ئەو یانەیا دبیتە قارەمان دێ سێ ملیۆن دۆلاران وەرگریت
قەیس وەیس:
تیما فوتبۆلا یانەیا دهۆك ب سەرفەرازی ژ باژێرێ قەتەر ڤەگەڕیا و دەربازبوونا خوە بۆ چارگۆشەیا زێرین مسۆگەر كر پشتی ب سەركەفتی ل سەر یانەیا ئەهلی سەنعا یا یەمەنی ب سێ گۆلێن پاقژ، د یارییا واندا ئەوا ل شەڤا سێ شەمبییا دەربازبووی ل یاریگەها یانەیا دحێل ل وەلاتێ قەتەر ژ چارچووڤەیێ گەڕا پێنجێ یا كۆما ئێكێ ژ قارەمانییا كۆپا كەنداڤی بۆ یانەیێن قارەمان یێن دەڤەرا كەنداڤی هاتیە كرن.
سێ گۆل و سێ خال
ئەلهۆیێن چیا ب باشترین ئاست شیا سێ گۆلان ل سەر یانەیا ئەهلی سەنعا بكەت ئەوێن ژلایێ یاریزانان بەیار ئەبۆبەكر، پیتەر گۆرگیس و یانیك زاكێر ڤە هاتینە تۆماركر و شیان جهێ خوە ل رێزا دویێ موكمتر لێبكەن ب كۆمكرنا هەشت خالان ژ دو سەركەفتن، دو وەكهەڤی و ئێك خوسارەتی هەبیت، ژلایێ خوەڤە تیما نەسر یا ئیماراتی ئەوا ل سەرێ لیستێ دهێت سەركەفت ل سەر یانەیا زەفار یا عومانی ب دو گۆلان بەرانبەر گۆلەكێ و خالێن خوە گەهاندنە 13 خالان، ب فەرمی هەردو یانەیێن ئێكێ و دویێ دەربازبوونە قۆناغا چارگۆشەیا زێرین و یانەیێن زەفار خودانا چار خالان ل رێزا سێیێ و ئەهلی سەنعا خودانا سێ خالان رێزا چارێ دەرباز نەبوون.
دهۆك دێ دگەل كێ یاریێ كەت؟
هەرچەندە تیما دهۆكێ یارییەكا مایی ژ چارچووڤەیێ قۆناغا كۆمان ئەوا بڕیارە ل 19ێ ڤێ مەهێ مێڤاندارییا زەفار یا عومانی بكەت یارییا خوە یا شەشێ و دووماهیێ ژ سیستەمێ كۆمان، لێ ئەنجامێ وێ چو گوهۆڕینێ نا ئێخیتە د رێزبەندییا دهۆكێ دا و وەكو خودانا رێزا دویێ دێ یارییا خوە یا چارگۆشەیا بەرانبەر یانەیا ئتیفاق یا سعۆدیێ كەت خودانا رێزا دویێ ژ كۆما دویێ كەت، شێوازێ وێ ژی هاتنۆچوونە، یارییا ئێكێ دێ ل سعۆدیێ بیت ل پێنجێ ئادارا بهێت و یا دویێ ل 12ێ هەمان مەهـ ل یاریگەها یانەیا دهۆكێ هێتە كرن.
هارۆن ئەحمەد: سەركەفتنەكا دیرۆكی و دەربازبوونەكا ژ هەژی بوو
كاپتنێ تیما یانەیا دهۆك هارۆن ئەحمەد كەیفخوەشیا خوە دیاركر ب سەركەفتنەكا ژی هەژی یا تیمێ و بۆ رۆژنامەیا ئەڤرۆ گۆت: پێخوەشحالین ئەم شیاین ب گەهینە چارگۆشەیا زێرین و دلێ جەماوەرێ خوە كەیفخوەش بكەین، ئەڤ سەركەفتنە یا دیرۆكی یە و دەربازبوونا مە ژی بۆ چارگۆشەیا زێرین یا ژ هەژی بوو، بەری یاریێ مە هەموو یاریزانان سۆزدا بوو بێ سەركەفتن ژ یاریگەهێ نە دەركەڤین، دەستخوەشییا هەموو یاریزانان و كادرێ ڕاهێنانێ دكەین و سۆپاسییا پشتەڤانێن خوە یێن بەرهەڤبووی دناڤ یاریگەهێ دا دكەین، ئەم ڕژدین بۆ قۆناغا بهێت باشتر خوە بەرهەڤبكەین و هزر د یارییا دووماهیێ ژی دا دكەین.
پاداشت و خەلاتێن قارەمانیێ
بۆ زانین قارەمانا كۆپا كەنداڤی دێ سێ ملیۆن دۆلاران وەرگریت، خودانا رێزا دویێ دێ بیتە خودانا خەلاتێ ئێك ملیۆن دۆلاران، باشترین یاریزانێ كۆپا دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
هەروەسان هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
