هێشتا دراما ل دەف مە نەبوویە پیشە كو مرۆڤ بشێت پێ بژیت
سندس سالح سلێڤانەیی:
ئەكتەرێ بەرنیاس (سیروان گۆیی) د دیدارەكێ دا بۆ رۆژنامەیا ئەڤرۆ گۆت: ل سالا 2007 دەمێ ئەز قوتابی ل پەیمانگەها هونەرێن جوان من دەست ب كارێ شانۆیێ كر، پاشان بەر ب دوبلاژێ ڤە چووم و وەك دوبلێر من پشكداری د هژمارەكا فلم و زنجیرەیان دا كریە، هەروەسا وەك سەرپەرشت ژی من كاركریە و ل 2018 بەر ب درامایێ ڤە چووم و دێ یێ بەردەوامبم.
هەروەسا گۆت: چنكو شانۆ هونەرەكێ زیندی یە و ئەكتەر ب شێوەیەكێ زیندی بەرامبەر بینەران دراوەستیێت، لەورا كارتێكرنا خوە هەبوویە و هەتا نوكە ژی هندەك ژوان شانۆگەریان د بیردانكا مندا ماینە، هەروەسا گەلەك درامایێن ڤێ دووماهیێ هندەك رۆل یێن بووینە پشكەك د ژیانا منا رۆژانە دا، بۆ زانین كاركرن د ب‌وارێ هونەری دا ب شێوەیەكێ ئەكادیمی گەلەك باشترە، ژبەر هندێ من پەیمانگەه و ئاداب دراما یێن ب دووماهی ئیناین و گەلەك جاران دەرهێنەران رۆل داینە من، بۆ نموونە رۆلێ مرۆڤەكێ دین، یان یێ زەنگین، یان هەر كەسەكێ دی بیت ئەز یێ چوویمە بازاڕی یان هەر جهەكێ دی بیت دا كەسەكێ وەسا ببینم و بشێم مفای ژی وەربگرم دا بشێم ب دروستی ب وی رۆلی راببم، لێ هێشتا ل دەف مە دراما نەبوویە پیشە كو مرۆڤ بشێت پێ بژیت، دەربارەی ئاستەنگان ژی ئەوە سالانە گەلەك كێم بەرهەم دهێنە چێكرن، ئانكو نەوەكو پارێزگەهێن دی یان دەڤەرێن دی یە، بۆ پاشەرۆژێ ژی مە گەلەك پلان هەنە، لێ داخوازا من ژ جهێن شۆلەژێ ئەوە بهێن باشتر خوە ل هونەرمەندان بكەنە خودان دا بەرهەمێن بهێز چێكەن و مە ژ درامایێن بیانی دوور بكەن، چنكو ئەو دراما ل گەل رەوشت و كلتۆرێ مە ناگونجن و ل دووماهیێ داخوازێ ژ قوتاببێن پەیمانگەهی و ئاداب دراما دكەم كو بهێن كاربكەن و شیانێن خوە دیاربكەن.
