رۆژنامەڤانێن كوردستانێ تەخەكا كاریگەرن ل داكۆكیكرنێ ژ مافێن مە یێن نەتەوەیی و نیشتمانی
بەرپەرسێ دەستەیا كارگێرییا مەكتەبا سیاسییا پارتی دیموكراتی كوردستان ب هەلكەفتا سالڤەگەڕا 127 یا رۆژنامەڤانییا كوردی و هەلكەفتا دامەزراندنا سەندیكا رۆژنامەڤانێن كوردستانێ پەیامەكا پیرۆزباهیێ ئاراستەی رۆژنامەڤانێن كوردستانێ كر.
فازل میرانی، بەرپەرسێ دەستەیا كارگێرییا مەكتەبا سیاسییا پارتی دیموكراتی كوردستان د پەیاما خوە دا گۆت» 127 سالییا رۆژا رۆژنامەڤانییا كوردی ب دەلیڤە دزانین كو پیرۆزباهییەكا گەرم ل هەموو رۆژنامەڤانێن كوردستانێ بكەین، ئەو هەردەم ل سەنگەرێ داكۆكیكرنێ دانە ژ پرسێن خوە یێن نەتەوەیی و نیشتمانی و فاكتەرەكێ مەدەنی و شارستانی بوون، ب نوكە ژی ڤە، بۆ پاراستنا بهایێن گەل و وەلاتێ مە».
دیاركر ژی» سالڤەگەڕا 27 یا دامەزراندنا سەندیكا رۆژنامەڤانێن كوردستانێ ژی ب دەلیڤە دزانین، كو پیرۆزباهیێ ل دامەزرێنەرێن وێ رێكخراوا پیشەیی و هەموو ئەندامێن وێ بكەین، دیتنا مە ژی ئەوە ئەڤرۆ سەندیكا یا بوویە چەترێ كۆمكرنا رۆژنامەڤانێن كوردستانێ و نوونەرایەتیكرنا وان و داكۆكیكرن ژ ماف و ئەركێن ئەندامێن خوە، ب بزاڤێن هەموو ئالییەكی ژی ئەڤرۆ رۆژنامەڤان و میدیاكارێن كوردستانێ یێن بووینە تەخەكا ئێكجار كاریگەر د داكۆكیكرنێدا ژ مافێن مۆڤی و مافێن مە یێن نەتەوەیی و نیشتمانی».
