ژ بۆ ئاشتیێ و چـارەسەرکرنا پرسا کـوردی دێ چـالاکیان کـەین
هەڤسەرۆکێ دەم پارتی دیار کر، ل تورکیا قۆناغەکا نوو دەستپێکریە و دڤێت دەولەتا تورکیا ژی دەست ب دروستکرنا زەمینەیەکا گونجای یا سیاسی و یاسایی بکەت، پڕانیا وەلاتیێن تورکیا ئاشتیێ دخوازن و دڤێت دەولەت ژی ب ئەرکێ خوە رابیت و بریارێن گرنگ بدەت.
تونجەر باکرهان هەڤسەرۆکێ دەم پارتی دیار کر، پشتی پەیاما ئۆجەلانی و راگەهاندنا ئاگربەستێ ل ئالیێ پەکەکێ ڤە دڤێت دەولەتا تورکیا ژی هندەک پێنگاڤان بهاڤێژیت، دڤێت د بیاڤێن سیاسی و یاسایی دا هندەک گوهۆڕین بهێنە کرن، ئانکۆ هندەک بەرهەڤی بهێنە کرن، ئەو یەک گەلەک گرنگە، پێدڤیا تورکیا ب ئاشتیێ هەیە و گۆت: (پشتی کو پەیاما ئۆجەلانی هاتە خواندن، مە دیت کا چاوا وەلاتێن جیهانێ پێشوازی لێ کرن، هەروەسا د ناڤ تورکیا دا ژی گەلەک سازیان و هێزێن سیاسی پشتەڤانیا خوە دیار کرن، وەلاتیێن تورکیا ژی پشتەڤانیێ ل ئاشتیێ دکەن، ژ بەر ڤێ یەکێ ژی دڤێت نها دەولەت ژی هندەک تشتان بکەت دا قۆناغا نها پتر بەر ب پێشڤە بچیت).
ناڤهاتی ئەو یەک ژی دیار کر، وەکو دەم پارتی وان هەتا نها گەلەک بزاڤ کرینە و یا ژ دەستێ وان بهێت دێ ئەنجام دەن و نها ژی ئەو بەرهەڤیان دکەن ل باژێرێن مەزن یێن تورکیا و باکورێ کوردستانێ دەست ب چالاکیێن جەماوەری بۆ پشتەڤانیا ئاشتیێ بکەن، ئەو یەک دێ کاریگەریا خوە هەبیت، چونکی نها ل تورکیا کەسێ شەڕ نەڤێت و دڤێت چالاکیێن گەلەک مەزن ژ بۆ ئاشتیێ و پشتەڤانیا پەیاما ئۆجەلانی بهێنە کرن و وەکو دەم پارتی مە بەرنامە هەنە و دێ د رۆژێن پێشیا مە دا دەست ب کارەکێ وەسا کەین و گۆت: (قۆناغا نها ل تورکیا گەلەک گرنگە، بەری نها گەلەک هێزێن سیاسی دژبەریا ئاشتیێ و چارەسەرکرنا پرسا کوردی دکرن، لێ نها ئەو بخوە پشتەڤانیێ ل ئاشتیێ دکەن، مە بەری نها ژی گەلەک جاران گۆتیە زیانا ئاشتیێ بۆ چو کەسەکێ نینە، دێ هەموو سودمەند بن، ژ بەر ڤێ یەکێ ژی گرنگە هەموو سازیێن جڤاکێ سڤیل، کەسێن ئەکادیمی، رۆژنامەڤان، نڤیسەر، هونەرمەند و هەموو تاکێن تورکیا پشتەڤانیێ ل ئاشتیێ و راگرتنا شەڕی بکەن، براستی ژی ئێدی دڤێت شەڕ و توندوتیژی د رۆژەڤا تورکیا دا نەمینیت).
سەبارەت ب هندێ کا دێ د رۆژێن پێشیا مە دا چ هێتە کرن ژی هەڤسەرۆکێ دەم پارتی دیار کر، ل گۆر زانیاریێن گەهشتینە مە دێ وەکو نیەت پاکی هندەک پێنگاڤ هێنە ئاڤێتن و ئەم هیڤیدارین هەموو هێزێن سیاسی یێن تورکیا ژ بۆ ئاشتیێ و نەمانا شەڕی خوەدان پرۆژە بن، چونکی دڤێت ئێدی ل پەرلەمانێ تورکیا ئەم گەنگەشێ ل سەر پاشەرۆژا تورکیا بکەین.
