مەزنترین بەنداڤا ئاڤێ ل سنۆرێ پارێزگەها دهۆكێ دهێتە چێكرن
سندس سالح سلێڤانەیی:
رێڤەبەرێ بەنداڤا دهۆكێ ئاشكراكر، د پلان دایە مەزنترین بەنداڤ ل سنۆرێ پارێزگەها دهۆكێ بهێتە چێكرن، ئەو ژی دێ ل دەڤەرا (باكرمان) بیت و دەربارەی رێژەیا ئاڤێ ژی د سكرێ دهۆكێ دا گۆت: هەر چەندە هەتا نوكە وەكو پێدڤی باران نەبارایە، لێ مە ئاڤا كۆمكری یا د سكری دا هەی و ئەم پێشبینی دكەین د هەیڤا سێ دا رێژەیەكا باشتر یا بارانان بهێت.
فەرهاد محەمەد تاهر رێڤەبەرێ بەنداڤا دهۆكێ بۆ رۆژناما ئەڤرۆ گۆت: راستە نەهاتن یان گیربوونا بارانان د ئەڤ سالەدا كارتێكرنا خوە ل سەر بەنداڤا دهۆكێ و هەموو بەنداڤێن دی هەیە، لێ دڤێت ژبیرنەكەین كو د ئادارا سالا بۆری رێژەیەكا گەلەك باشا بارانێ باری و د د دەمێ (24) دەمژمێران دا گەهشتە (150) ملیمان و ب ڤێ چەندێ رێژەیەكا باشا ئاڤێ د سكری دا هاتە كۆمكرن، ئانكو راستە هەتا نوكە باران گەلەك كێم یێن هاتین، لێ مە ئاڤا كۆمكری یا د سكری دا هەی، هەروەسا ئەم پێشبینی دكەین د هەردو هەیڤێن بهێت دا (ئادارێ و نیسانێ) هێشتا باران بهێت، چونكو هێشتا دەمێ وێ یێ مای.
هەروەسا گۆت: ل دووڤ داتایێن ل بەر دەستپێن مە، د (38) سالێن بۆری دا پتریا سالان ل هەیڤێن ئێك و دو و سێ باران باریە، لەورا ئەم دگەشبینین د دو هەیڤێن بهێن دا پتر بەفر و باران ببارن و رێژەیا ئاڤا كۆمكری ل سكرێ دهۆكێ و هەموو سكرێن دی زێدەتر لێ بهێت، دەربارەی سكرێ (خنس) ژی رێژەیا ئاڤا كۆمكری یا باشە، چونكو ئەو سكر دكەڤیتە سەر رۆباری و وەكی مە گۆتی بۆ هەیڤێن دو و سێ ژی دەلیڤەیێن بارینێ دێ باشتر بن.
ل دووماهیێ رێڤەبەرێ بەنداڤا دهۆكێ گۆت: د پلانێ دا بوو دو سكرێن دی بهێنە چێكرن، لێ دیاربوو ئەو كۆمپانیێن جێبەجێكار نەشیان چێكەن، لەورا بزاڤ دهێتە كرن وان هەردو سكران رادەستی هندەك كۆمپانیێن دی بكەن، لێ سكرێ دەڤەرا (باكرمان) پشتی ب دووماهی دهێت دێ گەلەك یێ باش بیت، چونكو دهێتە هژمارتن مەزنترین سكر ل سەر ئاستێ پارێزگەها دهۆكێ و د پلانا حكومەتا هەرێما كوردستانێ دا یە پتر گرنگیێ ب چێكرنا سكران و كەرتێ ئاڤدێریێ بدەن، هەروەسا ب سوپاسی و رێزڤە كارگێریا پارێزگەها دهۆكێ ژی گەلەك خەمحۆرا كەرتێ چاندن و ئاڤدێریێ یە و دێ بەردەوام هەموو شیانێن خوە تەرخانكەت كو پرۆژەیێن باشتر و مەنتر یێن ئاڤێ ل سنۆرێ پارێزگەها دهۆكێ دانن.
