سزایێ ڕەڤاندنا کەسەکێ دبن ژیێ 18 سالیێ دژوارترە
بێوار حەمدی:
پارێزەرەکی بۆ ڕۆژناما ئەڤرۆ دیار کر کو ڕەڤاندن ب هەر شێوەیەکێ بیت ژلایێ یاسایێ ڤە تاوانە و گۆت: بەلێ هەکە ژیێ وی کەسێ دهێتە ڕەڤاندن لبن 18 سالیێ دا بیت ل وی دەمی سزایێ تاوانبارێ پترە.
پارێزەر موئەیەد دوسکی د دیدارەکێ دا بۆ ڕۆژناما ئەڤرۆ دیار کر کو لدووڤ یاسایا عیراقێ یا ژمارە (111) د ماددێ 421 هەتا 427 بەحسێ هەموو حالەتێن تاوانێن ڕەڤاندنێ کریە ب هەر شێوەیەکێ بیت و گۆت: (هەکە ئەو کەسێ هاتیە ڕەڤاندن زارۆک بیت و لبن ژیێ هەژدە سالیێ بیت بێگۆمان دێ سزایێ تاوانباری پتر بیت، بەلێ دادگەھ لدووڤ حالەتی دێ بڕیارا سزای لسەر دەت).
پارێزەری د بەردەوامیا ئاخفتنێن خۆدا دیار کر، هەکە کەسەک ب شێوێ سەردابرن یان فێل بهێتە ڕەڤاندن، ئەڤجا کەسەک بتنێ بڕەڤینیت یان ژی ب هاریکاریا هندەک هەڤالا یان چەند کەسەکان ڤێ تاوانێ ئەنجام بدەت، ئەڤە دێ بیتە تاوان و گۆت: (تاوانا وی زیندانە کو ژ پێنج سالان دەسپێدکەت و ڕەنگە بگەهیتە سزایێ هەتا هەتایێ و جاران ژی حالەت هەنە سزایێ وان دگەهیتە سێدارەدانێ).
پارێزەر موئەیەد دوسکی ئەو چەندە ژی دا زانین کو گەلەک حالەتێن ڕەڤاندنێ هەنە و هەر ئێک ژ وان جورە سزایەکی بخۆڤە دگریت، لێ ب شێوەیەکێ گشتی ئەو حالەتێن کۆ بێی حەزا کەسی بیت و بناڤێ ڕەڤاندن بیت ب هەموو شێوەیان دبیتە سزا و گۆت: (ئەڤجا چ کچ بیت یان ژی کۆڕ و بێگۆمان هەکە بابەتێ تۆندوتیژیێ و ئێشاندنێ یان دەستدرێژیێ دگەلدا بیت ل وی دەمی دێ سزا گەلەک پتر بیت).
