ل هاڤینا ئەڤسالە قونسلخانەیا مەزن یا ئەمریكا ل هەولێرێ دێ هێتە ڤەكرن
ل هاڤینا ئەڤسالە قۆنسلخانەیا مەزن یا ئەمریكا ل هەولێرێ، ب بەرهەڤبوونا بەرپرسێن بلند یێن ئەمریكی دێ هیچتە ڤەكرن. سەرۆكێ پەیمانگەها ڤەكۆلینێن ئەمریكی – كوردی ژی راگەهاند: هەولێر یا بوویە ترافیكا دیپلۆماسی ل رۆژهەلاتا ناڤین و قۆنسلخانەیا ئەمریكا ل هەولێرێ ژ بالیۆزخانەیێن گەلەك وەلاتان مەزنترە.
ل شواتا 2007 ئەمریكا نڤیسینگەها خوە یا دیپلۆماسی ل هەولێرێ ڤەك و ل سالا 2011 ئاستێ پەیوەندیێن خوە ل گەل هەرێما كوردستانێ بۆ قۆنسلخانەیا گشتی بلندكر. بڕیارە ل هاڤینا ئەڤسالە ژی قۆنسلخانەیا خوە یا مەزن، ڤەكەت.
كارۆخ خۆشناو، سەرۆكێ پەیمانگەها ڤەكۆلینێن ئەمریكی – كوردی د داخۆیانییەكا رۆژنامەڤانیدا گۆت» ڤەكرنا وێ قۆنسلخانەیێ ب وی قەبارەیێ مەزن ڤە روودانەكا گرنگە بۆ هەرێما كوردستانێ و وێ راستیێ دیار دكەت كو هەرێما كوردستانێ پێگەهەكێ ستراتیژی یا مەزن یا هەی، ژ روویێ دیپلۆماسی و ئاسایشێ و ئابوورێ و وزێ ڤە» .
گۆت ژی» ڤەكرن و هەبوونا وێ قۆنسلخانەیێ ب وی قەبارەی ڤە وێ راستیێ ژی دیاردكەت كو هەرێما كوردستانێ ژ روویێ دیپلۆماسیڤە دێ زێدەتر گەشەیێ كەت و ژ روویێ ئاسایشێڤە هەڤپەیمانەگەها ستراتیژییە بۆ ئەمریكا، كو ئەوژی زێدەتر د شەڕێ دژی رێكخستییا داعش یا تیرۆرستی دیاربوو، هەروەسا هەرێما كوردستانێ پێگەهەكێ ئابووریێ مەزن یێ هەی و د وارێ وزێ دا ژی ژ پەترۆلێ و غازێ ب تمامی ل سەر نەخشەیێ جیهانێدا یا جهگیر بووی».
ب دیتنا سەرۆكێ پەیمانگەها ڤەكۆلینێن ئەمریكی – كوردی «ڤەكرنا وێ قۆنسلخانەیێ بەلگەیێ وێ چەندێیە كو ئەمریكا ب هیچ شێوەیەكی دەست ژ هەرێما كوردستانێ بەرنادەت، بگرە هندی دشیانێن وێ دا بیت دێ پەیوەندیێن خوە ل گەل هەرێما كوردستانێ ب هێزتر لێكەت، چونكە ئەمریكا چەندین جاران دوپاتی ل وێ چەندێ یا كری، ئەو دخوازیت هەرێمەكا ب هێز بیت د چارچۆڤەیێ ئیراقێدا» .
كارۆخی رۆهنكر ژی» رۆژ ب رۆژێ پەیوەندیێن هەرێما كوردستانێ و ئەمریكا یێن باشتر دبن، بێگومان بۆ رێكخستنا كاروبارێن وان پەیوەندییان قۆنسلخانەیەكا ب وی شێوەی یا پێدڤییە، كو ژ گەلەك بالیۆزخانەیان مەزنترە، ب تایبەتی وەلاتێن دەوروبەر».
خویاكر ژی» ڤەكرنا وێ قۆنسلخانەیێ ئاماژەیەكە كو سەركردایەتییا سیاسییا كوردستانی گەلەك ب دیپلۆماسییانە رەفتار كریە و پەیوەندیێن وێ د ئاستەكێدا ب هێزن، بگەهیتە وێ چەندێ وەلاتەكێ زلهێزێ وەكو ئەمریكا بهێتە قۆنسلخانەیەكا ب وی قەبارەی تێدا ڤەكەت».
ئاماژە ب وێ چەندێ ژی كر» ژبلی قۆنسلخانەیا ئەمریكا، ب دەهان قۆنسلخانەیێن دی ژی ل هەولێرێ یێن هەین، ب شێوەیەكی هەولێر یا بوویە ترافیكەكا دیپلۆماسییا مەزن ل دەڤەرێ، ئەوژی وێ راستیێ دیار دكەت، سەرەرای ئەو پلانێن ل دژی هەرێما كوردستانێ هەین، بەلێ هەر د پێشكەفتنێدا یا بەردەوامە و نە راوەستیایە».
