هەر کەسێ پارەی بدەتە خوازۆکان گونەهکارە
هیلین سالم:
دیاردا خازوکیێ د جڤاکی دا ب شێوەیەکێ بەرچاڤ بەربەلاڤ بۆیە، ب تایبەت دناڤ بازاری و ل سەر جادەیان، ئەڤ دیاردە بویە جهێ دلگرانیێ بو خەلکی، ژبەرکو خازوک گەلەک جارا خەلکی نەچار دکەن پارا بدەنێ.
لدور بابەتی بەرپرسێ راگەهاندنا پولیسێن پارێزگەها دهوکێ موقەدم هێمن سلێمان بو روژناما ئەڤرو دیار کر، خازوکی دیاردەکا جیهانی یە، لێ مروڤ دشێت سنوردار بکەت، پۆلیسێن دهوکێ حەتا رادەکی سنور بو داناینە و گۆت: بلا خەلک وەسا هزر نەکەن کو پۆلیسا ئاگەهـ ژێ نینە، چونکە روژانە خازوک دهێنە گرتن و هەکە روژانە نەهێنە گرتن نوکە دا رێژا وان هێشتا پتر بیت، لێ بەردەوام دهێنە گرتن و سکالا بەردەوام لسەر دایک و بابێن وان دهێنە تومار کرن.
موقەدمی گۆتژی: ئەوێن ژیێ وا دبن ١٨ سالیێ دا لدویڤ یاسایا چاڤدێریا سنێلان دهێنە دەستەسەر کرن، هندەک جارا باندەک لپشت ڤان خازوکان هەیە و سنێلە و کەسێن نەساخ بو خو بکاردئینن و هەبوینە ب ترومبێلان خازوک ژ دەرڤەی باژێرێ ئیناینە و بکارئیناینە.
لدور هەمان بابەت، مەلا جیهاد بێسفکی سەروکێ ئێکەتیا زانایێن ئایینێ ئیسلامێ لقا دهوک بۆ روژناما ئەڤرۆ دیار کر، ئایینێ پیروزێ ئیسلامێ قەدرەکێ مەزن یێ دایە بەنی ئادەمی، لەوما چێنابیت بەنی ئادەم نەفسا خو رەزیل بکەت، پێغەمبەرێ مە محمد سلاڤێن خودێ لسەر بن دبێژیت “نابیت خودان باوەر نەفسا خو ریسوا و زەلیل بکەت، و د فەرمودەیەکا دیدا دبێژیت دەستێ بلند ئەوێ پارا ددەت بخێرترە ژ وی دەستی یێ وەردگریت” و گۆت: ئەڤە ژی وێ چەندێ دگەهینیت کو پێدڤیە مروڤ ژ وان کەسان نەبیت یێن دەستێ خو لبەر خەلکی درێژ دکەن.
مەلای د بەردەوامیا ئاخفتنێن خۆدا دیار کر کو نوکە ل گەلەک وەلاتان تایبەت یێن عەرەبی و روژهەلاتا ناڤین خازوکی بویە دیاردە و خەلکەکی بو خو کریە کار، ل کوردستانێ ژی هندەک یێ زاروک و ژنان فرێدکەن خازوکیێ بکەن ئەڤەژی گونەهەکا مەزنە، هەکە ژدل کەسەک یێ هەژارە و پێدڤی ب هاریکاریێ یە خێرخواز د مشەنە و رێڤەبەریێن چاڤدێری یێن هەین ئەڤە دشێن هاریکاریا هەژاران بکەن لێ خازوکا خازوکی بو خو کریە کارەک بو ب دەستڤەئینانا ژیارێ و ئەڤە ژ گونەهێت مەزنە و گۆت: پێغەمبەرێ ئیسلامێ دبێژیت روژا قیامەتێ هندەک کەس دێ ئێن و گوشتێ ناڤچاڤێن وان یێ هاتیە خارێ دێ پسیار کەن ئەڤە کینە؟ دێ بێژن ئەڤە ئەون یێن خاستن دکر.
مەلا جیهاد گۆتژی: گەلەک جارا دێ بینین ئێکێ هەی ژدل پێڤە بوون دێ پارەکی دەتە ڤان کەسا ئەم پشتەڤانیا ڤان کەسان ناکەین، بەروڤاژی هەروەکی تو پەلەکا ئاگری ددەیێ و ئەڤ خازوکە پتر فێری خواستنێ و بەتالیێ دبیت و پتر چاڤێ وی دمینیتە ل خەلکی، لەوما مروڤ یێ گونەهکارە دەمێ پارەی ددەتە ڤان خازوکا، هەکە مروڤی دڤێت هاریکاریا کەسەکێ وەسا بکەت مروڤ دشێت ناڤ و نیشانێن وی ژێ وەرگریت و بدەتە ئالیێن پەیوەندیدار ئەو دێ هاریکاریا وان کەن.
کەهی محەمەد عەلی، دکاندارە، بو کرینا کەلوپەلێن دکانا خو سەرەدانا بازاری دکەت بو روژناما ئەڤرو گوت: دەمێ خازوک مروڤی ل بازاری دبینن ئێکسەر دهێنە بەر سینگێ مروڤی و ب هێجەتا پاریێ خوارنێ داخوازا پارا دکەن و ئەم نزانین بدرستی کی یێ پێدڤییە و کی درەوا دکەت، لبەر مە یا بەرزە بوی و نزانین چ بکەین.
