نزا یێن ئاشتییێ
د. عارف حیتۆ
من گۆتە خوە.. ترێن سینگێ ئاقاری دبڕیتن، بەر ب قیبلە
سککەیێ وێ ژ ئاسنەکێ پۆلاییە، دەنگەک ژێ دهێت..
گیا پێ دهەڕشیت و زویرک پێ ڤەدڕەشیێن..
فڕۆکەیێن گەشتێ، ئاسمانی دکێلن، دەنگ شەهتی
با بارێ خوە نادانیتە سەر جغزێن گرتی و بەهتی
هەمی ئەوێن فڕین داددەن.
من نەدڤیا هێڤکەمە پیستێن سەلخی..
دا جێژڤانێن پەلخی، نەبینم دهێنە خەونا من
د من دئالیێن و من دادهێلنە دەریا بێ بن!
هەستەکا «بورهان زێباری»، گەهاندمە سەر ڕووباری
پەڕاڤ د بێدەنگ و تەنا بوون
ڕەشەکێن ئاغای هاتن و ل خوەبەخشێن سوخرێ دگەڕیان
کەسەک نەدیت، ژ بلی عەشقێ..!
ب دێمێ ئاخێڤە نیشتی و ئۆمێدێ دجویت وەک بەنیشتی.
من خوە هاڤێتە دەهمەنا ڤی وەلاتی..
ئەو وەلاتێ زۆر حەز ژێ دکەم، ب منڤە پشتی!
(و).. وەرگوهێزکا وەرمتنا وەغەرا منە
(ە).. ئەیۆنێن ئارمانجا ئەڤینییا منە
(ل).. لەمزا لام و لمتۆر و لاوینییا منە
(ا)… ئاسۆیێ ئاوازا ئاخینک و ئالایێ منە
(ت).. تۆڕبەندا تیڕێژا تبلێن منە
هەمی مال و مولکێ من بەس ئەڤینییە و پێ دبەخشم.
ئێکەمین هەستە ل سەرێ سحاران دبینم و
دوماهی ئایەتە ل بەری نڤستنێ دخوینم.
دلێ من دکەتە چوار پارچێن براشتی و پێنگاڤا من،
ل سەر هێلیڤانکا وی ناشتی
تم و تم ل ڕۆژێ هاوار دکەت: ئاشتی.. ئاشتی.
