هـەلوەستێ فرەنسا دبیتە جهێ دلـخوەشیا کـوردێن رۆژئاڤایێ کـوردستانێ
ئیمانوێل ماکرۆن سەرۆکێ فرەنسا سەبارەت ب پاشەرۆژا سووریێ و هەلوەستێ فرەنسا ل پاریسێ بۆ دەزگەهێ راگەهاندنێ دیار کر، ئەو وەکو فرەنسا داخواز دکەن سووریێ ببیتە فیدرالی و کورد ژی ب رەنگەکێ ئەکتیف د سیستەمێ نوو یێ سووریێ دا پشکدار بن و وەکو فرەنسا ئەو پشتەڤانیێ ل مافێن رەوا یێن گەلێ کورد ل سووریێ دکەن، هەروەسا هێزێن سووریا دیموکرات ژی د شەڕێ ل دژی داعشێ دا گەلەک قوربانی داینە و وەکو فرەنسا ئەو دێ ب هەموو رەنگەکێ پشتەڤانیێ ل هەسەدێ کەن و گۆت: (من داخواز ژ ئەحمەد شەرع کریە سەرەدانا فرەنسا بکەت و بێگومان دێ داخواز ژێ کەم پرسێن هەی ل گەل کوردان چارەسەر بکەت، چونکی هەتا دەستهەلاتا نوو پرسێن هەی ل گەل کوردان چارەسەر نەکەت نەشێت پشتەڤانیا وەلاتێن ئێکەتیا ئۆرۆپا بدەستڤە بینیت و گەلەک یا گرنگە دەستهەلاتا نها یا سووریێ وانەیێن پێدڤی ژ دیرۆکا چەندین سالێن بۆری یا سووریێ وەربگریت و ب رەنگەکێ راست کار بۆ چارەسەرکرنا پرسێن نها یێن ل سووریێ بکەت).
کوردێن رۆژئاڤایێ کوردستانێ ژی دلخوەشیا خوە ل هەمبەر پشتەڤانیا فرەنسا یا بۆ مافێن کوردان ل سووریێ دیار دکەن و ب دەهان چالاکڤانێن سیاسی و جڤاکی ل رۆژئاڤایێ کوردستانێ و سووریێ ب رەنگێن جودا جودا دیار کرن کو هەلوەستێ سەرۆکێ فرەنسا جهێ دلخوەشیێ یە و بێگومان پشتەڤانیا فرەنسا یا بۆ کوردان ل سووریێ گەلەک گرنگە، چونکی تورکیا دڤێت ب هەر رەنگێ هەی نەهێلیت کورد ل سووریێ بگەهنە مافێن خوە و نها تورکیا گەلەک ئاستەنگان دروست دکەت، هەکە تورکیا نەبیت دەستهەلاتا شامێ دێ ل گەل رێڤەبەریا خوەسەر دانوستاندنان کەت، لێ مخابن هەلوەستێ خراب یێ تورکیا وەسا کریە، دەستهەلاتا ئەحمەد شەرع ژی هندەک مەرج بۆ کوردان داناینە کو ئەو یەک ب چو رەنگەکێ ناهێتە قەبوول کرن.
وەلاتیێن رۆژئاڤایێ کوردستانێ وەسا دبینن هەکە ئەمریکا، فرەنسا، بریتانیا، ئەلمانیا و وەلاتێن دی یێن هەڤپەیمانیا شەڕێ ل دژی داعشێ فشارێن خوە ل سەر تورکیا زێدە بکەن دێ تورکیا نەچار بیت دەست ژ سیاسەتا خوە یا خراب ل هەمبەر کوردێن سووریێ بەردەت، لێ هەکە هەلوەستێ ئەمریکا نەرم بیت یان ژی ژ بۆ هندەک بەرژەوەندیان ئەمریکا هێزێن خوە ژ سووریێ ڤەکێشیت ئەو یەک دشێت ببیتە ئەگەرێ روودانا کارەساتێن گەلەک مەزن، چونکی تورکیا بەرهەڤیان دکەت و چاڤەرێی ڤەکێشانا هێزێن ئەمریکا یە، هەکە هێزێن ئەمریکا ل سووریێ نەمینن دێ ئەمریکا ئێرشی رۆژئاڤایێ کوردستانێ کەت.
