هەبوونا گولان د مالدا خەمۆکیێ کێم دکەت
زاخۆ، دلۆڤان هالۆ:
ماموستایەکێ زانکۆیێ د دیدارەکێ دا بۆ ڕۆژناما ئەڤرۆ دیار کر کو هەبوونا گولێن سرۆشتی د مالدا فشارا دەروونی و خەمووکی و دوو دلیێ کێم دکه‌ت و گۆت: ڕەنگ و بێهنا وان یا زیندی ژینگەهه‌كا ئارام دروست دکەن و ڕێژا سۆزداریێ باشتر دکەن.
دکتۆر نەجمەدین نێروه‌یی، مامۆستایێ پشکا ژینگەهێ ل زانکۆیا زاخۆ و بسپۆرێ زانستێن ژینگەهێ، دیار کر، ڤه‌کۆلینان ئاشکرا کریە کو ئەو کەسێن گول و كه‌سكاتی ل دەوروبەرێن وان هه‌بن زویتر ژ نەخۆشییان چارەسەر دبن، ژبەرکو ئەڤ چەندە دبیتە ئەگەرێ دابەزینا پەستانا خوینێ و کێمبوونا لێدانا دلی و باشتربوونا ساخلەمیا گشتی و گۆت: (لەوما پێدڤییە خەلکێ مە گولان ل مالێن خوە بچینن و دگه‌ل ببنه هه‌ڤال، چونکی بەرکەفتن ب توخمێن سرۆشتی یێن وەکو گولان دشێن هاریكار بن بۆ پاقژكرنا دەروونی، ئەڤه ژی دبیتە ئاسانکاری ژ بۆ ئارامکرن و هزرکرنەکا ڕوون تر).
د. نەجمەددین نێروەیی گۆتژی: (گرنگیدان ب گولان د ناڤ مالێدا هاندەره‌كه بۆ هویربینی و بەرپرسیاره‌تیێ، ئاڤدان و بڕین و پاراستنا گولان دشێت چارەسەر و پاداشت بەخش بیت و کوالێتیا هەوای باشتر لێ بکه‌ت و گۆت: هنده‌ك گول و ڕووەك یێن هەین دشێن هەوایێ ناڤمالێ پاقژ بکەن ئه‌و ژی ب هەلمژینا ژەهران و زێده‌کرنا شه‌هێ و بەرهەمئینانا ئۆکسجینێ و بەخشینا گولان ژی دشێت هەستێ حەزژێکرن و سۆپاسگۆزاری و گرنگی پێدانێ زێدە بکەت).
دکتوری ئەو چەندە ژی دیار کر کو چەندین جۆرێن گولان وەکو یاسمین و لاڤاندەر بێهنه‌كا ئارامکەر هەیە کو دشێت هاریكار بیت بۆ کوالیتیا خەوه‌كا باشتر و دشێت داهێنان و بەرهەمئینانێ زێدە بکەت و جوانیا وان یا سرۆشتی ئیلهامان دبەخشیت و دشێت هاریکار بیت بۆ تەرکیزێ و گۆت: (گول جوانی و ڕەنگ و ژیانێ بۆ هەر فەزایەکێ بلند دکه‌ت، وەسا یا کاریگەرە کو مال هەست ب پێشوازی و زیندیبوونێ دکەت و ڕێكەکا کاریگەر بۆ دیکۆرێ مالێ هه‌یه).
