەن و پێكڤە د گەل سەرۆك بارزانی هاریكارێن باش بوون بۆ بارزانیێ نەمر و ئاماژێ دكەن كو هەر چەندە ئدریس بارزانی ژییەكێ كێم بر بەلێ ژییەكێ پڕی دەستكەفت و سەربلندی بوو.
سەباح بەیتوللا، ئەندامێ كۆمیتەیا ناڤەندییا پارتی و هاریكارێ بەرپرسێ مەكتەبا رێكخستنا پارێزگەها دهۆكێ یا پارتی دیموكراتی كوردستان ل دۆر كەسایەتییا ئدریس بارزانی بۆ رۆژنامەیا (ئەڤرۆ) دیاركر، وێرەكی و فیداكاری و ڕاشكاوی خەسلەتێن هەڕە دیار یێن ئدریس بارزانی بوون ب شێوەیەكی كو خودانێ بڕیارا خوە بوو كو ب وێرەكی بڕیار د دا و بەرژەوەندییا گەلێ خوە ل بەرچاڤ دگرت و حیساب بۆ دوژمنا نەدكر، دوربینییا وی بۆ بابەتێن مەیدانا سیاسی و شروڤەكرنێن وی بۆ وان رێكا راست دەستنیشان دكر بۆ بیاڤێ خەبات و بەرخوەدانێ، بارێ گرانێ نەكسێ و ژیانا ئاوارەیێن چووینە ئیرانێ دگەل سەرۆك مەسعود بارزانی ب ملێ خوەڤە گرتبوو، شارەزاییا وی د دیرۆك و جوگرافییا كوردستانێ و دەوروبەر دا هەبوو و هێز و شیانێن دوژمنی باش دزانی و چەوا بەرسڤا وان بدەت د بیاڤێن (سیاسی- لەشكەری- ئەمنی- ئیداری- جڤاكی- پەیوەندییان)هەروەسا شارەزاییەكا باش هەبوو و پێكڤە دگەل سەرۆك مەسعود بارزانی ببوونە هاریكارێن گەلەك باش بۆ بارزانیێ نەمر.
هەروەسا ئاماژەكر كو ئدریسێ جوانەمەرگ كێم ژییا بەلێ ژییەكێ پڕ دەستكەفت و سەربلندی بر، لەوما هەتا هەتایێ دێ ل بیرا گەلێ كوردستانێ بیت .
عومەر عوسمان مێرگەسۆری، پێشمەرگێ دێرین و فەرماندەیێ گشتیێ هێزێن خەبات یا پێشمەرگێ كوردستانێ، سەبارەت خەباتا ئدریس بارزانی دیاركر، ئدریس بارزانی قوتابییەكێ ڕێبازا بارزانیێ نەمر بوو و كەسەكێ دیپلۆماسی و سەربازی و دیندار و رەوشەنبیر بوو و مینا قوتابخانەیەكێ قوتابیێن كوردپەروەر ئاڤا دكرن و د هەردو شۆڕەشاندا ژی هەڤكارەكێ باش بوو د گەل سەرۆك بارزانی كو خودان كەسایەتیێن كاریگەر و ب هێز بوون بۆ بارزانیێ.
رۆهنكر ژی، ئدریس بارزانی رۆلەكێ مەزن و ب هێز د ئیدارەكرنا شۆڕەشاندا هەبوو و ب رێكا تێكەلیێن خوە یێن چڤاكی نیڤا كاروبارێن شۆڕەشێ ب رێڤەدبڕن و دگەل سەرۆك بارزانی ب شەڤ و رۆژ بێ هەستكرن ب وەستییانێ كار و خەبات بۆ خزمەتكرنا وەلاتی و پێشمەرگەیان دكر و رۆلەكێ بەرچاڤ و مەزن هەبوو ل دەما بەرگریكرنێ ژ شۆڕەشێ و پاراستنا ئاخ و خەلكێ كوردستانێ و ئاوارەیاندا و سەرەرای هەبوونا گەلەك هێز و شیانان ل دەف دەستهەلاتدارێن بەرێ یێن ئێراقێ بەلێ ئدریس بارزانی چەندین داستان و سەركەفتن تۆمار كرینە و دوژمن ملكەچی رێككەڤتنان كریە مینا رێككەڤتنا 11 ێ ئادارێ و نەچاركرنا وێ دەستهەلاتێ ب دانپێدانكرنێ ب هند مافێن گەلێ كورد.
ئاماژەكر ژی، ئدریس بارزانی هەردەم خەبات ژ بۆ پاراستنا ناڤمالییا كوردان كریە تاكو چو ئاریشە و كێشە د ناڤا رێزێن كوردستانییاندا نەبن و وەكی ئەندازیار بۆ بەرەیێ كوردستانی و گەهشتن ب ئاشتییێ د ناڤا رێزێن پارتێن كوردی دا خەبات دكر.
غەریب یوسف مزیری، پێشمەرگەیێ هەردو شۆڕەشێن ئیلۆن و گولانێ و هەڤالێ نێزیك و هەڤچەپەرێ ئدریس بارزانی ل دۆر كەسایەتییا وی بۆ رۆژنامەیا (ئەڤرۆ) خویاكر، رەحمەتی ئدریس بارزانی كەسەك بوو ب دلفرەهی و ئەزمونداری و رەوشەنبیری رەفتار ل گەل ئالیێ بەرامبەر و خەلكی دكر و ب رێكا پەیوەندیێن خوە یێن چڤاكی دگەل خەلكی گەنگەشە و تێكەلیێن باش هەبوون و ب بێی سلاڤ ب رەخ كەسێدا نەدبووری هەتا هەكە ئەو كەس نەمیاسی ژی با رێز لێدگرت و ب بەردەوامی دەرگەهێن بارەگەهێ خوە ب ڤەكری دهێلان بۆ سەرەدانكرنا خەلكی دا گۆهدارییا خاست و بۆچوونێن وان بكەت و جودا ژ بارەگەهێ خوە ل مالا خوە ژی ل ئێڤاران و ل رۆژێن ئەینی د پێشوازییا خەلكیدا بوو و ب دلخوەشی و رووخوەشی پێشوازییا مێهڤانان دكر و ب شادی مێهڤان ل چڤاتا وی دەردكەفتن و هەردەم مل ب ملێ پێشمەرگەیێن كوردستانێ ب درێژییا مەهان ل چەپەران دما و بەرگری ژ ئاخا كوردستانێ و شۆڕەشێن ئیلۆن و گۆلانێ دكر.
