د كۆپا كەنداڤی دا ئەڤرۆ دهۆك دێ بیتە مێڤانا ئیتفاقا سعۆدی
قەیس وەیس:
چاڤەڕێ یە سوبەهی ل دەمژمێر 11ێ شەڤ هەموو پشتەڤانێن یانەیا دهۆك ب دلەكێ گەشبین ڤە دێ ل سەر شاشە و سوشیال میدیایی تەماشیی ئێك ژ یاریێن ب هێز یێن تیما خوە یا فوتبۆلێ د وەرزێ ئەڤ سالە دا بن دەمێ یانەیا وان ل یاریگەها عەبدوللا ئەلدەبل ل باژێرێ دەمام ببنە مێڤانێن یانەیا ئیتفاق یا سعۆدیێ ژ چارچووڤەیێ یارییا ئێكێ ژ قۆناغا پێش دووماهییا قارەمانییا كۆپا كەنداڤی هێتە كرن.
هەردو یانە چەوا دەربازبوون.
تیما یانەیا دهۆك وەكو نوونەرا ئێكانە یا ئیراقێ و كوردستانێ دەبازبوو ڤێ قۆناغێ پشتی ل رێزا دویێ د كۆما ئێكێ دا هاتی ب كۆمكرنا نەهـ خالان ژ دو سەركەفتن، سێ وەكهەڤی و خوسارەتیەكێ، یانەیا ئیتفاق وەكو خودانا رێزا ئێكێ یا كۆما دویێ دەربازبوو ڤێ قۆناغێ ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ، بڕیارە یارییا دویێ یا ڤێ قۆناغێ یانەیا دهۆك ل 12ێ ڤێ مەهێ یاریگەها خوە یانەیا ئیتفاق مێڤانبكەت و پلێتا دەربازبوونێ بۆ یارییا دووماهیێ ئێكلابیت، یارییا دووماهیێ دێ ب شێوەیێ هاتنوچوون بیت، یا ئێكێ دێ ل هەشتێ نیسانا بهێت بیت و یارییا دویێ دێ ل 15ێ هەمان مەهـ هێتە كرن.
ڕاهێنەرێ ئیتفاق یاریێ ب سانەهی نابینت
د داخویانیەكا رۆژنامەڤانی دا سەعەد ئەلشەهەری ڕاهێنەرێ بەروەخت یێ تیما یانەیا ئتیفاق ئەوێ هاتییە جهێ ستیڤێن جیراردی گۆت: یارییا بەرانبەر دهۆك ب سانەهی نابیت بەلكو ئەو ژی تیمەكا مەزنە و خودان یاریزانێن پیشەكارن و دگەل هەلبژارتیێ ئیراقێ نە، لەوما ژی من هوشداری داییە یاریزانێن خوە ڤێ یاریێ ب سڤكی نە وەرگرن، هەرچەندە هێرشبەرێ تیما مە موسا دیمبیلی ژبەر هنگاڤتنێ ناكەت لێ ل جهێ وی ویسام ئەلشەوالی بەرهەڤە، ئەڤ یارییە بۆ مە گرنگە دڤێت د یاریگەها خوە دا سەركەفتنێ بینن بەر یارییا دویێ بهێت.
مەسعۆد میرال دبیت ب پێكهاتیێ سەرەكی بكەت
بۆ هەر یارییەكێ پلان و تەكتیكا خوە هەیە بۆ یارییا ئەڤرۆ پێنەڤێت ڕاهێنەرێ تیما یانەیا دهۆك مەسعۆد میرالی دێ پشت گەرمیێ ب كۆمەكا یاریزانێن خوە كەت تایبەت ئەوێن د یاریێن بۆری دا ئاستێن مەزن نیشان دایی تایبەت پشتی دووماهی یاری دا سەركەفتنەكا مەزن ب سێ گۆلێن پاقژ ل سەر میسان ئینایی ژ كۆپا ئیراقێ، زێدەتر دێ هزر د ڤان یاریزانان دا هێتە كرن پێكهاتینە ژ، گۆلپارێز، محەمەد سەلاح ئەوێ د چار یاریێن بۆری دا باشترین ئاست نیشان دایی و ئەسیست هەبووینە، هەروەسان بەرەڤانێن خوە بەیار ئەبۆبەكر، لۆكاس مۆسێس، سیابەند عەگید و محەمەد سەعید كو بووینە دیوارێ ب هێز یێن تیمێ، هەر دیسان هێلا ناڤین ب سەركێشییا ئەندازیارێ دناڤ یاریگەهێ دا هارون ئەحمەد، زانا عەلی، ئاكۆ، یانیك زاكێری و رۆبێن ئەكۆا، پێنەڤێت هێلا هێرشبرنێ ژی هێزا كۆژەكە بۆ تیما بەرانبەر كو پێكهاتینە ژ پیتەر گۆرگیس و كەریم دەرویش كو دبیتە هێزەكا كۆم و خودان شیان دناڤا یاریگەهێ دا.
سەرپەرشتێ تیمێ گەشبینە
ل دۆر دووماهی بەرهەڤیێن تیما دهۆكێ بەرانبەر ئیتفاق یا سعۆدیێ جاسم محەمەد حاجی سەرپرەشتێ تیمێ بۆ رۆژنامەیا ئەڤرۆ گۆت: پێنەڤێت یاری ب سانەهی نابیت بەرانبەر تیمەكێ خودان یاریزانێن ئاست بلند یێن پیشەكار، لێ ب هیڤی نە ئەو پلانا ژلایێ كادرێ ڕاهێنانێ بۆ تیمێ هاتییە دانان د بەرژوەندییا مە دا بیت، ئەز سۆزێ ددەمە پشتەڤانێن دهۆكێ كو دێ ئەنجامەكێ باش ژ سعۆدیێ ڤەگەڕین، هەموو یاریزان بەرهەڤن ب مۆرالەكا و دڤێت پێگیربن ب ئامۆژگاری و پلانێن كادرێ ڕاهێنانێ.
خەلاتێن بوها گران بۆ یانەیان هاتینە دان
بۆ زانین خودانا ناسناڤێ قارەمانییا كۆپا كەنداڤی دێ سێ ملیۆن دۆلاران وەرگریت وەكو خەلاتكرن، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ قارەمانیێ دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
ژلایەكێ دووڤە بۆ هەر یانەكا پشكدار سێ هزار دۆلار بۆ دهێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان دهەر یارییەكا د كۆمێ دا هاتییە كرن و هەر یانەیەكا سەركەفتنێ بینت سیهـ هزار دۆلار وەردگریت.
