سەرۆک بارزانی دشێت رۆلەکێ کاریگەر بۆ ئاشتیێ ل تورکیا بگێریت
ئەندامەکێ پەرلەمانێ تورکیا دیار دکەت، ل تورکیا قۆناغەکا نوو دەستپێکریە، لێ روودانێن ل سووریێ و رۆژئاڤایێ کوردستانێ کاریگەریا خوە ل سەر قۆناغا نها ل تورکیا کرینە و ژ سەرۆک بارزانی دشێت بۆ ئاشتیێ و چارەسەرکرنا پرسا کوردی ل تورکیا رۆلەکێ مەزن بگێریت.
جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتی دیار کر، بەحسێ ڤێ یەکێ دهێتە کرن کو دێ عەبدوللا ئۆجەلان ل رۆژا ١٥ ڤێ مەهێ پەیامەکێ بەلاڤ کەت و دبیت پەیاما ئۆجەلانی ژی گەلەک یا گرنگ و دیرۆکی بیت و گۆت: (سەرۆکێ پەکەکێ وەسا دبینیت کو ئێدی سەردەمێ شەڕێ چەکداری نەمایە، ئەو وەسا دبینیت ئێدی پرسا کوردی ب شەڕی ناهێتە چارەسەرکرن و دڤێت قۆناغەکا نوو یا ئاشتیێ و چارەسەرکرنا پرسا کوردی ل تورکیا دەستپێ بکەت، ژ بۆ ڤێ یەکێ ژی ئەڤ دەمەکە شاندێ دەم پارتی سەرەدانا ئیمرالیێ کرن و ل گەل ئۆجەلانی هەڤدیتن کرن، نها هەموو کەس چاڤەرێ ڤێ یەکێ نە کا دێ پەیاما ڤێجارێ یا ئۆجەلانی چ بیت و گەلەک کەس چاڤەرێ ڤێ یەکێ نە ئۆجەلان د پەیاما خوە یا ڤێجارێ دا داخواز ژ پەکەکێ بکەت دەست ژ چەکی بەردەن).
سەبارەت ب رۆژئاڤایێ کوردستانێ ژی ناڤهاتی دیار کر، نها ل سووریێ قۆناغەکا نوو دەستپێکریە، ل وێرێ تنێ تورکیا و ئەحمەد شەرع نینن، تنێ کورد ژی نینن، بەلکو ئەڤرۆکە ل سووریێ رەوشەکا گەلەک جودا هەیە، ئەمریکی ل وێرێ هەنە، نها ئسرائیلێ ژی پێگەهەکێ بهێز ل سووریێ هەیە، ئانکۆ تنێ تورکیا و هەتا ئەمریکا ژی نەشێن ب تنێ بریارێ ل دۆر پاشەرۆژا سووریێ بدەن، ژ بەر ڤێ یەکێ ژی دڤێت د ئاستێ نێڤدەولەتی دا سەبارەت ب سووریێ هندەک رێککەفتنێن گرنگ و دیرۆکی بهێنە کرن و گۆت: (گەلەک کەس دبێژن دڤێت ئۆجەلان داخواز ژ هێزێن سووریا دیموکرات یان ژی یەپەگێ بکەت دا دەست ژ چەکی بەردەن، ئەو یەک دروست نینە و ئەز باوەرم ناکەم ئۆجەلان کارەکێ وەسا بکەت، بەلکو دڤێت کوردێن سووریێ بخوە بریارێ ل دۆر پاشەرۆژا خوە بدەن).
سەبارەت ب رۆلێ سەرۆک بارزانی ژ بۆ چارەسەرکرنا پرسا کوردی ل تورکیا ژی ئەندامێ پەرلەمانێ تورکیا دیار کر، بەری نها ژی سەرۆک بارزانی گەلەک بزاڤ کرینە کو دەولەتا تورکیا و پەکەکە دانوستاندنان بکەن و ئەم دزانین بەری چەندین سالان قۆناغەکا ئاشتیێ ل تورکیا دەستپێکر و رۆلێ سەرۆک مەسعود بارزانی ژی یێ بەرچاڤ بوو، لێ مخابن وی دەمی ئالۆزی دروست بوون و گۆت: (نها ل تورکیا قۆناغەکا نوو دەستپێکریە و ئەم ب باوەرین کو سەرۆک مەسعود بارزانی دشێت ژ بۆ ئاشتیێ و چارەسەرکرنا پرسا کوردی ل تورکیا رۆلەکێ کاریگەر بگێریت، کورد ل تورکیا و باکورێ کوردستانێ ژی وەسا دبینن ژ بۆ ئاشتیێ و چارەسەرکرنا پرسا کوردی رۆلێ هەرێما کوردستانێ ب تایبەتی ژی یێ جەنابێ سەرۆک بارزانی گەلەک گرنگە).
