لقێ ئێكێ پارتی پڕۆژەیێ بهارا خێر و دلۆڤانیێ ڕاگەهاند
دهۆك، لەزگین جوقی:
لقێ ئێك یێ پارتی ب هەلكەفتا هاتنا مەها رەمەزانا پیرۆز، پڕۆژەیێ بهارا خێر و دلۆڤانیێ راگەهاند.
د. نەوزاد عەبدوللا، بەرپرسێ لقێ ئێك یێ پارتی دیار كر، رۆلی ساخلەمیێ د بهارا خێر و دلۆڤانیێ دا گەلەك یێ گرنگ بوویە، سەندیكایێن ساخلەمیێ و دەزگەهێ خێرخوازیێ بارزانی پشكداری د پڕۆژەی دا كرینە و گۆت: «ل سالا بۆری د پڕۆژەیێ بهارا خێر و دلۆڤانیێ دا پتر ژ 14 هزار كەسان مفاداربووینە و پتر ژ ملیارەك و 200 ملیۆن دیناران ژ لایێ نۆشدار و تاقیگەهێن دهۆكێ ڤە بۆ نەساخان ڤەگەڕیاینە، دیسا 12 ماركێتان هەڤكاریا خەلكی كریە و ترۆمبێلێن گەڕۆك ئاهێن خوارنێ گەهاندبوونە خەلكێ، 15 خوارنگەهێن دهۆكێ پشكداربوون و خوارن ددا خەلكی، شەش جهێن شیریناهیان خزمەتا خەلكێ مە دكر و 12 هزار و 100 سەلكێن خوارنێ بۆ خەلكێ هەژار هاتینە دابینكرن و چەندین قوتابخانە ژی هاتبوونە نووژەنكرن».
د. نەوزاد گۆتژی: «ئەڤ سالە نۆشدار و دەرمانخانە و تاقیگەه و جهێن كارمەندێن ساخلەمیێ دێ بهایێن پلیتا خۆ كێم كەن، ئەڤ سالە د پڕۆژەییێ بهارا خێر و دلۆڤانیێ دا چەندین جۆرێن هاریكاریان بۆ خەلكی دێ هێنە پێشكیشكرن، ل گەل بەلاڤكرنا ئاهێن خوارنێ و بەلاڤكرنا هاریكاریان ل سەر خەلكێ هەژار و كێمدرامەت و خزمەتا گەنج و لاو هەموو تاخێن جڤاكی دێ هێتە كرن».
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ دیاركر، ئەڤ سالە تاقیگەهێن نۆشداران و نۆشدارێن ددانا و تیشك و سۆنار و پشكنینێن ساخلەمیێ داشكاندن تێدا دێ هێتە كرن.
