زاخۆ بۆ پاراستنا سه‌رێ لیستێ و یارییا دهۆك و هه‌ولێر هاته پاشئێخستن
ڕاپۆرت، عه‌لی حاجی:
بڕیاره ئه‌ڤرۆ چار یاریێن دی ژهه‌ڤڕكیێن گه‌ڕا 22ێ یا خولا فوتبۆلا ستێرێن ئیراقێ بهێنه كرن، یانه‌یا زاخۆ دێ دناڤ ئه‌رد و جه‌ماوه‌رێ خوه دا مێڤاندارییا مینا یا به‌سرایی كه‌ت، دێربییا كوردستانی دناڤبه‌را دهۆك و هه‌ولێر بۆ ده‌مه‌كێ دی هاته پاشئێخستن.
زاخۆ دێ بزاڤێن مانا خوه ل پێشه‌نگیێ كه‌ت
دهێته پێشبینیكرن وه‌كو هه‌ر جار جه‌ماوه‌ر و پشته‌ڤانێن یانه‌یا زاخۆ ل ده‌مژمێر 8:30 شه‌ڤ دناڤ یاریگه‌ها خوه دا ب گه‌رمی پشته‌ڤانییا تیما خوه بكه‌ن دده‌مێ ئه‌نجامدانا یاریێ به‌رانبه‌ر مێڤانا خوه یانه‌یا مینا د یارییه‌كا ب سانه‌هی نابیت بۆ كوڕێن خابووری ئه‌وێن سه‌رێ لیستا خولێ دهێن ب كۆمكرنا 42 خالان، ژ 12 سه‌ركه‌فتن، شه‌ش وه‌كهه‌ڤی و سێ خوساره‌تی هه‌نه، د به‌رانبه‌ر دا یانه‌یا مینا ل رێزا 16ێ یه ب كۆمكرنا 21 خالان، د یارییا قۆناغا ئێكێ دا تیما زاخۆ ل یاریگه‌ها وێ وه‌كهه‌ڤی ئینابوو، لێ دیدارێن وان پربووینه ب ئه‌نجامێن جودا، شه‌ش سه‌ركه‌فتن بۆ مینا، پێنج بۆ زاخۆ و نه‌هـ وه‌كهه‌ڤی هاتینه.
عه‌مار فه‌رهاد: ژ ده‌ستدانا خالان قه‌ره‌بوونا وێ ب زه‌حمه‌ته له‌وما ژی دڤێت شه‌ڕێ سه‌ركه‌فتنێ بیت
ل دور گرنگییا ڤێ یاریێ عه‌مار فه‌رهاد سه‌رۆكێ یانه‌یا زاخۆ بۆ رۆژنامه‌یا ئه‌ڤرۆ گۆت: تیما مە د ژ هەمی روویەکێ ڤە د قوناغەکا گەلەک باش دا دەرباز دبیت و هەر دیسان یا نازکە ژی ژبەرکو دڤێت ئەم ب هووربینی بۆ هەمی یاریان کار بکەین داکو بشێن بەردەوامیێ بدەینە سەرێ لیستێ،ژ دەستدانا خالان د قوناغا دوبێ دا قەرەبوکرنا وێ ب زەحمەتە له‌وما دڤێت شه‌ڕێسه‌ركه‌فتنێ بكه‌ین، ژبەرکو هەمی تیمێن نێزیکی یێکن ژبەر هندێ نابیت ب چو ڕەنگان ئەم خالان ژ دەست بدەین هەتا کو بشێن د هەڤرکیا ب دەستڤە ئینانا ناسناڤی دا بەردەوام بین،كارگێری گەلەک نێزیکی تیما خوەیە و پشته‌ڤانییه‌كا باش بۆ دهێته كرن ژهه‌ر لایه‌كی ڤه تایبه‌ت پشتەڤانیا بەردەوام یا حکومەتا هەرێما کوردستانێ و ئیدارەیا سەربەخویا زاخۆ دگەل یانەیا مە گەلەک یا گرنگە و پێکڤە یێ کارەکێ دروست دکەین.
یارییا دهۆك و هه‌ولێر هاته پاشئێخستن
هه‌رچه‌نده بڕیار بوو ئه‌ڤرۆ یانه‌یا هه‌ولێر مێڤاندارییا یانه‌یا دهۆكێ بكه‌ت لێ ژبه‌ر پشكدارییا تیما دهۆكێ بۆ كۆپا كه‌نداڤی یارییا وان به‌رانبه‌ر یانه‌یا ئتیفاق یا سعۆدیێ ژ چارچووڤه‌یێ قۆناغا پێش دووماهیێ فدراسیۆنا فوتبۆلا ئیراقێ بڕیاردا یاری بۆ ده‌مه‌كێ دی بهێته پاشئێخستن، ژ یاریێن دی یێن ئه‌ڤرۆ، زه‌ورا دێ مێڤاندارییا كاره‌با كه‌ت ل ده‌مژمێر 10ی شه‌ڤ، نه‌جه‌ف و ئه‌لقاسم دێربیێ نه‌جه‌ف ده‌مژمێر 8:30 هێته كرن.
نه‌ورۆز به‌رانبه‌ر ئاسته‌نگا ئه‌لگه‌رمه دا
بڕیاره سوبه‌هی دو یاریێن مایی ژ هه‌ڤڕكیێن گه‌ڕا 22ێ بهێنه كرن، ئێك ژ دێربیێن مه‌زن یێن خولا ئیراقێ یاریگه‌ها ئه‌لمه‌دینه ل پایته‌ختێ ئیراقێ به‌غدا دێ مێڤاندارییا یانه‌یا ته‌له‌به و شورته كه‌ت ئه‌وا دێ ل ده‌مژمێر 10:30 شه‌ڤ هێته ئه‌نجامدان، ژلایێ خوه ڤه تیما یانه‌یا نه‌ورۆز دێ ژ ده‌رڤه‌یی یاریگه‌ها بیته مێڤانا یانه‌یا ئه‌لگه‌رمه یا پارێزگه‌ها ئه‌نبارێ د یارییه‌كا ب زه‌حمه‌ت دا بۆ نوونه‌را سلێمانیێ ئه‌وا دێ ل ده‌مژمێر 8:30 شه‌ڤ هێته كرن.
لیستا گشتی یا ڕێزبه‌ندییا یانه‌یا به‌ری ب دووماهی هاتنا گه‌ڕا 22ێ بڤی شێوه‌یه.
1- زاخۆ 42 خال.
2- زه‌ورا 40 خال.
3- شورته 38 خال ژ 19 یارییان.
4- جه‌وییه 37 خال.
5- دهۆك 34 خال ژ 19 یارییان.
6- ته‌له‌به 34 خال ژ 20 یارییان.
7- نه‌فت میسان 32 خال.
8- ئه‌لقاسم 32 خال.
9- هه‌ولێر 32 خال.
10- نه‌ورۆز 30 خال.
11- نه‌فت 29 خال.
12- ئه‌لگه‌رمه 27 خال.
13- نه‌جه‌ف 26 خال.
14- كاره‌با 26 خال.
15- كه‌رخ 25 خال.
16- مینا 21 خال.
17- نه‌فت ئه‌لبه‌سرا 21 خال ژ 20 یارییان.
18- كه‌ربه‌لا 15 خال.
19- حدود 13 خال.
20- دیالا 10 خال .
رێزبه‌ندییا گۆلكه‌رێن خولێ شارایایه
به‌ری ب دووماهی هاتنا گه‌ڕا 22ێ ژ خولا ستێرێن ئیراقێ، ستێرێ یانه‌یا زاخۆ یێ به‌رازیلی گۆستاڤۆ هێنریك سه‌رێ لیستا گۆلكه‌رێن خولێ دهێت ب15 گۆلان، هێرشبه‌رێ شورته موهه‌نه‌د عه‌لی ب14 گۆلان رێزا دویێ، مه‌روان حسێن ژ یانه‌یا نه‌ورۆز ب13 گۆلان رێزا سێیێ دهێت، كاپتنێ تیما زاخۆ ئه‌مجه‌د عتۆان ب11 گۆلان رێزا چارێیه، هێرشبه‌رێ جه‌وییه عه‌لا عه‌باس 10 گۆلان رێزا پێنجێ، هێرشبه‌رێ هه‌ولێرێ یوسف بن سودا 10 گۆلا رێزا شه‌شێ، ئه‌لحارس حاتم ستێرێ یانه‌یا ئه‌لقاسم نه‌هـ گۆل، هه‌ڤالێ وێ یوسف ره‌شید هه‌شت گۆل، شێركۆ كه‌ریم ژ هه‌ولێرێ حه‌فت گۆل، محه‌مه‌د قاسم ژ نه‌جه‌ف حه‌فت گۆل رێزێن حه‌فتێ هه‌تا ده‌هێ دهێن.
