دووماهی هەلوەستێ فرەنسا دبیتە جهێ دلخوەشیا کوردێن سووریێ
بەرپرسەکێ فرەنسا دیار دکەت هەتا شام مافێن گەلێ کورد ل سووریێ ب تەمامی نەدەتێ و کورد نەگەهنە مافێن خوە ئەو سزایێن ل سەر سووریێ راناکەن و رێ نادەن شام ببیتە ئەندام د هەڤپەیمانیا نێڤدەولەتی یا شەڕێ ل دژی داعشێ دا.
بەرپرسەکێ وەزارەتا دەرڤە یا فرەنسا سەبارەت ب هەلوەستێ وان ل دۆر مافێن گەلێ کورد ل سووریێ دیار کر، هەلوەستێ فرەنسا گەلەک ئاشکرایە، هەر ژ دەستپێکێ هەتا نها فرەنسا پشتەڤانیێ ل مافێن رەوا یێن گەلێ کورد ل سووریێ دکەت و دڤێت کورد ل سووریێ بگەهنە مافێن خوە، ژ بەر ڤێ یەکێ ژی هەر پشتی ژناڤچوونا رژێما بەشاری وەزیرێ دەرڤە یێ فرەنسا د سەرەدانا خوە یا بۆ شامێ دا ئەو یەک ب رەنگەکێ ئاشکرا گەهاندە بەرپرسێن شامێ و دیار کر هەتا کورد نەگەهنە مافێن خوە ئەو سزایێن کو ل سەر سووریێ بەری نها هاتینە سەپاندن راناکەن.
هەمان بەرپرسی ئەو یەک ژی دیار کر، کوردان د شەڕێ ل دژی داعشێ دا هەم ل سووریێ و هەم ژی ل ئیراقێ دا گەلەک قوربانی داینە و فرەنسا رێزێ ل خەبات و قوربانیدانا گەلێ کورد دگریت و دێ بەردەوام ژی پشتەڤانیێ ل مافێن گەلێ کورد کەت، د رەوشا نها یا سووریێ دا گرنگە کورد بگەهنە مافێن خوە و هەکە شام ب تەمامی مافێن گەلێ کورد بدەتێ وی دەمی وەکو فرەنسا ئەو دێ سزایێن کو بەری نها ل سەر سووریێ هاتینە سەپاندن راکەن و دێ رێ دەن شام د هەڤپەیمانیا نێڤدەولەتی یا شەڕێ ل دژی داعشێ دا ژی جه بگریت.
چاڤدێرێن سیاسی یێن کورد ل رۆژئاڤایێ کوردستانێ ژی دلخوەشیا خوە ل هەمبەر هەلوەستێ دووماهیێ یێ فرەنسا دیار دکەن و ئاماژە ب ڤێ یەکێ دکەن، کو هەلوەستێ فرەنسا ژ بۆ رۆژئاڤایێ کوردستانێ گەلەک گرنگە و ژ بەر هەلوەست و پشتەڤانیا فرەنسا شام نەچار ما ل گەل رۆژئاڤایێ کوردستانێ دانوستاندنان بکەت، هەلوەستێ فرەنسا و ئەمریکا ل دۆر رۆژئاڤایێ کوردستانێ گەلەک گرنگن و وەکو کوردێن رۆژئاڤایێ کوردستانێ و سووریێ ئەو سوپاسیا وەلاتێ فرەنسا دکەن.
ل گۆر باوەریا چاڤدێرێن سیاسی پشتەڤانیا فرەنسا و ئەمریکا دشێت کاریگەریا خوە یا مەزن ل هەلوەستێ تورکیا ژی بکەت، هەرچەندە نها هەلوەستێ تورکیا ل گۆر دەمێن بۆری ب رەنگەکێ باش هاتیە گوهۆڕین، لێ هەکە پشتەڤانیا ئەمریکا و فرەنسا یا بۆ رۆژئاڤایێ کوردستانێ بەردەوام بیت وی دەمی دێ تورکیا ژی نەچار بیت هەبوونا رێڤەبەریا خوەسەر یا رۆژئاڤایێ کوردستانێ ب فەرمی قەبوول بکەت و پەیوەندیێن خوە ل گەل کوردێن سووریێ باش بکەت، چونکی بەری نها بەرپرسێن رێڤەبەریا خوەسەر دیار کرینە وان دڤێت پەیوەندیێن خوە ل گەل تورکیا باش بکەن.
