پیشەییانە رەفتارێ ل گەل روودان و پێشهاتەیان بكەن
دوهی سێشەمبی 22/4/2025، د پەیامەكێدا ب هەلكەفتا سالڤەگەڕا 127 یا رۆژنامەڤانییا كوردی، سەرۆك بارزانی پەیامەك بەلاڤكر و راگەهاند» ب ڤێ هەلكەفتێ داخوازێ ژ هەموو رۆژنامەڤان و راگەهاندنكارێن خوەشتڤی دكەم د ئەرك و كارێن خوەدا پیشەییانە رەفتارێ ل گەل روودان و پێشهاتەیان بكەن و بها و بەرژەوەندیێن گەلێ مە ل بەرچاڤ وەربگرن».
دەقێ پەیاما سەرۆك بارزانی ب هەلكەفتا سالڤەگەڕا 127 یا رۆژنامەڤانییا كوردی:
ب هەلكەفتا سالڤەگەڕا 127 یا دەرچوونا ئێكەمین رۆژنامەیا كوردی كو هەڤدەم رۆژا رۆژنامەڤانییا كوردی و سالڤەگەڕا دامەزراندنا سەندیكا رۆژنامەڤانێن كوردستانێ ژی یە، گەرمترین پیرۆزباهیێن خوە ئاراستەی هەموو رۆژنامەڤان و میدیاكارێن كوردستانێ دكەم.
رۆژنامەڤانی و كارێ راگەهاندنێ و میدیایێ فاكتەرەكێ گرنگ یێ پێشڤەبرنا هشیارییا نەتەوەیی و پاراستن و زەنگینكرنا زمانێ كوردی نە، هەڤدەم راگەهاندن و رۆژنامەڤانییا كوردی چەكەكێ ب هێزە بۆ دانەنیاسینا دۆزا رەوا یا گەلێ مە ب جیهانێ و هەروەسا ئامرازەكێ كاریگەرە بۆ پاراستنا فەرهەنگا پێكڤەژیانێ و ب هێزكرنا كەلتوورێ ئاشتیخوازی و لێبۆرینێ ل دەف گەلێ كوردستانێ.
ب ڤێ هەلكەفتێ، داخوازێ ژ هەموو رۆژنامەڤان و راگەهاندنكارێن خوەشتڤی دكەم د ئەرك و كارێن خوە دا پیشەییانە رەفتارێ ل گەل روودان و پێشهاتەیان بكەن و بها و بەرژەوەندیێن گەلێ مە ل بەرچاڤ وەربگرن.
