لاوازیا ئابۆری دبیتە ئەگەرێ هەلوەشاندنا خێزانێ
محەمەد عیماد بارزانی پارێزەرێ راوێژکار، بۆ رۆژناما ئەڤرۆ گۆت: (هەکە ئەم بەراوردیەکێ دناڤبەرا ئامارا سالا 2024 دگەل سالێن بوریدا بکەین، بەردانا هەڤژینان گەلەک زێدە بویە، ل هەموو پارێزگەهێن هەرێما کوردستانێ، بتایبەتی ل پارێزگەها هەولێرێ ژ هەموو پارێزگەهێن دی پترە).
پارێزەرێ ڕاوێژکار گۆتژی: (بەردانێ زور ئەگەر هەنە، ژ وان ژی نەگونجان، جیاوازیا تەمەنی، مایتێکرنا دەوروبەرا، سوشیال میدیا، نەزوکی و ئەگەرێن ئابوری و گەلەک ئەگەرێن دیتر…).
ژلایەکێ دیڤە، بەهرە حەمە ڕەش نڤیسەر و ڤەکۆلەرا جڤاکی دیار کر، ئەگەرێن جودابۆن و بەردانا دناڤبەرا هەڤژینان گەلەکن و حالەت گەل حالەتی جیاوازە و گۆت: (ئەو کەیسێن بەردەستێ مە هەین پتریا وان ژ ئەگەرێ لاوازیا بارێ ئابوری ژێکجودا بۆینە).
بەهرەیێ زێدەتر گۆت: (مخابن د جڤاکێ کوردەواری دا پشتی هەڤژین ژ ئێکودوو جودا دبن هەردوو لایەن کەربەکا زۆر ژ ئێکودوو هەلدگرن، بەروڤاژی وەلاتێن ئەوروپی ئەڤ تشتە دەف وان نینە و هەردوو لایەن پشتی بەردانێ ب شێوەیەکێ نورمال ژیانا خۆ دبورینن، لەوما پێدڤیە لسەر هەڤژینان پشتی جودابونێ ئێکودوو قەبیل بکەن و کەرب و کینێ ژ ئێکودوو نە ڕاکەن).
بەهرەیێ ئەو چەندە ژی دیار کر کو، بەری نۆکە رەوشا ئافرەتێ گەلەک یا خراب بو توندوتیژیەکا زۆر هەمبەر دهاتە کرن و ئەو بێدەنگ دما، لێ نۆکە سەردەم هاتیە گۆهۆڕین و ڕەوشا ئافرەتان باشترە و ل سەر مافێن خۆ دهێنە دەنگ و بزاڤێ بۆ وەرگرتنا مافێن خۆ دکەن و دەمێ زولم و توندوتیژی دگەل ژنێ دهێتە کرن خۆ بێدەنگ ناکەت بەلکو داخوازا بەردانێ دکەت.
