فلۆرێنتینۆ پێرێزێ دهۆکێ
ئەحمەد محەمەد سالح
1-2
وەکۆ یا دیار سەرۆک یانە د فوتبۆلێ دا وەکۆ ئێکەم و بلندترین کەس د ناڤ هەر یانە یان قەوارەیەکێ وەرزشی دا دهێتە هژمارتن، ژبەرکۆ بارێ گران یێ بریارێن گرنگ و چارەنڤیسی ب ستویێ خوە ڤە دگریت کو پاشەرۆژا یانێ دیار دکەن، ڤێجا چ ل سەر ئاستێ وەرزشی، دارایی، یان کارگێری. رۆلێ وی وەکی یێ رێڤەبەرەکێ سنووردار یێ کو ل پشت مێزەیەکێ روونشتی نینە، بەلکۆ سەرکردەیەکێ راستەقینەیە و راستەوخۆ یان ژی نەراستەوخۆ کاریگەریێ لسەر ئاستێ یانێ و ئەنجامێن وێ و ب ناڤودەنگی و سەقامگیری و پێشڤەچوونا وێ بۆ ماوەیەکێ درێژ دکەت، کورتتر سەرۆکێ یانێ بەرێ بناغەیە، بریارێن وی پاشەرۆژا یانێ دیاردکەن، چ ژ لایێ سەرکەفتنان ڤەبیت یان شکەستنان.
ژ گرنگترین و کاریگەرترین رۆلێ سەرۆکێن یانەیان پێکهاتینە ژ:
1. دانانا پلانەکا ستراتیژی
سەرۆک ئارمانجێن یانێ ددانیت، چ د کورت بن بۆ وەرزەکی یان درێژ چەندین سالان، وەکی رکابەریکرن ل سەر قەهرەمانی و خۆلان یان ژی پێشڤەبرنا تیمێن خودان ژی وئاستێن جودا.
2. سەرپەرشتیکرنا گرێبەستان
بریارا دوماهیکێ ل سەر کڕینا یاریکەران و فرۆشتنا وان گه‌ر ستێرەکا دیار یا یانێ ژی بیت، دانان و لادانا ڕاهێنەران هه‌یه، ب هەڤکاری دگەل رێڤەبەرێ وەرزشی.
3. برێڤەبرنا لایەنێ دارایی
پێدڤیاتیێن یانێ دیار دکەت، هەڤسەنگیێ دناڤبەرا خەرجی و داهاتێ یانێ مسۆگەر دکەت، هەروەسا ل دویڤ سپۆنسەر و هەڤکاران دەگەڕیێت ژ بۆ کو ژ ئالیێ دارایی ڤە پشتەڤانییا یانێ بکەن.
4. پەیوەندی دگەل خەلکی و ڕاگەهاندنێ
نوونەراتییا یانه‌یێ دکەت د داخویانیێن فەرمی دا، پتریا جاران د میدیایان دا ڕووخسار و روویێ یانێ یە بەرانبەر رۆژنامەڤان و گرووپێن پشتەڤانان چ یێن ڕازی چ یێن تۆرە و نەڕازی، هەروەسا ل بەرانبەر رێڤەبەریێن وەرزشی وەکی ئێکەتیێن تەپاپێ یێن نافخۆ و ژدەرڤە هەتا فیفایێ ژی.
5. به‌رهه‌ڤكرنا ژینگەهەکا ئارام
بەرپرسیارە ژ به‌رهه‌ڤكرنا ژینگەهەکا ئەرێنی یا کارکرنێ دناڤبەرا ستافێ تەکنیکی و یاریکەران و کارمەندان، و پشتراستبوون ژ سەقامگیرییا کارگێرێ ورەوشتێ تیمێ.
مێژوویا تەپاپێ یا ڤالا نینە ژ سەرۆک یانەیێن سەرکەفتی، بگرە ژ باشترینان ژی ل دویڤ بنەما و پیڤەرێن ب دەستڤەئینانا دەستکەفت و نازناڤان، کاریگەری، پێشڤەبرنا یانێ، هێز و جێگیرییا ئابووری هەتا بریارێن مێژووی، ژ وان:
1- سانتیاگۆ بێرنابیۆ سەرۆکێ ریال مەدرید كو د نوکە دا یاریگەها ریال مەدرید ب ناڤێ وی یە ژ گرنگترین کارێن وی
• گۆهۆرینا ریال مەدرید ژ یانەیەکا ئاسایی بۆ یانه‌یه‌كا مه‌زن و باشترین یانه ل وی سه‌رده‌می.
• زاراڤێ “تیما خەونان” دامەزراند و ناڤ و یاریکەرێن مەزن یێن وەک دی ستیڤانۆ و پوشکاش.. ئینان.
• یاریگەها یانێ سانتیاگۆ بێرنابیۆ دروستکر و پشکداریکر د دانان و دەستپێکرنا چامپیونزلیگێ دا بۆ ئێکەم جار.
• برنا نازناڤان، ل ژێر سەرۆکاتیا وی یانەیا ریال مەدرید 29 نازناڤ ب دەستڤە ئینان ژ وان 16 خۆلێن ئسپانی و 6 جاران کاسا شاهی و 6 جاران ژی چامپیۆنزلیگا ئەورۆپا كو به‌ری هنگی روونه‌دابوو.
2- سێلڤیۆ بێرلۆسکۆنی سه‌رۆكێ ئەی سی میلان
• ل سالا 1986 ل دەمێ قەیرانا دارایی ب سەر وێ یانەیێ دا هاتی بۆ سەرۆک و ئەو یانەیە کرە مەزن و زلهێزەکا ئەوروپی.
• ل ژێر سەرۆکایەتیا ویدا، میلان 5 جاران چامپیۆنزلیگ ب دەستڤەئینا و 8 جاران ژی کالچیۆ (خۆلا ئیتالیا).
• ڕۆلەکێ سەرەکی هەبوو د پێشڤەبرنا شێوازێ یاریکرنا ئیتالی ود گۆتنێ: ئەندازیارێ بازارێ ڤەگوهاستنان.
د سه‌رده‌مێ نوی دا و ل دەستپێکا چەرخێ 21 سەرۆک یانەیەک دهێت کو ل دویڤ پێڤەرێن ژێگرتنا باشترینان ئەو “ باشترینە” د مێژوویا تەپاپێدا، چونکی بتنێ سەرۆک یانە نینە، بەلکو ئەقلەکێ برێڤەبەرنێ یێ مەندەهۆشکەرهەیە، ب پلان و هزرێن جودا شانازیا وەرزشی بۆ خوە و یانەیا خوە دروستکرییە، کو جودانە ژ هەر یانەیەکا دیتر و دئاست و پێگەهەکێ بلندتر دانە.
ئەو سه‌رۆكه فلۆرێنتینۆ پێرێزە – سەرۆکێ یانەیا ریال مەدرید
کو ب ئێک ژ سەرکەفتیترین و ب هێزترین سەرۆک یانه‌یان دهێتە هژمارتن د مێژوویا تەپاپێدا، ژبه‌ر دووربینی و پلانێن وەرزشی یێن گه‌له‌گ درێژ، ب هێزی و کارێکتەری د دانوستاناندا و د چاره‌كرنا ئاریشه‌یێن یانێ دا، بەرهەمئینانا بەردەوام د یاریکەر و ژێرخانا ئابووریدا و زێدەکرنا داهاتێ یانێ چەند جاران پتر ژ بەرێ، ب دوماهیک هاتنا کێشەیێن کارگێری و دروستکرنا ناسنامەیەکا جێگیر بۆ یانێ کو هەتا راهێنەر و یاریکەران ژی دەربازدکەت.لە سالا 2000 پێرێز ب رێکا هەلبژارتنێن ریال مەدرید هاتە ناڤ جیهانا تەپاپێ، وەسا پشکداری د بانگەشەیا هەلبژارتنان داکر خەلکی ب «شۆرەشگێر» وەسفا وی دکر؛ چەند سۆزەک دان گرنگترین ژوان: گرێبەستکرن ل گەل لویس فیگۆی ستێرا پورتوگالی یا یانەیا بەرشەلۆنە ڕکابەرا تەقلیدییا ریال مەدرید، کو ل وی دەمی د جیهانا تەپا پێدا ب کارەکێ( نه مومكن) دهاتە بناڤکرن.
پێرێز د هەلبژارتنان دا ب سەرکەفت، سۆزا خوە ب جهـئینا و گرێبەست ل گەل فیگۆ ئەنجام دا ب بهایێ ٦٠ ملیۆن یۆرۆیان کو ژمارەیەکا پیڤانەی بوو د وی دەمیدا، پشتی ڤێ گرێبه‌ستێ، پێرێز دەست ب پرۆژێ “گالاکتیکۆس” کر — هزرا کڕینا باشترین ستێرێن جیهانێ ل هەمی هاڤینان، ڤێجا چ ئەوێن د گۆپیتکا ئاستێ خوەدا یان ژ گەلەک بناڤودەنگ، ژوان: زێنه‌دین زێدان ب بهایێ 77.5 ملیۆن یۆرۆ (گرانترین یاریکەر د وی دەمیدا)، رۆنالدۆیێ بەڕازیلی، دەیڤد بێکهام، مایکل ئۆین و چەندین یاریکەرێن دیتر کو پێکهاتبوون ژ ڕۆبینهۆ، ساموێل ئیتۆ، سۆلاری.. .
ئەڤێ سیاسەتێ یانەیا ریال مەدرید ژ یانەیەکا وەرزشی یا مه‌زن گوهۆری بۆئه‌فسانه و باشترینا جیهانێ ئه‌و بوو «مارکەیەکا جیهانی» پشتەڤان و سپۆنسەر ل سەرانسەری جیهانێ بۆ خوە ڕاکێشان.
پاشی ل سالا 2006 پێرێز دەست ژکارکێشا، بەلێ ئەو چوونەکا ب ئێکجاری نەبوو…
ل سالا 2009 ب هێزڤە زڤڕیڤە و «پێلا دوێ یا گالاکتیکۆس»ـێ دەستپێکر:
•کریستیانۆ ڕۆناڵدۆب گرێبەستەکا مێژوویی ب بهایێ ٩٤ ملیۆن یۆرۆیان كڕی، کاکا، کەریم بنزێما، چابی ئەلۆنسۆ و پاشی و سالێن دویڤدا چەندین ستێرێن دی، ڤێ سیاسەتێ ژبلی کو گەلەک ل جیهانێ دەنگ ڤەدا و پشتەڤانەکێ مەزن دروستکر ریال مەدرید جارەکا دی زڤری سەر دەپێ ب دەستڤەئینانا نازناڤان و د سەردەمێ سەرۆکایەتیا ویدا هەتا نوکە زێدەتر ژ 30 نازناڤان ب دەستڤەئیناینە گرنگترین ژ وان 7 جاران چامپیۆنزلیگ، کو پێشتر د مێژوویا تەپاپێدا چێنەبوویە.
پێرێز خودانێ زیرەکییەکا ئابووری یا مەزنە، دزانیت چەوا هەڤسەنگیێ د ناڤبەرا کڕینا یاریکەران و گرێبەست و بازارکرن و رێکلاماندا دروست بکەت.قازانجێن ریال مەدرید بۆ ئاستەکێ پیڤانەی بلندکرن.
پرۆژێ مه‌زنترین كۆمه‌لگه‌ها وه‌رزشی و نووژەنکرنا یاریگەها سانتیاگۆ بێرنابیۆ دانا، ب ڤێژی بوو ئێک ژ پێشکەفتیترین یاریگەهێن جیهانێ، ئەردێ یاریگەهێ ب شێوەیەکی بەرهەڤکر کو نەبتنێ بۆ تەپاپێ بەلکو بۆ یاریێن دی ژی هەتا کونسێرت و ئاهەنگێن گەلەک مەزن، ب ڤێ ژی داهاته‌كێ مه‌زن په‌یداكر.
