راستڤه‌كرنا قانوونا بارێ كه‌سی زیان هه‌نه
ب، سه‌رجان مەحمود:
ڤەکۆلەرەکا جڤاكی بۆ ڕۆژناما ئەڤرۆ دیار کر، راستڤه‌كرنا قانوونا بارێ كه‌سی ژلایێ په‌رله‌مانێ عێراقێ ڤه زیان هه‌نه بۆ تێكدانا جڤاكی و گۆت: مه‌ترسی هه‌یه خه‌لكێ هه‌رێما كوردستانێ بۆ تۆماركرنا هه‌ڤژینێن ژیێ وان بچووك بچنه دادگه‌هێن ده‌ڤه‌رێن كوردستانی و ب رێیا قانوونێ كارێ خۆ بكه‌ن.
بهار ره‌فیق، ڤەکۆلەرا جڤاكی گۆت: (ب دیتنا من راستڤه‌كرنا قانوونا بارێ كه‌سی ل عێراقێ پێنگاڤه‌كا مه‌ترسیداره، چونكه دێ كاریگه‌ریێن ئه‌ڤێ قانوونێ ده‌ركه‌ڤن و دێ دیار بیت کا چو زیان هه‌نه).
بهارێ د بەردەوامیا ئاخفتنێن خۆدا گۆت: (مه ئه‌زموون هه‌یه دگه‌ل باده‌كێن ته‌لاقێ و مه لیژنه‌یه‌كا ئاشتكرنا خێزانێ هه‌یه ل دادگه‌هێ ئه‌و كچێن د ته‌مه‌نه‌كێ بچووكدا دچنه دناڤا پرۆسا هه‌ڤژینیێ دا د سه‌ركه‌فتی نینن، چونكه شاره‌زایی نینه لدۆر پرۆسا هه‌ڤژینیێ).
ڤەکۆلەرا جڤاکی گۆتژی: (ب دیتنا من پێدڤیه مرۆڤی تێگه‌هشتن و به‌رنامه هه‌بن بۆ پرۆسا هه‌ڤژینیێ، مخابن ده‌مێ كچ د ته‌مه‌نه‌كێ بچووكدا دچیته دناڤا پرۆسا هه‌ڤژینیێ، به‌رپرسیاریێ نزانیت و تووشی ئاریشه‌یان دبیت).
بهارێ ڤەکۆلەرا جڤاکی ئەو چەندە ژی دیار کر، كچ هه‌تا هه‌ژده سالیێ زارۆك دهێته هژمارتن و ده‌مێ دچیته د پرۆسا هه‌ڤژینیێ دا به‌ری هه‌ژده سالیێ ئه‌ڤه جوره‌كێ توندوتیژیێ یه ل هەمبەر کچان دهێته كرن و گۆت: (ئێك ژ مه‌ترسیێن راستڤه‌كرنا قانوونێ ئه‌وە كچێ ماف هه‌یه د ته‌مه‌نێ 9 سالیێ دا پرۆسا هه‌ڤژینیێ پێك بینیت، ده‌مێ ئه‌و كچ دبیته دایك تشته‌كی نزانیت و شیانێن لەشی و ماددی نینن بۆ ب رێڤه‌برنا خێزانێ و په‌روه‌رده‌كرنا زارۆكان، ئه‌ڤه ژی دبیته ئه‌گه‌رێ په‌یدابوونا ئاریشه‌یان و حالەت هەبۆینە دەما کو دبیتە دایک دبێژیت ئه‌ز نه‌شێم زارۆكی خودان بكه‌م و من نەڤێت، ژبه‌ركو هێشتا ئه‌و دایك زارۆكه و دێ چاوا شێت زارۆكا خودان كه‌ت).
بهار ره‌فیق ئاماژه پێ كر کو ڕاستە قانوونا تایبه‌ت ب هه‌رێما كوردستانێ هه‌یه، به‌لێ مه‌ترسی هه‌یه خه‌لكێ هه‌رێما كوردستانێ ڤه‌گریت و گۆت: (بۆ نموونه مه قانوونا مه‌رجداركرنا فره‌ژنیێ هه‌یه، به‌لێ زه‌لام دچنه دادگه‌هێن ده‌رڤه‌ی ئیداره‌یا حوكمه‌تا هه‌رێما كوردستانێ بۆ تۆماركرنا گرێبه‌ستێن هه‌ڤژینا دوویێ، ئه‌ڤه‌ژی هه‌مان بابه‌ته و ئه‌گه‌ر كه‌سه‌كی بڤێت كچه‌كا زارۆك بده‌ته كه‌سه‌كی یان زه‌لامه‌ك كچه‌كا بچوویك مه‌هره بكه‌ت دشێت بچیته دادگه‌هێن ده‌رڤه‌ی ئیداره‌یا حوكمه‌تا هه‌رێما كوردستانێ و مه ژی چو ده‌ستهه‌لات نینه بۆ لێپرسینێ، چونكه ل دادگه‌هێن ده‌ڤه‌رێن ناڤه‌ڕاست و باشوورێ عێراقێ گرێبه‌ستا فه‌رمی بۆ دهێته كرن).
