ئەڤرۆ ئەلهۆیێن چیا دێ زەفارا عومانی مێڤان كەن
چاڤەڕێ دهێتە كرن ئەڤرۆ ل دەمژمێر حەفتی شەڤ تیما فوتبۆلا یانەیا دهۆك یارییا خوە یا شەشێ و دووماهیێ ژ كۆما ئێكێ كو دبیتە یارییا سێیێ ژ قۆناغا دویێ یا قارەمانییا كۆپا كەنداڤی بۆ یانەیێن قارەمان یێن دەڤەرا كەنداڤی ئەوا دێ ل یاریگەها دهۆك یا نێڤدەولەتی هێتە كرن كو دهێتە پێشبینیكرن زێدەتری 20 هزار ژ جەماوەرێ دهۆكێ بەرهەڤی یاریێ بن، هەر ئەڤرۆ بڕیارە دهەمان دەمدا یانەیا یانەیا نەسر یا ئیماراتی مێڤاندارییا یانەیا ئەهلی سەنعا یا یەمەنی بكەت.
چو مەترسی ل سەر ئەلهۆیێن چیا نینن
ل یاریگەها خوە و دناڤ جەماوەرێ دلسۆز دا تیما یانەیا دهۆك وەكو نوونەرا ئێكانە یا ئیراقێ و كوردستانێ دێ یانەیا زەفار یا عومانی د یارییەكێ دا چو مەترسیی ل سەر دهۆكییان نابن ئەوێن د گەڕا بۆری دا شیایین دەربازبوونا خوە بۆ چارگۆشەیا زێرین وەكو تیما دویێ مسۆگەر بكەن، ل رێزا دویێ دهێت ب هەشت خالان ژ دو سەركەفتنان بەرانبەر یانەیا ئەهلی سەنعا و دو وەكهەڤییان دگەل نەسر و زەفار، هەروەسان ئێك خوسارەتی دگەل نەسر دایە، یارییا ئەڤرۆ چو گڤاشتن ل سەر ئەلهۆیێن چیا نابن و دێ بیتە دەلیڤە بۆ سەربازێن مەسعۆد میرالی خوسارەتییا د خولێ دا بەرانبەر ئەلقاسم ژبیر بكەن و ڤەگەڕینە ئاست و ئەنجامێن خوە یێن جاران.
یانەیێن دەربازبووی و هەلوەستێ گشتی
د كۆما ئێكێ دا یانەیا نەسر یا ئیماراتی ب كۆمكرنا 13 خالان سەرێ لیستێ دهێت، دهۆك ب هەشت خالان رێزا دویێ كو هەردو تیما دەربازبوونا خوە بۆ چارگۆشەیا زێرین مسۆگەر كرییە، هەردو یانەیێن زەفار یا عومانی و ئەهلی سەنعا یا یەمەنی ل رێزێن سێیێ ب چار خال و چارێ ب سێ خالان ل دووڤ ئێك دهێن، د كۆما دویێ دا یانەیا ئتیفاف یا سعۆدیێ رێزا ئێكێ دهێت 12 خالان، قادسیە یا كۆێتی ب هەشت خالان رێزا دویێ ب هەشت خالان، ریفاعی یا بەحرەینی ب حەفت خال و عەرەبی یا قەتەری ب ئێك خال رێزا چارێ و دووماهیێ دهێت.
تیمێن دەربازبووی و ژڤانێ چارگۆشەیا زێرین.
بەری ب دووماهی هاتنا یاریێن گەڕا شەشێ هەر سێ یانەیێن هەردو كۆما دەربازبوونا خوە بۆ چارگۆشەییا زێرین مسۆگەر كرییە، بڕیارە ئەڤرۆ یانەیا چارێ ژ كۆما دویێ پلێتا دەربازبوونێ مسۆگەر بكەت، ژڤانێ یاریێن چارگۆشەیا زێرین دێ بڤی شێوەیی بن، گەڕا ئێكێ چوون، چارشەمبییا چارێ ئادارا بهێت یانەیا نەسر دێ دگەل خودانا پلێتا رێزا دویێ یا كۆما دویێ كەت، ل پێنجێ ئادارێ یانەیا دهۆكێ دێ بەر ب وەلاتێ سعۆدیێ چیت و یارییا خوە یا چارگۆشەیا زێرین و بەری دووماهیییا قارەمانیێ بیتە مێڤانا یانەیا ئیتفاق یا سعۆدیی، گەڕا دویێ هاتن، نەسر و تیما بەرانبەر وێ دێ ل 11ێ ئادارێ كەن، ل12ێ هەمان مەهـ یانەیا دهۆك دێ مێڤاندارییا ئیتفاق كەت ژبۆ ئێكلاكرنا دو تیمێن دەربازبووی بۆ یارییا دووماهیێ، یاریێن دووماهیێ دێ ل هەشتی و 15ێ نیسانا بهێت هێنە ئەنجامدان.
مەسعۆد میرال دبیت ب پێكهاتیێ سەرەكی بكەت
ڕاهێنەرێ تیما یانەیا دهۆك مەسعۆد میرالی دێ پشت گەرمیێ ب كۆمەكا یاریزانێن خوە كەت تایبەت ئەوێن د یاریێن بۆری دا ئاستێن مەزن نیشان دایی و دێ كار ل سەر ڤەگەڕاندنا دەرۆنێ یاریزانان كەت پشتی خوسارەتییا نە چاڤەڕێ كری یا حەفتییا بۆری دگەل ئەلقاسم ژ خولا ستێرێن ئیراقێ و زێدەتر دێ هزر د ڤان یاریزانان دا هێتە كرن پێكهاتینە ژ، گۆلپارێز، محەمەد سەلاح ئەوێ د سێ یاریێن بۆری دا باشترین ئاست نیشان دایی و ئەسیست هەبووینە، هەروەسان بەرەڤانێن خوە بەیار ئەبۆبەكر، لۆكاس مۆسێس، سیابەند عەگید و محەمەد سەعید كو بووینە دیوارێ ب هێز یێن تیمێ، هەر دیسان هێلا ناڤین ب سەركێشییا ئەندازیارێ دناڤ یاریگەهێ دا هارون ئەحمەد، زانا عەلی، ئاكۆ، یانیك زاكێری و رۆبێن ئەكۆا، پێنەڤێت هێلا هێرشبرنێ ژی هێزا كۆژەكە بۆ تیما بەرانبەر كو پێكهاتینە ژ پیتەر گۆرگیس و كەریم دەرویش كو دبیتە هێزەكا كۆم و خودان شیان دناڤا یاریگەهێ دا.
سەرپەرشتێ تیمێ گەشبینە
ل دۆر دووماهی بەرهەڤیێن تیما دهۆكێ بەرانبەر زەفار یا عومانی جاسم محەمەد حاجی بۆ رۆژنامەیا ئەڤرۆ گۆت: یارییا ئەڤرۆ دێ لاپەرەكێ دی یێ هەڤڕكییان بیت و ڤەگەڕیانا دەرۆن و مۆرالا یاریزانان بیت، هەرچەندە دەربازبوونا خوە بۆ چارگۆشەیا زێرین مسۆگەر كرییە لێ ب هیچ ڕەنگەكی ئەم سستاهێ د یاریێ دا نا كەین و هەموو یاریزان دڤێت پێگیربن ب ئامۆژگاری و پلانێن كادرێ ڕاهێنانێ، چاڤەڕێ هاتنا جەماوەرێ دلسۆز یێ یانەیێ نە ژبۆ بلندكرنا مۆرالا یاریزان و پشتەڤانیێ و گەشبینن دێ یارییەكا خوەش بیت و تیما مە ئەنجامەكێ سەركەفتی ئینن سەرباری تیما زەفار ئێك ژ تیمێن بهێزە و چو ئۆمێدێن دەربازبوونێ نە ماینە لەوما ئەو ژی دێ یارییەكا ڤەكری و بێ گڤاشتن یاریێ كەن.
شرۆڤەكارەكێ وەرزشی بۆچوونا خوە هەبوو
ژلایێ خوەڤە وەحید رەشید شرۆڤەكارێ وەرزشی ل پارێزگەها دهۆكێ و ڕاهێنەرێ بەرنیاس یێ یارییا فوتبۆلێ بۆ رۆژنامەیا ئەڤرۆ گۆت: د كۆپا كەنداڤی دا هەلوەست و كاودانێن تیما دهۆكێ د باش ب مۆرالەكا بلندن ژبەركو دەربازبوونا خوە مسۆگەر كرییە، لێ دبیت خواندنا ڕاهێنەری بۆ وێ یەكێ بیت ئەو خەلەتی و كێماسیێن د یارییا بۆری یا دگەل ئەلقاسم دا دناڤ یاریگەهێ دا چارەسەربكەت و زێدەتر یاریزانی بۆ یاریێن داهاتی بەرهەڤ بیت ژلایێ دەرۆنی و تەكتیكی، تیما زەفار ژی دێ هێتە دناڤ یاریێ دا بێ هیچ گڤاشتنەك ل سەر هەبیت ژبەركو دەلیڤەیا دەربازبوونێ ژ دەستدایە بتنێ دێ بزاڤێ كەت بۆ سەركەفتنێ پێخەمەت باشتركرنا رێزبەندییا خوە ل سێیێ، ئەڤ یارییە ڕێكەكا دییە بۆ ڕاهێنەری كو دەلیڤێ بدەتە هەموو یاریزانان ئەو دەمێ پێدڤی بیت.
حەمەد ئەلحبسی: سەرباری دەرباز نەبووینە لێ یاریێ ب سڤكی نا وەرگرین
د داخویانیەكا رۆژنامەڤانی دا حەمەد ئەلحبسی یاریزانێ تیما یانەیا زەفار گۆت: بمخابنی ڤە یارییا ئەڤرۆ چو ژ هەلوەستێ مە نا گوهۆڕیت و مە پلێت یا ژ دەستدایی، ب چەند خەلەتیێن كۆژەك مە شەش خالێن سانەهی ژ دەستدان، سەرباری دەربازنەبووینە قۆناغا پێش دووماهیێ لێ یارییا ئەڤرۆ ب سڤكاتی نا وەرگرین و دێ هەتا دووماهی چركە یاریێ بۆ سەركەفتنێ كەین، تیما دهۆكێ ئێك ژ هێزترین یانەیێن دكۆپا كەنداڤی دانە و رەوشەكا نوو دا كۆپایێ.
چەند یانە پشكداربوون و شێواز چەوا بڕێڤەدچوو
ل دووڤ سیستەمێ قارەمانیێ هەشت یانەیێن وەلاتێن كەنداڤی پشكداری قارەمانیێ بووین و هاتینە بەلاڤكرن ل سەر دو كۆمان، یاریێن وان ب شێوازێ خول و سیستەمێ دو قۆناغ دهاتنە ئەنجامدان، بڕیارە یارییا دووماهیێ بشێوەیی هاتنۆچوون دناڤبەرا هەردو یانەیێن دووماهیێ بهێتە كرن ل هەشت و15ێ نیسانا بهێت، كۆما ئێكێ پێكهاتییە ژ: دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی، كۆما دویێ پێكهاتییە ژ: عەرەبی یا قەتەری، ئیتفاق یا سعۆدیێ، ریفاع یا بەخرێنی، قادسییە یا كۆێتی.
خەلاتێن بوها گران هاتینە دان
بۆ زانین خودانا ناسناڤێ قارەمانییا كۆپا كەنداڤی دێ سێ ملیۆن دۆلاران وەرگریت وەكو خەلاتكرن، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ قارەمانیێ دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
ژلایەكێ دووڤە بۆ هەر یانەكا پشكدار سێ هزار دۆلار بۆ دهێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان دهەر یارییەكا د كۆمێ دا هاتییە كرن و هەر یانەیەكا سەركەفتنێ بینت سیهـ هزار دۆلار وەردگریت.
