سەرۆكی جڤاتا پاریزگەها ئەنبار: ترەمپی پلان بۆ ئاكنجیكرنا ئێك ملیۆن فلستینییان ل ئەنبارێ یا هەی
سەرۆكێ جڤاتا رزگاركرنا ئەنبار، ئاشكراكر، ئەمریكا پلان یا هەی باژێرەكێ مەزن بۆ فلستینییان ل سنوورێ پارێزگەها ئەنبار بهێتە دروستكرن كو جهێ نێزیكی ئێك ملیۆن كەسان تێدا بیت و تێچوویێ وێ پڕۆسەیێ ژی 50 ملیار دۆلارن.
حەمید هایس، سەرۆكێ جڤاتا رزگاركرنا ئەنبار، د بەرنامەیەكێ تەلەڤزیۆنیدا ل كەنالێ( زاگرۆس عەرەبی) راگەهاند» ترەمپ كەسەكێ توندڕەوە، چ تشتێ بێژیت بجه دئینیت و كەس ژی نەشێت روو ب روویێ وی راوەستیت، نە ل ئیراقێ و نە ل چ جهەكێ دی، ئەوێن خوە ب وێ چەندێ دئیننە دەر كو دێ روو ب روویێ ترەمپی راوەستن، بلا هەر ژ نوكە خوە بێدەنگ بكەن».
حەمید هایسی باس ل وێ چەندێ ژی كر كو ترەمپی د خولا ئێكێ یا سەرۆكایەتییا خوە دا دناڤبەرا (2016- 2020) پلانا ئاكنجیكرنا ئاوارەیێن فلستینی ل بیابانێن ئەنبارێ هەبوو و گۆت» ئەڤە راستییە و پلان هەبوو ل سنوورێ پارێزگەها ئەنبار باژێرەكی بۆ فلستینییان دروست بكەن كو نێزیكی ئێك ملیۆن كەسان ب خوەڤە بگریت و تێچوویێ وێ پڕۆسەیێ 50 ملیار دۆلار بوون كو ب چەند قۆناغەكا د دەمێ 10 سالاندا بهێتە دروستكرن».
ب دیتنا سەرۆكێ جڤاتا رزگاركرنا ئەنبارێ ترەمپ دێ وێ پلانێ د ڤێ خولا خوە یا سەرۆكایەتیێدا بجهئینیت و گۆت» د ئەگەرەكیدا هەكە دەستهەلاتدارێن ئیراقێ رازی نەبن ب دروستكرنا وی باژێری، دڤێت ئیراق تێچووی د ستوویێ خوەڤە بگریت و ل جهەكێ دی بهێتە دروستكرن، ئەڤە ژی د پەیوەندیێن ئیراقێ و ئەمریكا دا یا هاتیە باسكرن».
