ژەنینا کلاڕنێتێ یا کۆنسێرت و لایڤ مۆزیکانە
زاخۆ، دلۆڤان هالۆ:
مۆزیکژەنێ گەنج یێ باژێڕێ زاخۆ و دەرچوویێ بەشێ پەیمانگەهـ و کۆلیژا هونەرێن جوان ل هەولێرێ ڕەوەند لۆقمان د دیدارەکێ دا بۆ ڕۆژنامەیا ئەڤرۆ دیار کر کو ل قۆناغا سەرەتایی حەزا مۆزیکێ ل دەف من پەیدا بوو، ل دەمێ کو من مۆزیکژەن د تەلەڤزیونێ دا د دیتن سەرنجا من ڕادکێشان، ل زاڕۆکاتیا خوە من دوو جاران بۆ کڕینا ئامیرێ مۆزیکێ کرییە گری، جارا ئێکێ ڕۆژەکێ ئەز هند گریم هەتا کو دەیکا من بۆ من پیانوویەك بچووك کڕی، جارا دووێ ژی پشتی دوو سالان ئەم وەکو مێهڤان چووینە مالەکێ، ل وێرێ ژی من پیانوویەکا مەزن من دیت، دیساڤە ئەز هند گریم هەتا کو خودانێ مالێ بۆ من پیانوویەکا مەزن کڕی.
ناڤهاتی ئاماژە ب وێ چەندێ ژی کر کو پشتی هینگێ ل پەروەردا مە یا زاخۆ ژ لایێ مامۆستایێ ڕەحمەتی عادل حاجی ڤە خۆلەکا مۆزیکێ هاتە ڤەکرن، و ل قۆتابخانەیان دگەڕان کا کێ حەزا مۆزیکێ و ئامیرێ مۆزیکێ هەیە، ئەز ژی هەلبژارتم، ئەم برینە پەروەردێ ئەم پتر فێرکرین، و کڕینا ئامیرێ مۆزیکێ ژی پتر کارتێکرن ل من کر و حەزا مۆزیکێ ل دەف من زێدە کر، پشتەڤانێ من یێ ئێکێ و سەرەکی بابێ من بوو، و پاشان خێزان و هەڤالێن من ژی.
ڕەوەندێ مۆزیکژەن گۆت:»بۆ ئێکەم جار بابێ من گۆتە من ئامیرەکێ مۆزیکێ یێ هەی ناڤێ وێ کلارنێتە و دەنگێ وێ گەلەك خوەشە، لەوما من ئێکەم ڤیدیۆیا دەنگێ کلاڕنێتێ یا مۆزیکژەنێ بناڤ و دەنگ یێ تورك حوسنو شەنلەردیریجی گۆهداری کر و من گەلەك حەز ژێ کر، ئامیرێ سەرەکی یێ ئەز دژەنم کلارنێته، لێ ئەز بەهرا پتریا ئامیرێن فۆدار ئانکو هەوایی دزانم بژەنم، و پیانوویێ و عۆدێ ژی دزانم و گەلەك حەز ژ ژەنینا ئامیرێ جۆمبشێ دکەم، و شێوێ ژەنینا ئامیرێ کلاڕنێتێ یا کۆنسێرت و لایڤ مۆزیکانە».
گۆت ژی:»مۆزیك ل دەف من ئارامیە، و ژەنینا ئامیرێ مۆزیکێ هەستەکێ گەلەك خوەش ل دەف من پەیدا دکەت، چونکی مرۆڤ بەردەوام وزەیا خوە کۆم دکەت و هەمیێ ب ڕێکا ئامیرێ مۆزیکێ دەردئێخیت، گەلەك جاران ل شەڤێن درەنگ و بێ دەنگ وزەیەك بۆ من دهێت، و ئەز ب ئامیرێ مۆزیکێ وێ وزەیێ دەردئێخم، د ناڤبەرا مۆزیکژەنەکێ و یێ کارەکێ دی دکەت، مۆزیكژەن ئارام ترە و هێدی د ئاخڤت و درەنگ تۆڕە دبیت، دەمارگیری ل دەف نینە چونکی مۆزیك کارتێکرنێ لێ دکەت، ئەڤە خالەكا گرنگ یا مۆزیکێ یە».
زێدەتر ژی گۆت:»من پشکداری د تۆمارکرنا سترانان دا کرییە وەکو سترانێن هونەرمەند کەیفی و جۆتیار زاخۆیی و جادر زاخۆیی، هەر دیسان من پشکداری د گەلەك کۆنسێرت و چاڵاکی و هەلکەفتێن حکومی و حزبی دا کرینە، ب تایبەت ڤان کۆنسێرتێن ڤێ دوماهیێ ل زاخۆ هاتینە گێران».
