خێزانا كورد رۆله‌كێ گرنگ د پێگه‌هێ جڤاكی دا دگێڕیت
دلڤین رەشید:
چالاكڤانه‌كا جڤاكی دیار كر كو سه‌ره‌رای گوهۆرینێن دیجیتالی، هێشتا خێزانا كورد رۆله‌كێ گرنگ د پێگه‌هێ جڤاكی دا دگێڕیت، به‌لێ وه‌كو جاران كاریگه‌ر نه‌مایه و گۆت: هه‌ڤسه‌نگیه‌كا نوو دناڤبه‌را سه‌ربه‌خۆیا تاكه‌كه‌سی و په‌یوه‌ندیێن خێزانێ دا په‌یدابوویه، به‌لێ ئه‌ڤ هه‌ڤسه‌نگیه دگه‌ل گوهۆرینێن ڤی سه‌رده‌می دگۆنجیت.
هه‌دیا حسێن چالاكڤانا جڤاكی و به‌رپرسا رێكخراوا رابه یا گه‌شه‌پێدان و ئاڤاكرنا شیانان بۆ رۆژناما ئه‌ڤرۆ دیار كر، په‌یوه‌ندیێن خێزانی به‌شه‌كێ سه‌ره‌كینه د په‌یكه‌رێ خێزانێ دا، دناڤا جڤاكێ كوردی دا خێزانێ هه‌رده‌م روله‌كێ سه‌ره‌كی هه‌بوویه د ژیانا تاكه‌كه‌سی دا چ ژلایێ جڤاكی یان ئابوری یان ده‌رونیڤه و گۆت: به‌لێ دگه‌ل گوهۆرینێن ڤێ دووماهیێ یێن جڤاكی وه‌كو كۆچبه‌ری، چۆنا دناڤ جیهانا دیجیتالی و گوهۆرینێن ئابووری، رولێ خێزانێ لاوازی كه‌فتیێ.
به‌رپرسا رێكخراوا رابه دیار كر ژی، خێزانا كوردی بتنێ د چارچۆڤێ جڤاكی دا نینه، به‌لكو قه‌واره‌یه‌كێ پشته‌ڤانه كو ئاسایش و ئارامیێ د ژیانا تاكه‌كه‌سی دا په‌یدا دكه‌ت و گۆت: وه‌كو نه‌ریته‌ك خێزانێن مه‌زن پێكڤه یان نێزیكی ئێك دژیان، ژینگه‌هه‌كا هه‌ڤپشك بۆ خۆ درست دكر كو هه‌موویان پێكڤه پشت ب ئێكودوو دبه‌ست، چ ژ رویێ پێكڤه كاركرنێ یان په‌روه‌رده‌كرنا زارۆكان هه‌تا پالپشتیا دارایی یان ژی سۆزداری .
هه‌دیایێ ئه‌و چه‌ند ژی دیار كر كو دگه‌ل زێده‌بوونا بارگرانیا ژیانێ و بلندبوونا مه‌زاختیێن ژیانێ، خێزانێن بچوك ده‌ستپێكرن كو سه‌ربه‌خویا دارایی دناڤ خێزانێ دا به‌رفره‌ه كر و گۆت: نوكه سه‌ربه‌خۆیا دارایی بوویه ئارمانجه‌ك ژ بۆ گه‌له‌ك گه‌نجان، ئه‌ڤه ژی بوویه ئه‌گه‌رێ كێمبوونا كاریگه‌ریا ئابورییا خێزانی لسه‌ر تاكه‌كه‌سی.
به‌رپرسا رێكخراوا رابه، ئه‌و چه‌نده ژی دیار كر كو سوشیال میدیایێ په‌یوه‌ندیێن خێزانی ب ساناهی كرینه، به‌لێ جۆره‌كێ دی یێ په‌یوه‌ندیێن خێزانی دورستكریه كو پشتبه‌ستنێ ب په‌یوه‌ندیێن راسته‌وخۆ یێن خێزانی ناكه‌ت، لێ د سه‌رده‌مێ به‌رێ دا كومبوونێن خێزانی به‌شه‌كێ گرنگ بوون د ژیانا رۆژانه یا مرۆڤی دا ، به‌لێ نۆكه كۆمبونێن ئۆنلاین جهێ كۆمبونێن له‌شی گرتیه، ئه‌ڤه ژی ره‌نگه په‌یوه‌ندیا راسته‌قینه دناڤبه‌را تاكه‌كه‌سی دا كێم بكه‌ت.
چالاكڤانا جڤاكی دا زانین كو سه‌ره‌رای ڤان گوهۆرینان هێشتا خێزانا كورد رۆله‌كێ گرنگ د پێگه‌هێ جڤاكی دا دگێریت، ل ده‌مێ قه‌یرانان و هه‌لكه‌فتێن گرنگ رولێ وان وه‌كو گه‌وهه‌ره‌كێ یێ به‌رچاڤه، به‌لێ یا ئاشكه‌رایه كو رولێ خێزانا كورد وه‌كو جاران كاریگه‌ر نه‌مایه و گۆت: هه‌ڤسه‌نگیه‌كا نوو دناڤبه‌را سه‌ربه‌خۆیا تاكه‌كه‌سی و په‌یوه‌ندیێن خێزانێ دا په‌یدا بوویه، به‌لێ ئه‌ڤ هه‌ڤسه‌نگیه دگه‌ل گوهۆرینێن ڤی سه‌رده‌می دگۆنجن.
