ب بەرهەڤبوونا سیداد بارزانی پشكا رەوشەنبیری و راگەهاندنا پارتی بەلگە فیلمـێ (كەركووك .. عەرەبكـرنا بەردەوام) نیشادا
ل هۆلا پشكا رەوشەنبیری و راگەهاندنا پارتی دیموكراتی كوردستان ب بەرهەڤبوونا سیداد بارزانی، مەحموود محەمەد، ئەندامێن دەستەیا كارگێرییا مەكتەبا سیاسییا پارتی و د. سالار عوسمان، ئەندامێ كۆمیتەیا ناڤەندی و بەرپرسێ پشكا رەوشەنبیری و راگەهاندنا پارتی، ئومێد خوشناو، پارێزگەرێ هەولێرێ، د. شاخەوان عەبدوللا، جێگرێ سەرۆكێ جڤاتا نوونەرێن ئیراقێ و هەژمارەكا بەرچاڤ یا راگەهاندكار و رۆژنامەڤان و نڤیسەران د رێوڕەسمەكیدا بەلگەفیلمێ ( كەركوك.. ب ئەرەبكرنا بەردەوام) هاتە نیشاندان.
د. سالار عوسمان، بەرپرسێ پشكا رەوشەنبیری و راگەهاندنا پارتی د پەیڤەكێ دا گۆت: «د شیان دایە ب رێكا ڤی بەلگەفیلمی، بۆ جیهانێ بێژین ئەڤە ژانێن مللەتێ مەنە و هەروەسا ئەڤە ژی چارەسەریێن وانن، ئەڤ بەلگەفیلمە خەمێن مللەتەكێ ئاشتیخواز نیشانددەت لەوما گەلەك جهێ گرنگیدانێیە».
بەرپرسێ پشكا رەوشەنبیری و راگەهاندنا پارتی سەرەرای دەستخوەشیێ ل محەمەد حاجی خدر بەرهەمهێنەرێ فیلمی، گۆت: «هیڤیدارین نموونەیێن وەكو وی زێدەتر ببن، تاكو راستیێن ب ئەرەبكرن و داگیركاریێ وەكو خوە بگەهنە هەموو جیهانێ».
پاشی محەمەد حاجی خدر بەرهەمهێنەری فیلمێ، رۆناهی ئێخستە سەر قۆناغێن بەرهەمئینانا فیلمی و ئارمانجێن ڤی فیلمی بۆ بەرهەڤبوویان بەرچاڤكر.
پاشی بەلگەفیلمێ (كەركوك .. ب ئەرەبكرنا بەردەوام) كو ژ بەرهەڤكرنا تۆرا میدیایا كوردستانە ب سەرپەرشتییا محەمەد حاجی خدر هاتە نیشادان، تێدا د دەمێ ساتەكێ دا چەندین رێك و قووناغ بۆ ب عەرەبكرنا كەركوكێ د فیلمیدا هاتنە نیشاندان، بەرهەمهێنەرێ فیلمی د ڤی فیلمیدا گەشتەكا درێژخایەن بۆ باژێرێ كەركوكێ كر، سەرەدانا پترییا قەزا و ناحیە و گوندێن كەركوكێ كر. ژ نێزیك پێرابوون و پێنگاڤێن پرۆسەیا ب عەرەبكرنێ ل تۆماركرینە، سەرەرای چەندین چاڤپێكەفتن ژی ل گەل هەڤوەلاتیێن دەڤەرێ ئەنجامداینە.
