ژیانا پێشمەرگایەتیـێ هەمی نەخۆشـی بـوو
دیدار، سالار محەمەد دۆسكی:
4 – 5
پێشمەرگەیێ شۆرەشا گولانێ، نەجمەددین مستەفا عوبێد كێستەیی گۆت: ل سالا 1982 دایك و هەژڤینا من ژ زیندانا بەعسیان هاتنە ئازادكرن و پشتی ئازادبووین مە ئینانە دەڤەرێن ئازادكری و ل گوندێ (دیهێ) ئەم ئاكنجی بووین. هەر ژ سالا 1982 هەتا ئەنفالێن رەش ل سالا 1988 مال و زارۆكێن من ل وێرێ بوون. هەرچەندە گوندێ دیهێ گوندێ كرستیانا بوو، بەلێ هینگێ كەس خودانێن گوندی ل سەر گوندی نەبوون، ئەو ماڵێن ل وێرێ ئاكنجی بووین هەموو مالێن پێشمەرگە و بەرگری مللی بوون.
پێشمەرگێ شورەشا گولانێ، نەجمەدین مستەفا عوبێد كێستەی، هێشتا گۆت: دەمێ ئەنفال دەست پێكرین و خەلك هەمی چوون و مالا مە ل قوتابخان دیهێ دا بوو برازایەكێ من ژی ل گەل من بوو و ئەو ژی خێزاندار بوون و ئەو ماوەك بوو چووبوونە سەر سنوری و مالا من و یا (نوری) ل (دیهێ) بوو. دەمێ ئەنفالان دەست پێكری و من هێسترەك هەبوو. ئەز ڕابووم من دوو سندوقێن ڤالا یێن باجان سۆركا ئەڤێن مەزن ل هێرسترێ كرن و هەر سندوقەكێ دوو زارۆكێن خوە و دووێن (نوری) من هاڤێتنە تێدا. تنێ مە مرۆڤ ڕزگاركرن، چ تشتەك ژی مە ل گەل خوە نەبر. ئەم چووینە ب رێكێ ڤە مە تەرەكتورەك دیت و ئەم گەهاندینە بابیرێ. دوڤدا ئەم دەربازبووین و ئەنفالان دەسپێكر و خەلكی دەڤەر بەردان. مە ژی ل گەل وی خەلكی بەرێ خوە دا سەر سنووڕێ باكوورێ كوردستانێ. ئەم چووینە سەر سنوری، وێ شەڤێ و لەشكر و جاشێن ئیراقێ نێزیكی مەبوون. من هەڤژین و زارۆكێن خوە دانان و من گۆت دێ سپێدێ دوڤ هندەك مرۆڤێن مە راچم ل دەڤەرێ و دێ هسترێ بوو بەم و بەلكی هندەك تشتا بخو ژی بینم. ئەو شەڤا من داناین و سپێدێ ئەز هاتمە ڤە دەڤەرێ. خەلكێ دهێت و هەرێ پرسیار دكەم. ئەز گەهەشتمە گوندێ گركا و مرۆڤێن مە گۆتن: ئێدی ژ ڤێرێ وێڤە نەچن. هەتا بێلیزانێ ژی كەسەك نەشێت بچیت و جادە ژی یا هاتیە گرتن و خەلك ژ نەچاری یێ دبن قەسیاسا جادێ ڕا دەرباز دبیت. دەمەكی برازایێ من و كورخالێ من هاتن و گۆتن: ئەگەر هێسترێ بدەیە مە دێ چین هندەك تشتا ئینین. من گۆتێ: نەچن لەشكرێ دهێت. پاشی ئەم زڤڕینەڤە سنووری. لەشكرێ توركیا ژی بەرسینگێ مەگرت و نەهێلا ئەم دەربازی ئاخا توركیا ببین. خوارن گەلەك یا بزحمەت بوو، وەك پێشتر مە ئاماژە پێكری ئەو چەند هەیڤ بوو چەند مالێن مرۆڤێن مە هاتبوونە نێزیكی سنووری. دەمێ ئەم چووینە وێرێ ئەوان ئەرزاق و نڤین گەلەك هەبوون، مە مفا ژێ وەرگرت.
وی دەمی دەزگەهێن بێتەلێ ل گەل لژنا ناڤچێ ل سەر هێل بوون و گڤاشتن ل سەر توركیا دروست بوو بۆ وەرگرتنا وی خەلكی. وێ شەڤێ بەرپرسێن مە وەك(رێڤینك هروری و ناصح كێستەیی) هەر ژ (خەنوكەی) هەتا (قەسركێ) ل سەر سنووری، وان خوە گەهاندە بنگەهێ جەندرمێن تركا. دەمەكی هەماهەنگیەك دروستكر و گۆتن بلا جەماوەر و هەر هەمی پێكڤە بدەنە سەر لەشكری و بچنە ناڤ ئاخا توركان دا و توركیا تەقێ ناكەت، و كاودانێن مرۆڤایەتی نە. وێ شەڤێ جەماوەر دەرباز بوونە و ل ئەوان گوندان بەلاڤبوون و لەشكری نەشیا چ بكەت. ئەم نێزیكی 18 رۆژان ئەم ماینە ل ئەوان گوندان، و دوڤدا حوكمەتێ بریاردا كو ئەوان كوچبەرێن سەر سنوران كەمپ بۆ بهێنە دروستكرن ل (مێردین، دیاربەكر و موشێ) دانان و ئەو خەلكێ هاتیە ناڤ ئاخا توركیان ل سەر ئەوان سنوران هاتنە بەلاڤكرن، مە چەكێ خوە رادەستی حوكمەتا توركیا نەكر، چونكە ئەو مالێن ئەم پێشتر چووینێ ل وان گوندان، مە ئەو‌د نیاسین و هاتن و چوون ل گەل ئێك دو هەبووینە و چەند كلاشینكوف من هەبووینە و مە رادەستی ئەوان مالاكرن و دیسا ئەو دەوار و هێسترێن مە هەین ژی هەر ئەوان مالان ب پارەكێ كێم ژ مەكرین. ئەگەر هێسترەك ب 100 دیناران با ئەوان ب 50 دیناران ژ مەكرین. ژ وێرێ ئەم برینە دیاربەكر، دەستپێكێ ئەم داناینە بەر چەمێ دیاربەكر ل بن چادرا و كاودان گەلەك نەخوش بوون و خوارنەكا باش نەبوو و گڤاشتنا مەزن ل سەر مەكر دا خەلك تەنگاف بیت دا خوە رادەستی حوكمەتا ئیراقێ بكەن. پشتی هینگێ ئەم برینە شقا كو هەر 35 كەس د ژورەكێ ڤە بوون. ئەز مامە ل وێ كەمپێ هەتا ساڵا 1991.
پێشمەرگەیێ شۆڕەشا گولانێ، نەجمەددین مستەفا عوبێد كێستەیی، بەحسێ سەرهلدانا باژێرێن كوردستانێ كر و گۆت: دەمێ سەرهلدانێ دەستپێكری ئەم كومەكا كادران ل گەل پێشمەرگێن هەڤالێن مە و نێزیكی 30 پێشمەرگا بووین و ئەم هاتینە سلوپیان و هەیڤا ئادارێ بوو و سالەكا باران بوو و ئاڤا بوش بوو، ئەم دوو شەڤان ماین و رێبەرێ مە دهاتە سەر ئاڤێ دا بێژیت گەلەك یا بوشە و ئەم نەشیێن دەربازبین یان دا بێژیت دەنگوباس بۆ حوكمەتێ چووینە و جارەكا دی ئەم ڤەگەریاین و ئەم چووینەڤە دیاربەكر. ئەم چەند رۆژان ماین و بهێنا مە گەلەك تەنگ بوو، مە دڤیا هەر بهیێن و دیسا پێزانین ژی بۆمە هاتن و گۆتن چەندەك دەرباز بووینە و ئەم جارەكا دی شەڤەكێ ل سلوپیا ماین و رێبەرێ مە گۆت: شەڤەكا دی دێ هەوە بەین.
