حەزژێكرنا ڤی سەردەمی دەم بوراندنە
دلۆڤان هالۆ:
نڤیسەر ئەمین ئەحمەد، دیار كر كو ڤیان تشتەكێ سرۆشتییە د دەروونێ مرۆڤاندا و ڤیانا مرۆڤان هەمەجۆرە و ل دووڤ بەرژەوەندی و سرۆشتێ كەسایەتیا وان دهێتە گۆهوڕین و گۆت: چونكی دبیت ئەز حەز ژ كەسەكێ بكەم لێ تو حەز ژێ نەكەی، یان بەرۆڤاژی ئەز حەز ژ كەسەكێ نەكەم لێ تو حەز ژێ بكەی.
ئەمین گۆتژی: گەلەك جاران هندەك كەس بناڤێ ڤیان و حەزژێكرنێ كارێن خراب و كرێت ئەنجام ددەن، مخابن ئەڤ جۆرێ ڤیان و حەزژێكرنێ د ڤی سەردەمی دا گەلەك یا مشە بوویی و چارەسەریا وێ ژی یا ب زەحمەتە.
نڤیسەری دا زانین کو گەلەك جۆرێن ڤیانێ یێن هەین و ئێك ژ وان جۆران ئەوە كو ڤیانا جوانیا كەسێ بەرامبەرە د دلێ مرۆڤی دا پەیدا دبیت كو ژبەر جوانیا سیمایی حەز ژ كەسەكێ دكەت و ئەڤە ژی ڤیانەكە ژیێ وێ یێ كورتە و پەیوەندیەكا دروست ل سەر ناهێتە ئاڤاكرن وگۆت: بێگۆمان ئەڤ جۆرێ ڤیانێ ژ كەڤندا و هەتا نوكە ل هەموو جهان و ل دەف گەلەك كەسان هەیە، هەروەسان ڤیانا عەقلی كو مرۆڤ حەز ژ كەسەكێ بكەت ژبەر عەقلێ وی یێ تەمام و هزر و بیر و بۆچۆنێن وی یێن جوان”.
ئەمین ئەحمەد، د بەردەوامیا ئاخفتنێن خۆدا دیار کر، جۆرەكێ دی یێ ڤیانێ ئەوە كو ڤیانا ڕۆحێ یە كو مرۆڤ بێی هەبوونا سالوخەتێن سەرڤەیی و ژناڤدا حەز ژ كەسەكێ بكەت، لێ ئەڤ حەزژێكرنە گەلەك یا كێمە، چونكی بەهرا پتریا ڤیان و حەزژێكرنا ڤی سەردەمی بتنێ دەم بوراندنە و دووماهیكا وێ نابیتە گەهشتن و پێكئینانا ژیانا هەڤژینیێو گۆت: لەوما بدیتنا من باشترین و بهێزترین جۆرێ ڤیان و حەزژێكرنێ ئەوە یا كو پشتی پێكئینانا ژیانا هەڤژینیێ دناڤبەرا زەلامی و هەڤژینا وی دا پەیدا دبیت”.
