ل هەمبەری دوبلاژكرنا درامایێن لاواز شەرم دكەم
هەرهین محەمەد:
ئاراز محەمەد عەزیز، دوبلێر و سەرپەرشت ل كۆمپانیا ئەی ڤی لاین یا دوبلاژ و هەموو كارێن هونەری، د دیدارەكێ دا بۆ رۆژنامەیا ئەڤرۆ گۆت: بۆ دەمێ دەه سالانە سەرپەرشتیا دوبلاژێ دكەم و بۆ من هزرەكا باش یا چێبووی، چونكو مە وەكو كۆمپانی ل گەل كەنالێن ژدەرڤەی هەرێمێ كاركریە، مە دوبلاژ ل دووڤ ستایلێ وان كرو ب وێ چەندێ كارێ مە پتر ب هێز كەفت.
ئارازی گۆت: سەرپەرشتیاریا دوبلاژێ نە یا ب زەحمەتە، بەلێ هونەر پێ دڤێت و ئەو كەسێ وی كاری دكەت دڤێت چاڤ و گوهێ هونەری هەبیت، بۆ نموونە هەر درامایەكا بۆ مە دهێت ژ كەسایەتیان دڤێت بزانم كادێ دەنگێ كیژ دوبلێری ل سەر وی كەسایەتیێ دهێت و ب مخابنی ڤە ل دهۆكێ دراما یێن هاتینە چێكرن دەنگ و كەسایەتی گەلەك ژێك دوورن و ل هەمبەری وان درامایا من شەرم ژخوە كریە و بەلگە ل سەر ڤێ چەندێ ژی چ چاڤدێری نینە و نابیت كارێن وەسا یێن ئاست نزم ل دهۆكێ بهێنە چێكرن و هندەك جارا دراما دا درێژ بیت سێ چار جاران دەنگێ كەسایەتیەكێ درامایێ دا داهێتە گۆهۆڕین و ئەڤە ژی خالا كێماسیێ و لاوازیێ یە بۆ وی كارێ هاتیە كرن.
