موسلم ئەحمەد 48 سالن د ناڤ جیهانا کەڤالان دا
زاخۆ، دلۆڤان هالۆ:
هونەرمەندێ شێوەکار یێ باژێڕێ زاخۆ موسلم ئەحمەد د دیدارەكێ دا بۆ ڕۆژناما ئەڤرۆ دیار كر كو ل سالا ١٩٨٤ێ ژ بۆ خواندنا هونەرێ شێوەکاری ل پەیمانگەها هونەرێن جوان بەرەڤ باژێڕێ سلێمانیێ ڤە چوویمە، پاشان ژبەر چەندین ئەگەرێن سیاسی ئەز چوومە باژێڕێ مووسل، من ل سالا خواندنێ ١٩٩٠ پەیمانگەها هونەرێن جوان ب دوماهیك ئینایە، بۆ دەمێ ٤٨ سالانە ئەز دناڤ جیهانا تابلوویان دامە و ب هزاران کارێن هونەری من ئەنجام داینە، وەكو پێشانگەهێن تایبەت یێن کەسایەتی، و پێشانگەهێن دوو قۆلی و پێشانگەهێن هەڤپشك و گەلەك كارێن دی یێن هونەری.
ناڤهاتی ئاماژە ب وێ چەندێ ژی كر كو هونەرێ شێوەکاری ل دەڤ من کارەکێ تاکە کەسی یە و ژیانەك خوەشە و ئەز خوەشیەكا تایبەت ژێ دبینم، چونکی هەمی کەسان شیانێن کارێ هونەری ل دەڤ نینە، دونیایەکا نوی یە بۆ من و دەمێ ئەز دچمە دناڤ جیهانا ڕەنگان و بابەتێن جۆراو جۆر دا خوەشیەکێ بۆ چاڤێن بینەران دورست دکەم، من چو جاران نەخوەشی ژ ڤی جۆرە هونەری نە دیتیە و عەشقا من ڕۆژ بۆ ڕۆژێ زێدەتر بوویە ژ بۆ هونەری، دەمێ نەخوەشیەك یان ئاستەنگەك ب سەر ژیانا من دا هاتبا ب ئەنجام دانا کارێ هونەری من ئەو نەخوەشی و ئاستەنگە ژ بیر دکرن، عاشقێ هونەرێ شێوەکاری چەند نەخوەشی و ئاستەنگ بۆ دروست ببن دەمێ دکەڤیتە دناڤ د جیهانا ڕەنگان دا هەمی نەخوەشی و ئاستەنگان ژ بیر دکەت».
گۆت ژی:» ل دەمێ كو ڕژێما بەعس ئەم وەكو بنەمال نەفی کرینە باشوورێ عێراقێ و ژ زاخۆ دوور کەڤتیم، من هزر دکر كو ئەز چاوا زاخۆ و کوردستانێ ببینم و هزرەك بۆ من چێبوو ب کارێ ڕەنگان ئەو کەرەستێن من ل زاخۆ دیتین من وێنە دکرن، ڕۆژ بۆ ڕۆژێ حەزا هونەرێ شێوەکاری ل دەڤ من زێدە بوو، تابلوویێن من دەربڕینێ ژ زۆلم و زۆرداریێ و نە دادپەروەریێ و سرۆشتێ کوردستانێ دکەن، شێوازێ من یێ هونەری تایبەتە ب کەسایەتیا من ڤە، هزرێن من بۆ تابلوویی د ئاشۆپینە بەلێ مفایی ژ واقعی ژی وەردگرم، تابلوویێن من هەمی کارێن زەیتینە ل سەر کانفاسی، هەمی ڕەنگ د تابلوویی دا ل دەڤ من گرنگن و پیتەیی ب هەمی جۆرێن ڕەنگان ددەم، دەمێ تابلوو دکەڤیتە بەرامبەری من وەکو خام من حەز ژێکرنەکا زێدە یا بۆ هەی، دەمێ ئەز کارەکێ ل دویڤ حەزا خوە دروست دکەم هەر وەکو من خوارنەکا خوەش خواری».
زێدەتر ژی گۆت:»چ هاریکاری ژ بۆ هونەرمەندێن شێوەکار نە هاتیە کرن ئەگەر هاتبیتە کرن ژی ڕێژا%١ ێ یە، هونەر یێ هاتیە پشت گۆهـ هاڤێتن ب تایبەت هونەرێ شێوەکاری ل دەڤەرا مە یا زاخۆ، چونکی ئاستێ هونەری ل زاخۆ بەرەڤ لاوازیێ ڤە دچیت ژبەر گرنگی پێ نە دانا جهێن پەیوەندیدار، هونەرمەندێن زاخۆ ب تبلێن دەستان دهێنە هژمارتن، لێ کارێ وان یێ هونەری گەلەك پێشکەڤتیە، مە حەز ژێکەرێن هونەری و جوانیێ گەلەك د کێمن و حەز ژ تشتێن بیانی دکەن ژبەر مەزناتیا خوە، ل وەلاتێ بیانی ڕەوشەنبیر و هونەرمەندان بهایەکێ باش یێ هەی چونکی ڕەوشەنبیر و هونەرمەند ئاڤاکەرێن پێشڤەچوونا ڕەوشەنبیریێ نە ل وەلاتێ خوە».
