گرنگه هونه‌رمه‌ند ژیانا هه‌ڤژینیێ پێك نه‌ئینیت
هه‌رهین محه‌مه‌د:
هونه‌رمه‌ندا شێوه‌كار ره‌شا سالح، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: راسته بۆ ده‌مه‌كه ژ هونه‌ری دووركه‌فتیم و به‌ری نوكه من گه‌له‌ك كار دكر و پشكداری گه‌له‌ك پێشانگه‌ه و فیستەڤالان دبووم و هه‌موو ده‌مان من بزاڤ دكر كا پێشانگه‌هه‌ك ل كیڤه هه‌یه دا كو پشكدارببم و ل وی دەمی من ژیانا هه‌ڤژینیێ پێك نه‌ئینابوو و نوكه خودان هه‌ڤژین و زارۆكم و بكارێن مالێ ڤه مژوولم و گه‌له‌ك ل گه‌ل خێزانا خوه یا كه‌یفخوەشم و دبینم گه‌له‌ك ده‌مێ خوه ل گه‌ل وان دبوورینم و من ده‌م بۆ كارێ هونه‌ری نه‌مایه و هه‌موو ده‌مان ل گه‌ل خوه دبێژم گرنگه هونه‌رمه‌ند نه شوی كه‌ت و نه ژنێ بینت گۆت: گوهورینا ستایلی نه‌یا ب زه‌حمه‌ته،به‌لێ ستایلی هونه‌رمه‌ندی په‌نجه‌مورا وی یه و هه‌ركاره‌كێ هونه‌رمه‌ند دكه‌ت ل دووڤ ستایلێ خوه هه‌تا هه‌تایێ دمینت بۆنمونه ستایلێ من ل سه‌ر ئێشانا ژنێ یه و كه‌ڤالێن من ل هه‌رجهه‌كێ هه‌بن دێ زانن ئه‌ڤه كارێ منه و دشێن گوهورینێ دره‌نگ و هێلان دا بكه‌ین، به‌لێ ل نك من هندی ستایلێ مرۆڤی بمینت باشتره گۆت:
مۆزیكژه‌ن هه‌زار میكائیل هه‌ڤژینێ منه و هه‌تا نوكه من و وی ئه‌و هزره نه‌كریه پێكڤه كلیپه‌كێ چێكین و هه‌رئێك ژمه كارێ خوه نیشان بده‌ت.
ره‌شایێ ئه‌و چه‌نده‌ژی گۆت: كه‌ڤالێ گرافیكێ ره‌ش و سپی ده‌ستپێكا وێ ب ره‌ش و سپی دهێته نیاسین، به‌لێ دشێن لدووڤ ته‌كنیكێن وێ ره‌نگا و ره‌نگ ژی نیشان بده‌ین و چاڤێن وان گرافیكێ ب ره‌نگان ژی بیننن چونكو گرافیكێ ره‌نگا و ره‌نگ ژی یێ هه‌ی و هه‌كه به‌حسێ بینه‌رێن مه ل كوردستانێ بكه‌م دیتنا وان بۆ كه‌ڤالی هێشتا چاڤێن وان ژ كه‌ڤالێن ره‌نگا و ره‌نگ تێرنه‌بووینه و تێگه‌هشتنا وان بۆ كه‌ڤالان هێشتا ئه‌و ل دووڤ وی كه‌ڤالی دچن پتر یا ژیواری بیت و گه‌له‌ك كێم ژبینه‌ران د كه‌ڤالێ ره‌ش و سپی بگه‌هن زێده‌تر گۆت: هه‌ركه‌ڤاله‌كی ده‌مه‌ك هه‌یه و گه‌له‌ك كه‌ڤال هه‌نه ب رۆژ و هه‌یڤان من ل سه‌ر كاركریه و كه‌ڤال هه‌بوویه من هێلایه نیڤه‌رو بۆ سالا پاشتر ته‌مام كریه و گه‌له‌ك جاران چێبوویه من هزرێن نوی ئافراندینه و من بزاڤ كریه وێ هزرێ بدانمه سه‌ر كه‌ڤالی و پاشان گێولیێ من لێنه‌دایه و من هه‌رگرتیه بۆ ده‌مه‌كێ دی و هه‌رده‌مێ گێولێ من لێدا جاره‌كا دی ته‌مام دكه‌مه ڤه.
ل دووماهیێ گۆت: ده‌مێ ده‌ست هاڤێژمه فرچه و ره‌نگا كه‌ڤاله‌كی چێدكه‌م ده‌مێ من زویكا ده‌رباز دبیت و من نه‌ڤێت ژی كارێ خوه بهێلم و بچم كاره‌كی دی بكه‌م و كارێن خوه یێن هونه‌ری وه‌كو زاروكێن خوه دهژمێرم، چونكۆ ئه‌و ژی هزره‌كه ژ روح و ناخێ من ده‌ردكه‌ڤیت.
