ئاشنا سالح كەكۆ بەرهەڤییان بۆ قارەمانییا جیهانێ دكەت
كچا باژێرێ دهۆكێ ئاشنا سالح كەكۆ و ستێرا هەلبژارتیێ ئیراقێ بۆ یارییا كیك بۆكسینگێ دهێتە هژمارتن ئێكەم كچا پارێزگەهێ یە بوویە یاریزانا هەلبژارتیێ ئیراقێ و ماوەیەكێ درێژە دگەل هەلبژارتیێ ئیراقێ پشكدارییان د قارەمانیێن دەرڤە دا دكەت.
د داخویانیەكێ دا یاریزانا ناڤهاتی بۆ رۆژنامەیا ئەڤرۆ گۆت: دەستپێكا من ل سالا 2014ێ وەكو ئێك ژ بچووكترین یاریزانا كچ دناڤ پێكهاتیێ تیما یانەیا دهۆكێ دا و وەكو ئێكەم یاریزانا كچ من دەست بڤێ یاریێ كرییە و هەتا نوكە ژی بەردەوامم، ئەڤچەندە ژی بۆ حەز ژێكرنا من بۆ ڤێ یاریێ و پشتەڤانییا خێزانا من تایبەت بابێ من ئەوێ ڕاهێنەرێ هەلبژارتیێ ئیراقێ، د نوكە دا ئەم حەفت كچین ژ وانا شەش بۆ ناڤ هەلبژارتیێ ئیراقێ هاتینە ژێگرتن پشتی ئەم شیایین د دووماهی قارەمانییا سۆپەرا ئیراقێ دا رێزێن ئێكێ بهێن.
ژلایەكێ دووڤە ناڤهاتی گۆت: د نوكە دا قۆناغەكا سەردەمیانە یا تیما كچێن كیك بۆكسینگا پارێز و یانەیا دهۆكێ هاتینە پێش و ئەڤە ژی بەلگەیە كو كچێن پارێزگەهێ خودان شیانن و ل سەر ئاستێ ئیراقێ ژی ئێكەم، لەوما ژی ئەم دێ بۆ ئەیارا بهێت بەرهەڤییان كەین پێخەمەت پشكداری د قارەمانییەكا نێڤدەولەتی یا فەرمی دا كەین، گەشبینن وەكو كچێن دهۆكییا ب سەرفەرازی پشكداربین و بشێن ئەنجامەكێ دلخوەشكەر ب دەستڤە بینن.
بۆ زانین كیك بۆكسینگا پارێزگەها دهۆكێ پێشڤەچوونەكا باش ب خوەڤە گرتییە، ئەوا ل سەر سێ سیستەمێن نێڤدەولەتی دهێتە كرن ئەو ژی، full contact – k1 – point fighting) و یانەیێن دهۆك، زاخۆ، ئامێدیێ، شێخان هەڤڕكێن بەردەوامن د قارەمانیێن ئیراقێ دا.
