ئالیێن دەرەكی و ناڤخوەیی داخوازیێن فەرمانبەران بۆ مەبەستێن خـوە ب كار دئینن
دەمێ چەند رۆژانە ل سنوورێ سلێمانیێ مانگرتنا هەژمارەكا فەرمانبەران دهێتە كرن، داخوازیێن رەوا یێن فەرمانبەر و تەخ و چینێن هەرێما كوردستانێ هەردەم ل خشتەیێ كارێن بەراهیێ یێن حوكمەتا هەرێما كوردستانێ دانە و ژ پێخەمەت وێ چەندێ ژی ب بەردەوامی ل گەل حوكمەتا فیدرال ل بەغدایێ كار بۆ ب دەستڤەئینانا وان هاتیە كرن و هەتا رادەیەكێ باش بەر ب پێشڤەچوون یا هەی. ب هەماهەنگی ل گەل بەغدا د بزاڤا چارەسەركرنا بابەتێن هەلاویستێ نە.
ئەوا جهێ هەلوەستێ، كۆمەكا كەس و ئالیێن دەرەكی و ناڤخوەیی ل ئیراقێ دخوازن ڤان داخوازییان بۆ مەبەستێن خوە یێن ب گۆمان بكاربینن و هندەك ئالیێن پاشگۆ، ئالیێن ژ دەرڤەی قانوونێ، پەكەكە و كەسێن دی مفای ژ وێ دەلیڤەیێ وەرگرن و نیاز یا هەی بۆ تێكدانا ئاسایشا دەڤەرێن دی یێن هەرێمێ بكاربینن و ب ڤێ چەندێ ژی داخوازیێن رەوا یێن فەرمانبەران تێكهەلی مەرەمێن خوە بكەن. سەرەرای رێزگرتنێ ل مافێن خوەنیشاندەران، هەر بزاڤەك بۆ تێكدانا ئاسایشا هەرێما كوردستانێ بهێتە كرن دێ رێگری لێ هێتە كرن و هەر بزاڤەكا ژ دەرڤەی قانوونێ و رێنمایان بیت رێك پێ ناهیتە دان.
