ساخلەمیا پارێزگەها دهۆكێ: نابیت شەربەتا ئەڤرۆ ل رۆژا پاشتر بهێتە فرۆتن
لەزگین جوقی:
ساخلەمیا پارێزگەها دهۆكێ راگەهاند، دڤێت هەمی جهێن چێكرنا شەربەتا و تەزیاتیان ئامیرێن پالاوتن و تافیلكرنا ئاڤێ (تصفیە و تعقیم) ب قەبارێن مەزن بدانن بۆ جهێن خۆ ژ بۆ دابینكرنا ئاڤەكا ساخلەم بۆ شووشتنا ئامان و ئامیرێن كاری و ئامادەكرنا شەربەتا و هەمی جۆرێن گڤاشتیا (عصائر) و ئامیرێن پالاوتنێ دڤێت بەردەوام كاربكەن داكو تافیلكرنا ئاڤی ب شێوەكێ دروست بهێتە كرن.
ساخلەمیا پارێزگەها دهۆكێ خۆیاكر، دڤێت بەردەوام فیلتەرێن ڤان ئامیرا بهێنە گوهارتن ل دووڤ پێدڤی و قەبارێ كاری، هەروەسا دڤێت شەربەت د ناڤ تەزیكەران دا بهێنە هەلگرتن و دانان و نابیت ب هیچ ڕەنگەكی ل سەر ستێركا و ژ دەرڤەی دوكانێ بهێنە دانان و دڤێت ب تنێ بۆ ڕۆژەكێ شەربەت بهێتە دروستكرن و ئامادەكرن و نابیت بمینیت بۆ ڕۆژا پاشتر و ئەگەر ما دڤێت بهێتە ژناڤبرن و ژ بۆ كونترولكرنا ڤێ چەندێ دڤێت مێژوو ل سەر بتلێن شەربەتێ بهێتە دانان و نابیت شەربەت ل سەر عەرەبانا و ل سەر شوستەیان (رەصیفا) بهێتە دانان و فرۆشتن وفێقیێ تایبەت بۆ گڤاشتنێ دڤێت باش بهێنە شویشتن و زوهاكرن پاشی د ناڤ تەزیكەران دا بهێنە پاراستن.
خویاژی كر، شەربەتا مێویژا دێ ڕێك بۆ هێتە دان بو ئامادەكرنێ و فرۆشتنێ ل جهێن دەستووردای ل دووڤ ڤان مەرج و ڕێنمایێن تایبەت ب شەربەتا مێویژا ڤە یێن هەڤپێچ و لاری نینە شەربەت ل ماركێت و دوكانا ژی بهێتە فروشتن.
ڕاگەهاندیە ژی، قەدەغەیە هەموو جۆرێن شریناهیا و هەڤیرەكان بهێنە چێكرن، ژبلی كارگەهێن شریناهیا یێن دەستووریا ساخلەمیێ هەی و ل دەمێ بەلاڤكرنێ ژی دڤێت لێبلێ كارگەهێ و مێژوویا چێكرنێ و سەرڤەچوونێ ب ئاشكرایی ل سەر بەرهەمێن وان بن و نابیت ب هیچ ڕەنگەكی شریناهی (بەقلاوە، زەلابی، كونافە……..هتد) ل سەر عەرەبانا و سەرجادا و ڕەسیفا و جهێن ڤەكری بهێنە فرۆشتن.
رێڤەبەریا گشتیا ساخلەمیا پارێزگەها دهۆكێ دیاركر، نابیت گوشت ژ دەرڤەی جامخانا و دەرڤەی تەزیكەران بهێتە دانان و پشتی دەمژمێر (12)ێ نیڤرۆ دڤێت گوشت بهێتە هەلگرتن د تەزیكەران دا و نابیت ئاژەل بهێنە سەرژێكرن ژ دەرڤەی سەربرخانەیێن دەستووردای و دڤێت هەمی كەلەخێن ئاژەلی یێن سەرژێكری مۆرا ڤیتێرنەریێ ل سەر هەبیت.
تەكەستكر، خوارن و خارنگەهـ و جگارە كێشان قەدەغەیە ل هەمی جهێن خارن لێ دهێتە پێشكێش كرن و نابیت شریناهی و شەربەت بهێنە چێكرن و فرۆشتن ل جهێن ڕێ پێ نەدای بۆ ڤی كاری وەك (خارنگەهـ، چایخانە، دوكانێن تەزیلات و ئامانا و …هتد) ب تنێ ل تەزیاتی و شریناهیا ڕێ پێ هاتیە دان ڤی كاری بكەن
ساخلەمیا پارێزگەها دهۆكێ راگەهاند، دڤێت هەمی جهێن گشتی پێگیریێ ب ڤان مەرج و ڕێنمایان بكەن و پاقژیا گشتی ب پارێزن و ئەو جهێن سەرپێچی هەبن دێ كەڤنە بن بارێ سزایێن یاسایی و بەفرا كارگەها ب تنێ بۆ تەزاندنێ یە و بكێر ڤەخوارنێ ناهێت، لەوما دڤێت ب تنێ بۆ مەرەما تەزاندنێ بهێتە بكارئینان.
ساخلەمیا دهۆكێ بلاڤكر، كۆ ب تنێ بكارئینانا تاما پینگی و نابیت پینگێ هشككری بهێتە بكارئینان و ئەو ئامانێ دهێتە بكارئینان بۆ شەربەتا دڤێت ب تنێ بۆ ئێك جار بهێنە بكارئینان و شەربەت ب تنێ بۆ ڕۆژانە بێتە ئامادەكرن و نەمینیت بۆ ڕۆژا دیتر و جهێن شەربەتێ ب كۆم دفرۆشن پێدڤییە پسولا فرۆشتنێ دگەل دابیت و ژێدەر یێ ئاشكرا و دیاربیت.
