ئافرەتێن دهۆك ڤەگەڕیانە سەرێ لیستێ
پشتی ب دووماهی هاتنا یاریێن گەڕا دویێ ژ قۆناغا ئێكێ یا خولا فوتسالا كچێن كوردستانێ، تیما یانەیا ئافرەتێن دهۆك قارەمانا وەرزێ بوری ڤەگەڕیانە سەرێ لیستا كۆما خوە ب سەركەفتنەكا مەزن و كچێن زاخۆ دگەل مێڤانا خوە ب گۆلەكێ وەكهەڤ بوون د كۆما دویێ دا.
ل هۆلا گرتییا چالاكیێن وەرزشی تیما ئافرەتێن دهۆكێ ب حەفت گۆلان بێ بەرانبەر سەركەفتنەكا ژ هەژی ل سەر مێڤانا خوە یانەیا ڕواندز ئینا، گۆلێن دهۆكییان ژلایێ یاریزانێن وێ پێنج گۆل سیپەل شوكر و هەر ئێك ژ دەلال تالب و یوسرا ئیبراهیم گۆلەك تۆماركر، هەر ژ ڤێ كۆمێ یانەیا چەمچەمال ب حەفت گۆلان بەرانبەر گۆلەكێ سەركەفت ل سەر كۆیە، بڤان ئەنجامان، ئافرەتێن دهۆكێ ب شەش خالان ڤەگەڕیا سەرێ لیستێ، هەر ئێك ژ چەمچەمال و ڕواندوز ب سێ خالان رێزێن دویێ و سێیێ ل دووڤ ئێك هاتن و یانەیا كۆیە بێ خال رێزا چارێ دهێت.
ل دۆر ڤێ یاریێ پرژین جیهاد ئەنداما كارگێرییا یانەیا ئافرەتێن دهۆكێ بۆ رۆژنامەیا ئەڤرۆ گۆت: هەرچەندە تیما مە سەركەفتنەكا مەزن ئینایە، لێ هێشتا كاروانێ مە یێ درێژە هێشتا زوویە بەحسی یارییا دووماهیێ و كۆپا بكەین، لێ ئەم ڕژدین و ئێك ئارمانج مە و كادرێ راهێنانێ و یاریزانان یا هەیی ئەوژی بۆ هەر یارییەكێ بتنێ هزرا سەركەفتنان بكەین هەتا بگەهینە ناسناڤی و پاراستنا وێ، ئەركێ مە ب سانەهی نابیت لێ هیڤیێن مە ژی د مەزن ب پشتەڤانییا پارێزگارێ دهۆكێ گەشبینین بەر ب ئارمانجان، هەموو یاریزان ب مۆرالەكا بلند بەرهەڤن بۆ هەر یارییەكێ.
ژلایەكێ دووڤە كچێن یانەیا زاخۆ بەردەوامی دا وەكهەڤیێن خوە پشتی د ناڤ ئەرد و یاریگەها خوە دا دو خالێن دی ژ دەستداین ب وەكهەڤییا وێ بەرانبەر یانەیا سۆران ب گۆلەكێ، ژلایێ خوەڤە سیروانی هەلەبچە ب دو گۆلان بەرانبەر گۆلەكێ ب سەركەفت ل سەر ئافرەتێن هەولێرێ، بڤان ئەنجامان، سیروانی هەلەبچە ب شەش خالان سەرێ لیستێ دهێت، زاخۆ ب دو خالان رێزا دویێ، هەر ئێك ژ -ئافرەتێن سۆران و ئافرەتێن هەولێر ب خالەكێ رێزێن سێیێ و چارێ دهێن.
بڕیارە ل ئەینییا بهێت هەڤڕكیێن گەڕأ سێیێ بڤی شێوەیی بهێنە كرن، ژ كۆما ئێكێ ئافرەتێن دهۆكێ دێ بنە مێڤانێ، كۆیە، چەمچەمال دێ ڕواندوز مێڤان كەت، ژ كۆما دویێ كچێن زاخۆ دێ سیروانی هەلەبچە مێڤان كەت و ئافرەتێن هەولێر دێ بنە مێڤانێن ئافرەتێن سۆران.
